08 ਫਰਵਰੀ 2021

ਜਿਹੜਾ ਸੰਕਲਪ ਘਰੋਂ ਲੈ ਕੇ ਆਏ ਹਾਂ, ਉਸ ਉੱਪਰ ਹੀ ਪੂਰੇ ਉੱਤਰਾਂਗੇ- ਕਿਸਾਨ ਆਗੂ
ਭਗਤੀ ਤੇਰੀ ਪੂਰਨਾ, ਕੱਚੇ ਧਾਗੇ ਦਾ ਸੰਗਲ ਬਣ ਜਾਵੇ।

ਪੇਸ਼ ਕੀਤਾ ਗਿਆ ਬਜਟ ਕਿਸਾਨਾਂ ਦੀਆਂ ਜ਼ਮੀਨਾਂ ਖੋਹਣ ਦੀ ਸਾਜ਼ਿਸ਼ - ਟਿਕੈਤ
ਬਾਣੀਆਂ ਨੇ ਅੱਤ ਚੁੱਕ ਲਈ, ਸਾਰੇ ਜੱਟ ਕਰਜ਼ਾਈ ਕੀਤੇ।

ਕੌਂਸਲ ਚੋਣਾਂ ‘ਚ ਪਾਰਟੀ ਪਛਾਣ ਤੋਂ ਮੁਨਕਰ ਹੋਣ ਲੱਗੇ ਭਾਜਪਾ ਉਮੀਦਵਾਰ- ਇਕ ਖ਼ਬਰ
ਆਹ ਲੈ ਫੜ ਮਾਲ਼ਾ ਆਪਣੀ, ਸਾਥੋਂ ਭੁੱਖਿਆਂ ਤੋਂ ਭਗਤੀ ਨਾ ਹੋਵੇ।

ਇਹ ਰਾਜਨੀਤੀ ਦਾ ਨਹੀਂ, ਕਿਸਾਨਾਂ ਦਾ ਅੰਦੋਲਨ ਹੈ- ਰਾਕੇਸ਼ ਟਿਕੈਤ
ਕੰਨ ਪਾਟਿਆਂ ਨਾਲ਼ ਨਾ ਜ਼ਿਦ ਕੀਜੇ, ਅੰਨ੍ਹੇ ਖੂਹ ਵਿਚ ਝਾਤ ਨਾ ਘੱਤੀਏ ਨੀ।

ਜਦ ਤੱਕ ਹੱਲ ਨਹੀਂ, ਕਿਸਾਨ ਅੰਦੋਲਨ ਉਦੋਂ ਤੱਕ ਜਾਰੀ ਰਹੇਗਾ- ਗੌਰਵ ਟਿਕੈਤ
ਜੀਹਦੇ ਅੰਦਰ ਇਸ਼ਕ ਦੀ ਰੱਤੀ, ਉਹ ਬਾਝ ਸ਼ਰਾਬੋਂ ਖੀਵੇ ਹੂ।

ਕਿਸਾਨਾਂ ਦੇ ਮੁੱਦੇ ‘ਤੇ ਬ੍ਰਿਟੇਨ ਦੀ ਸੰਸਦ ‘ਚ ਹੋਵੇਗੀ ਚਰਚਾ- ਇਕ ਖ਼ਬਰ
ਖੂਹ ਟੋਭੇ ਤੇਰੀ ਚਰਚਾ ਹੁੰਦੀ, ਚਰਚਾ ਨਾ ਕਰਵਾਈਏ।

ਤਿਹਾੜ ‘ਚ ਬੰਦ ਕਿਸਾਨਾਂ ਦੇ ਵੇਰਵੇ ਆਪਣੀ ਲੱਤ ‘ਤੇ ਲਿਖ ਕੇ ਲਿਆਇਆ ਮਨਦੀਪ ਪੂਨੀਆ- ਇਕ ਖ਼ਬਰ
ਮੁੜਨ ਮੁਹਾਲ ਤਿਨ੍ਹਾਂ ਨੂੰ ਬਾਹੂ, ਜਿਨ੍ਹਾਂ ਸਾਹਿਬ ਆਪ ਬੁਲਾਵੇ ਹੂ।

ਟਿਕੈਤ ਦਾ ਸਹਾਰਾ ਲੈ ਕੇ ਸੁਖਬੀਰ ਬਾਦਲ ਨੇ ਰਾਜਨੀਤਕ ਜ਼ਮੀਨ ਹਾਸਲ ਕਰਨ ਦੀ ਕੋਸ਼ਿਸ਼ ਕੀਤੀ- ਫਤਿਹਮਾਜਰੀ
ਸ਼ੇਰਾਂ ਦੀਆਂ ਮਾਰਾਂ ‘ਤੇ, ਗਿੱਦੜ ਕਰਨ ਕਲੋਲਾਂ।

ਤੋਮਰ ਨੂਂ ਸੱਤਾ ਦਾ ਨਸ਼ਾ ਚੜ੍ਹਿਆ- ਆਰ.ਆਰ.ਐੱਸ. ਆਗੂ
ਉਹ ਕਿਹੜਾ ਪੀਣੀ ਚਾਹੁੰਦਾ, ਮੋਦੀ ਢਾਅ ਕੇ ਪਿਆਉਂਦੈ ਉਹਨੂੰ।

ਟਿਕੈਤ ਨੇ ਕੇਂਦਰ ਨੂੰ 2 ਅਕਤੂਬਰ ਤੱਕ ਦਾ ਅਲਟੀਮੇਟਮ ਦਿੱਤਾ- ਇਕ ਖ਼ਬਰ
ਲੈ ਬਈ ਮਿੱਤਰਾ ਅਸੀਂ ਤਾਂ ਤਿਆਰੀਆਂ ਖਿੱਚ ਲਈਆਂ, ਤੂੰ ਵੀ ਹੀਲਾ ਕਰ ਲੈ ਆਪਣਾ।

ਬਾਇਡਨ ਪ੍ਰਸ਼ਾਸਨ ਵਲੋਂ ਖੇਤੀ ਕਾਨੂੰਨਾਂ ਦੀ ਵਕਾਲਤ ਤੇ ਕਿਸਾਨਾਂ ਦਾ ਸ਼ਾਂਤਮਈ ਅੰਦੋਲਨ ਜਮਹੂਰੀਅਤ ਦਾ ਪ੍ਰਮਾਣ-ਇਕ ਖ਼ਬਰ
ਯਾਨੀ ਕਿ ਗਲਤ ਭਾਈਆ ਦਸੌਂਧਾ ਸਿਉਂ ਵੀ ਨਹੀਂ ਤੇ ਸਹੀ ਮਾਈ ਧੰਨ ਕੌਰ ਵੀ ਐ।

ਕਿਸਾਨਾਂ ਦੇ ਹੱਕ ‘ਚ ਸੁਖਬੀਰ ਬਾਦਲ ਅਤੇ ਹਰਸਿਮਰਤ ਵਲੋਂ ਨਾਹਰੇਬਾਜ਼ੀ- ਇਕ ਖ਼ਬਰ
ਈਦੋਂ ਬਾਅਦ ਤੰਬਾ ਫੂਕਣੈ ।

ਅਮੀਰਾਂ ਦਾ ਬਜਟ ਜੋ ਉਹਨਾਂ ਦੇ ਦੋਸਤਾਂ ਨੇ ਉਹਨਾਂ ਲਈ ਹੀ ਬਣਾਇਆ ਹੈ- ਸਪੋਕਸਮੈਨ
ਮੌਜਾਂ ਲੈਣ ਗੇ ਸਾਧ ਦੇ ਚੇਲੇ।

ਮੋਦੀ ਤੇ ਇੰਦਰਾ ਗਾਂਧੀ ਦੀ ਸੋਚ ਵਿਚ ਕੋਈ ਫ਼ਰਕ ਨਹੀਂ-ਭਾਈ ਮਨਜੀਤ ਸਿੰਘ
ਨੱਥਾ ਸਿੰਘ ਪ੍ਰੇਮ ਸਿੰਘ, ਵੰਨ ਐਂਡ ਦੀ ਸੇਮ ਥਿੰਗ।

ਬੀ.ਜੇ.ਪੀ. ਦੇ ਟਰਾਂਸਪੋਰਟ ਸੈੱਲ ਦਾ ਪ੍ਰਧਾਨ ਨਾਜਾਇਜ਼ ਸ਼ਰਾਬ ਲਿਜਾਂਦਾ ਕਾਬੂ- ਇਕ ਖ਼ਬਰ
ਕੀ ਕਰੀਏ ਬਈ ਕਿਸਾਨਾਂ ਦੇ ਵਿਰੋਧ ਦਾ ਮੁਕਾਬਲਾ ਕਰਨ ਲਈ ਘੁੱਟ ਪੀਣੀ ਪੈਂਦੀ ਐ।  

ਸੰਯੁਕਤ ਕਿਸਾਨ ਮੋਰਚੇ ਨਾਲ ਸਬੰਧਤ ਟਵਿਟਰ ਖਾਤੇ ਬੰਦ- ਇਕ ਖ਼ਬਰ
ਖ਼ਬਰਦਾਰ ਰਹਿਣਾ ਬਈ, ਗੱਡੀ ਜ਼ਾਲਮਾਂ ਦੀ ਆਈ।

ਮੈਂ ਕਿਸਾਨਾਂ ਨੂੰ ਚੰਗੀ ਤਰ੍ਹਾਂ ਜਾਣਦਾ ਹਾਂ, ਉਹ ਪਿੱਛੇ ਮੁੜਨ ਵਾਲੇ ਨਹੀਂ- ਰਾਹੁਲ
ਤੋਰ ਸ਼ੁਕੀਨਾਂ ਦੀ, ਤੂੰ ਕੀ ਜਾਣੇ ਦਿੱਲੀਏ।

ਭਾਜਪਾ ਨੂੰ ਕੌਂਸਲ ਚੋਣਾਂ ਲਈ ਉਮੀਦਵਾਰ ਨਹੀਂ ਲੱਭ ਰਹੇ- ਇਕ ਖ਼ਬਰ
ਨਵੀਏਂ ਸ਼ੁਕੀਨ ਕੁੜੀਏ, ਅੱਖ ਮਾਰ ਕੇ ਖਿੰਡਾ ਲਿਆ ਸੁਰਮਾ।

ਸਰਕਾਰ 48 ਹਜ਼ਾਰ ਕਰੋੜ ਵਿਚ 83 ਤੇਜਸ ਲੜਾਕੂ ਜਹਾਜ਼ ਖਰੀਦੇਗੀ- ਰੱਖਿਆ ਮੰਤਰੀ
ਤੇ ਨਿੰਬੂ ਖ਼ਰੀਦਣ ਲਈ ਅਲੱਗ ਬਜਟ ਰੱਖਿਆ ਜਾਵੇਗਾ।

ਪੰਜਾਬੀਆਂ ਨੇ ਕਦੇ ਵੀ ਧੱਕਾ ਬਰਦਾਸ਼ਤ ਨਹੀਂ ਕੀਤਾ- ਸਿਮਰਨਜੀਤ ਸਿੰਘ ਮਾਨ
ਇਹਦਾ ਜੋਗ ਦਰਗਾਹ ਮੰਨਜ਼ੂਰ ਹੋਇਆ, ਮੱਥਾ ਟੇਕਦਾ ਕੁੱਲ ਜਹਾਨ ਸਾਰਾ।

ਕਿਸਾਨਾਂ ਨਾਲ਼ ਲੜਾਈ ਛੇੜ ਕੇ ਨਾ ਕੋਈ ਜਿੱਤਿਆ, ਨਾ ਜਿੱਤ ਸਕੇਗਾ- ਗੁਲਾਮ ਨਬੀ ਆਜ਼ਾਦ
ਕਾਦਰਯਾਰ ਕੀ ਸਿੱਧਾਂ ਦੀ ਸਿਫ਼ਤ ਕਰੀਏ, ਬਣ ਬੈਠੇ ਨੇ ਕਈ ਜਮਾਇਤਾਂ ਦੇ।

31 ਜਨਵਰੀ 2021

ਪ੍ਰਧਾਨ ਮੰਤਰੀ ਬੋਰਿਸ ਜਾਹਨਸਨ ਦੀ ਗੱਲਬਾਤ ਅਮਰੀਕਾ ਦੇ ਨਵੇਂ ਚੁਣੇ ਪ੍ਰਧਾਨ ਨਾਲ਼ ਗੱਲਬਾਤ ਹੋਈ- ਇਕ ਖ਼ਬਰ
ਤੇਰੀ ਮੇਰੀ ਇਕ ਜਿੰਦੜੀ, ਸੁਫ਼ਨੇ ‘ਚ ਨਿੱਤ ਮਿਲ਼ਦੀ।

ਦੀਪ ਸਿੱਧੂ ਨੇ ਸਮਾਂ ਆਉਣ ‘ਤੇ ਕਿਸਾਨ ਆਗੂਆਂ ਨੂੰ ਦੇਖ ਲੈਣ ਦੀ ਧਮਕੀ ਦਿੱਤੀ- ਇਕ ਖ਼ਬਰ
ਚੁੱਕੀ ਹੋਈ ਪੰਚਾਂ ਦੀ ਗਾਲ਼ ਬਿਨਾਂ ਨਾ ਬੋਲੇ।

ਦਿੱਲੀ ਅੰਦੋਲਨ ਨੇ ਲੋਕਾਂ ‘ਚ ਏਕਤਾ ਦੀ ਭਾਵਨਾ ਪੈਦਾ ਕੀਤੀ- ਪ੍ਰਮਿੰਦਰ ਸਿੰਘ ਢੀਂਡਸਾ
ਸੁੱਚਿਆਂ ਰੁਮਾਲਾਂ ਨੂੰ, ਲਾ ਦੇ ਧੰਨ ਕੌਰੇ ਗੋਟਾ।

ਨਵੇਂ ਖੇਤੀ ਕਾਨੂੰਨਾਂ ਤਹਿਤ ਲਾਭ ਮੰਗ ਰਹੀਆਂ 7 ਪਟੀਸ਼ਨਾਂ ਹਾਈ ਕੋਰਟ ਵਲੋਂ ਖਾਰਜ- ਇਕ ਖ਼ਬਰ
ਪਿੰਡ ਪਏ ਨਹੀਂ ਉਚੱਕੇ ਪਹਿਲਾਂ ਹੀ ਪਧਾਰੇ।

ਕਿਸਾਨਾਂ ਦੀ ਆਮਦ ਨੇ ਗਾਜ਼ੀਪੁਰ ਧਰਨੇ ‘ਚ ਭਰਿਆ ਜੋਸ਼-ਇਕ ਖ਼ਬਰ
ਟੈਮ ਹੋ ਗਿਆ ਬਦਲ ਗਏ ਕਾਂਟੇ, ਗੱਡੀ ਆਉਣੀ ਸ਼ੂੰ ਕਰ ਕੇ।

ਪੰਜਾਬ ਭਰ ਤੋਂ ਦਿੱਲੀ ਵਲ ਵਹੀਰਾਂ ਘੱਤਣ ਲੱਗੇ ਕਿਸਾਨ- ਇਕ ਖ਼ਬਰ
ਕਾਦਰਯਾਰ ਅਸਵਾਰ ਹੋ ਖ਼ਾਲਸਾ ਜੀ, ਮੱਥਾ ਨਾਲ਼ ਫਰੰਗੀ ਦੇ ਲਾਂਵਦੇ ਨੇ।

ਮਮਤਾ ਨੇ ਪੱਛਮੀ ਬੰਗਾਲ ਵਿਧਾਨ ਸਭਾ ‘ਚ ਖੇਤੀ ਕਾਨੂੰਨਾਂ ਖਿਲਾਫ਼ ਮਤਾ ਪਾਸ ਕੀਤਾ- ਇਕ ਖ਼ਬਰ
ਮੈਨੂੰ ਨਰਮ ਕੁੜੀ ਨਾ ਜਾਣੀਂ, ਲੜ ਜੂੰ ਭਰਿੰਡ ਬਣ ਕੇ।

ਗਣਤੰਤਰ ਦਿਵਸ ‘ਤੇ ਪ੍ਰਸ਼ਾਸਨ ਨੇ ਮੰਚ ‘ਤੇ ਨਹੀਂ ਬੁਲਾਏ ਸੁਤੰਤਰਤਾ ਸੈਨਾਨੀ- ਇਕ ਖ਼ਬਰ
ਬਈ ਸਮਾਂ ਲੰਘ ਗਿਆ, ਹੁਣ ਸੁਤੰਤਰਤਾ ਸੈਨਾਨੀਆਂ ਤੋਂ ਛਿੱਕੂ ਲੈਣੈ ਸਰਕਾਰ ਨੇ।

ਕਿਸਾਨ ਆਗੂਆਂ ਵਿਰੁੱਧ  ਸਰਕਾਰ ਵਲੋਂ ਲੁੱਕ ਆਊਟ ਨੋਟਿਸ ਜਾਰੀ- ਇਕ ਖ਼ਬਰ
ਨੀਰਵ ਮੋਦੀ, ਲਲਿਤ ਮੋਦੀ, ਵਿਜੇ ਮਾਲੀਆ ਤੇ ਮੇਹੁਲ ਚੌਕਸੀ ਵੇਲੇ ਇਹ ਨੋਟਿਸ ਕਿੱਥੇ ਸਨ?

ਕਿਸਾਨ ਆਗੂਆਂ ਦੇ ਵਾਅਦਾ ਤੋੜਨ ਨਾਲ਼ ਹੋਈ ਹਿੰਸਾ- ਦਿੱਲੀ ਪੁਲਸ ਕਮਿਸ਼ਨਰ
ਬੋਦੀ ਵਾਲ਼ਾ ਤਾਰਾ ਚੜ੍ਹਿਆ, ਘਰ ਘਰ ਹੋਣ ਵਿਚਾਰਾਂ।

ਲਾਲ ਕਿਲ੍ਹੇ ਉੱਤੇ ਝੰਡਾ ਲਹਿਰਾਉਣ ਦੇ ਮਾਮਲੇ ‘ਤੇ ਇਕ ਵਿਅਕਤੀ ਨੇ ਸੁਪਰੀਮ ਕੋਰਟ ਨੂੰ ਲਿਖੀ ਚਿੱਠੀ-ਇਕ ਖ਼ਬਰ
ਚਿੱਠੀ ਤਾਂ ਮੈਨੂੰ ਲਗਦੈ ਪਈ 25 ਤਰੀਕ ਨੂੰ ਹੀ ਲਿਖ ਕੇ ਰੱਖ ਲਈ ਹੋਣੀ ਐ।

ਦੀਪ ਸਿੱਧੂ ਨੂਂ ਬੀ.ਜੇ.ਪੀ. ਵਾਲੇ ਹੀ ਲਾਲ ਕਿਲ੍ਹੇ ਲੈ ਕੇ ਗਏ- ਅਭਿਮੰਨਯੂ ਕੋਹਾੜ, ਕਿਸਾਨ ਨੇਤਾ
ਨਾ ਸਾਡਾ ਧਰਮ ਰਿਹਾ, ਨਾ ਘੁੱਗ ਕੇ ਵਸੀ ਘਰ ਤੇਰੇ।

ਖੇਤੀ ਕਾਨੂੰਨਾਂ ਦੇ ਵਿਰੋਧ ‘ਚ ਅਭੈ ਚੋਟਾਲਾ ਨੇ ਹਰਿਆਣਾ ਵਿਧਾਨ ਸਭਾ ਤੋਂ ਦਿੱਤਾ ਅਸਤੀਫ਼ਾ- ਇਕ ਖ਼ਬਰ
ਭੱਠ ਪਿਆ ਸੋਨਾ, ਜਿਹੜਾ ਕੰਨਾਂ ਨੂੰ ਖਾਵੇ।

ਬਾਇਡਨ ਪ੍ਰਸ਼ਾਸਨ ਨਾਲ਼ ਕੰਮ ਕਰਨ ਲਈ ਉਤਸਾਹਿਤ ਹਾਂ- ਭਾਰਤੀ ਸਫ਼ੀਰ
ਗੰਗਾ ਗਏ ਗੰਗਾ ਰਾਮ, ਜਮਨਾ ਗਏ ਜਮਨਾ ਦਾਸ।

ਟਿਕਟਾਕ ਭਾਰਤ ਵਿਚ ਆਪਣਾ ਕਾਰੋਬਾਰ ਬੰਦ ਕਰੇਗੀ-ਇਕ ਖ਼ਬਰ
ਚਲ ਉਡ ਜਾ ਰੇ ਪੰਛੀ, ਕਿ ਅਬ ਯੇਹ ਦੇਸ ਹੂਆ ਬੇਗਾਨਾ।

ਲਾਲ ਕਿਲ੍ਹਾ 31 ਜਨਵਰੀ ਤੱਕ ਬੰਦ- ਇਕ ਖ਼ਬਰ
26 ਜਨਵਰੀ ਨੂੰ ਹਵਾ ਲੁਆਉਣ ਲਈ ਖੁੱਲ੍ਹਾ ਰੱਖਿਆ ਹੋਇਆ ਸੀ?

26 ਜਨਵਰੀ 2021

ਖੇਤੀ ਕਾਨੂੰਨ ਪਾਸ ਕਰਵਾਉਣ ਵਿਚ ਕੈਪਟਨ ਅਮਰਿੰਦਰ ਸਿੰਘ ਵੀ ਸ਼ਾਮਲ- ਰਾਘਵ ਚੱਢਾ
ਵੇ ਘਰ ਤੇਲਣ ਦੇ , ਤੇਰਾ ਚਾਦਰਾ ਖੜਕੇ।

ਗਣਤੰਤਰ ਕਿਸਾਨ ਪਰੇਡ ਦੀ ਪ੍ਰਵਾਨਗੀ ਨੇ ਵਧਾਏ ਕਿਸਾਨਾਂ ਦੇ ਹੌਸਲੇ- ਇਕ ਖ਼ਬਰ
ਖੇ ਖੂਬ ਹੁਸ਼ਿਆਰੀ ਨਾਲ ਯਾਰੋ, ਲੱਗੇ ਕਰਨ ਅਫ਼ਗਾਨ ਤਿਆਰੀ ਯਾਰੋ।

ਭਾਰਤ ਦੇ ਸਾਬਕਾ ਚੀਫ਼ ਜਸਟਿਸ ਰੰਜਨ ਗੋਗੋਈ ਨੂੰ ਜ਼ੈੱਡ ਪਲੱਸ ਸੁਰੱਖਿਆ ਮਿਲੀ-ਇਕ ਖ਼ਬਰ
ਤੂੰ ਮੇਰੀ ਪਿੱਠ ‘ਤੇ ਖਾਜ ਕਰ ਮੈਂ ਤੇਰੀ ਪਿੱਠ ‘ਤੇ ਕਰੂੰ।

ਸ਼ਗਨ ਰਾਸ਼ੀ ਇਕਵੰਜਾ ਹਜ਼ਾਰ ਕਰਨ ਦਾ ਮੁੱਖ ਮੰਤਰੀ ਵਲੋਂ ਐਲਾਨ- ਇਕ ਖ਼ਬਰ
ਤੇਰਾ ਲਾਰਾ ਵੇ ਸ਼ਰਾਬੀਆਂ ਦੀ ਗੱਪ ਵਰਗਾ।  

ਰਾਹੁਲ ਵਿਰੁੱਧ ਬੋਲਣ ਤੋਂ ਪਹਿਲਾਂ ਤਰੁਣ ਚੁੱਘ ਆਪਣਾ ਕੱਦ ਦੇਖੇ- ਸਾਧੂ ਸਿੰਘ ਧਰਮਸੋਤ
ਮੇਰੇ ਯਾਰ ਨੂੰ ਮੰਦਾ ਨਾ ਬੋਲੀਂ, ਮੇਰੀ ਭਾਵੇਂ ਜਿੰਦ ਕੱਢ ਲੈ।

ਨਿਰਾਸ਼ ਲੋਕਾਂ ਨੂੰ ਜ਼ਿੰਦਗੀ ਦੇਵੇਗਾ ਕਿਸਾਨ ਅੰਦੋਲਨ-ਗਿੱਲ ਰੌਂਤਾ
ਉੱਚਾ ਦਰ ਬਾਬੇ ਨਾਨਕ ਦਾ, ਮੈਂ ਸੋਭਾ ਸੁਣ ਕੇ ਆਇਆ।

ਭਾਰਤ ਸਣੇ ਦੁਨੀਆਂ ਦੇ ‘ਬੁੱਢੇ’ ਹੋ ਰਹੇ ਡੈਮਾਂ ਤੋਂ ਦੁਨੀਆਂ ਨੂੰ ਖਤਰਾ- ਇਕ ਰਿਪੋਰਟ
ਸਾਨੂੰ ਨਹੀਂ ਚਿੰਤਾ, ਸਾਡੇ ਕੋਲ ਪੈਂਤੀ ਪੈਂਤੀ ਸੌ ਕਰੋੜ ਦੇ ਸਟੈਚੂ ਹੈਗੇ ਆ।

ਗੁਰਦੁਆਰੇ ਦੇ ਫੰਡਾਂ ‘ਚ ਇਕ ਕਰੋੜ ਦੇ ਘਪਲੇ ਲਈ ਮਨਜਿੰਦਰ ਸਿੰਘ ਸਿਰਸਾ ‘ਤੇ ਦੂਜੀ ਐਫ.ਆਈ.ਆਰ. ਦਰਜ- ਇਕ ਖ਼ਬਰ
ਵੈਰੀ ਤੇਰੇ ਐਬ ਬੰਦਿਆ, ਹੁੰਦਾ ਰੱਬ ਨਹੀਂ ਕਿਸੇ ਦਾ ਵੈਰੀ।

ਸਾਧ ਨੂੰ ਬੰਧਕ ਬਣਾ ਕੇ ਲੁਟੇਰਿਆਂ ਨੇ ਅਸਲਾ ਤੇ ਰੁਪਇਆ ਲੁੱਟਿਆ-ਇਕ ਖ਼ਬਰ
ਚੋਰਾਂ ਨੂੰ ਮੋਰ।

ਕਿਸਾਨ ਮੋਰਚੇ ‘ਚ ਔਰਤਾਂ ਦੀ ਸ਼ਮੂਲੀਅਤ ਤੋਂ ਡਰੀ ਹਕੂਮਤ- ਡਾ: ਨਵਸ਼ਰਨ
ਮੈਂ ਪੁੱਤਰੀ ਕਲਗੀਧਰ ਦੀ ਹਾਂ, ਨਹੀਂ ਕਿਸੇ ਤੋਂ ਡਰਦੀ ਹਾਂ।

ਬੀਰ ਦਵਿੰਦਰ ਸਿੰਘ ਨੇ ਕਿਸਾਨਾਂ ਵਿਰੁੱਧ ਐਨ.ਆਈ.ਏ. ਦੀ ਕਾਰਵਾਈ ਦੀ ਨਿੰਦਾ ਕੀਤੀ-ਇਕ ਖ਼ਬਰ
ਦੇਸ਼ ਭਗਤ ਸਰਕਾਰ ਦੇ ਸਭ ਯਾਰ, ਬਾਕੀ ਏਥੇ ਸਭ ਗੱਦਾਰ।

ਕਿਸਾਨਾਂ ਲਈ ਮਦਦਗਾਰ ਹੋਣਗੇ ਖੇਤੀ ਕਾਨੂੰਨ- ਖੇਤੀ ਬਾੜੀ ਮੰਤਰੀ ਤੋਮਰ
ਮੇਰੀ ਸੂਈ ਮੋਦੀ ਨੇ ਏਥੇ ਹੀ ਫ਼ਸਾਈ ਹੋਈ ਹੈ, ਮੈਂ ਕੀ ਕਰਾਂ।

ਬਾਦਲ ਪਰਵਾਰ ਨੇ ਹਮੇਸ਼ਾ ਹੀ ਸਿੱਖਾਂ ਦਾ ਨੁਕਸਾਨ ਕੀਤਾ- ਸਾਬਕਾ ਜਥੇਦਾਰ ਭਾ: ਰਣਜੀਤ ਸਿੰਘ
ਦਾਹੜੀ ਝਾੜ ਕੇ ਬਹਿ ਗਿਆ ਤਕੀਏ, ਕਣਕ ਖਾ ਗਿਆ ਝੋਟਾ।

ਐਨ.ਆਈ.ਏ. ਦੇ ਨੋਟਿਸਾਂ ਤੋਂ ਮੋਦੀ ਸਰਕਾਰ ਦੀ ਨੀਅਤ ਬਿਲਕੁਲ ਸਾਫ਼ ਹੋ ਗਈ ਹੈ- ਗੁਲ ਪਨਾਗ
ਨ੍ਹਾਉਂਦੀ ਫਿਰੇਂ ਤੀਰਥਾਂ ‘ਤੇ, ਤੇਰੇ ਅੰਦਰੋਂ ਮੈਲ਼ ਨਾ ਜਾਵੇ।

ਮਮਤਾ ਨੂੰ ਇਕ ਹੋਰ ਝਟਕਾ, ਇਕ ਹੋਰ ਵਿਧਾਇਕ ਭਾਜਪਾ ‘ਚ ਸ਼ਾਮਲ-ਇਕ ਖ਼ਬਰ
ਰੁੱਤ ਯਾਰੀਆਂ ਲਾਉਣ ਦੀ ਆਈ, ਬੇਰੀਆਂ ਦੇ ਬੇਰ ਪੱਕ ਗਏ।

ਕਿਸਾਨਾਂ ਦੇ ਮੁੱਦਿਆਂ ‘ਤੇ ਕੇਂਦਰ ਸਰਕਾਰ ਗੰਭੀਰ ਨਹੀਂ- ਸੁਖਬੀਰ ਬਾਦਲ
ਤੁਹਾਡੀ ਗੰਭੀਰਤਾ ਵੀ ਜਾਣ ਗਈ ਸਾਰੀ ਦੁਨੀਆਂ, ਢੱਕੇ ਰਹੋ।

ਬਾਇਡਨ ਨੇ ਪਹਿਲੇ ਦਿਨ ਹੀ ਟਰੰਪ ਦੇ ਕਈ ਫ਼ੈਸਲੇ ਉਲਟਾਏ-ਇਕ ਖ਼ਬਰ
ਢਾਬ ਤੇਰੀ ਦਾ ਗੰਧਲਾ ਪਾਣੀ, ਉੱਤੋਂ ਬੂਰ ਹਟਾਵਾਂ।

ਨਿਆਂਪਾਲਿਕਾ ਤੇ ਜਾਂਚ ਏਜੰਸੀਆਂ ਨੂੰ ਸੁਤੰਤਰ ਢੰਗ ਨਾਲ ਕੰਮ ਕਰਨਾ ਚਾਹੀਦਾ ਹੈ- ਹਾਈ ਕੋਰਟ
ਰੰਡੀਆਂ ਤਾਂ ਰੰਡ ਕੱਟਦੀਆਂ ਪਰ ਮੁਸ਼ਟੰਡੇ ਨਹੀਂ ਕੱਟਣ ਦਿੰਦੇ।

18 ਜਨਵਰੀ 2021

ਸੁਪਰੀਮ ਕੋਰਟ ਨੇ ਕਿਸਾਨਾਂ ਦੀ ਆਸ ਜਗਾਈ ਤੇ ਫਿਰ ਕਮੇਟੀ ਬਣਾ ਕੇ ਨਿਰਾਸ਼ ਕੀਤਾ- ਇਕ ਖ਼ਬਰ
ਹੋਕਾ ਵੰਙਾਂ ਦਾ, ਕੱਢ ਦਿਖਾਇਆ ਚੱਕੀ ਰਾਹਾ।

ਭਾਜਪਾ ਦੇ ਕਈ ਆਗੂ ਤੇ ਵਰਕਰ ਸੁਖਬੀਰ ਨੇ ਅਕਾਲੀ ਦਲ ’ਚ ਸ਼ਾਮਲ ਕੀਤੇ-ਇਕ ਖ਼ਬਰ
ਏਦਾਂ ਦੇ ਕਾਂਗਰਸੀ ‘ਹੀਰੇ’ ਵੀ ਇਕ ਵਾਰੀ ਸੁਖਬੀਰ ਨੇ ‘ਕੱਠੇ ਕੀਤੇ ਸੀ।

ਸੁਖਬੀਰ ਕੋਰਟ ਵੀ ਨਹੀਂ ਸਮਝ ਸਕੀ ਕਿਸਾਨਾਂ ਦਾ ਦਰਦ- ਭਗਵੰਤ ਮਾਨ
ਜਿਸ ਕੇ ਪੈਰ ਨਾ ਫਟੀ ਬਿਆਈ, ਉਹ ਕੀ ਜਾਣੇ ਪੀੜ ਪਰਾਈ।

ਕਿਸਾਨਾਂ ਨੂੰ ਪਤਾ ਹੀ ਨਹੀਂ ਕਿ ਉਹ ਕੀ ਚਾਹੁੰਦੇ ਹਨ- ਹੇਮਾ ਮਾਲਿਨੀ
ਤੂੰ ਨਹੀਂ ਬੋਲਦੀ ਰਕਾਨੇ ਤੂੰ ਨਹੀਂ ਬੋਲਦੀ, ਤੇਰੇ ‘ਚ ਤੇਰਾ ਯਾਰ ਬੋਲਦਾ।

ਡਬਲ ਐਮ.ਏ. ਪੀ.ਐੱਚ.ਡੀ. ਬੇਰੁਜ਼ਗਾਰ ਮਨਪ੍ਰੀਤ ਕੌਰ ਬੱਚਿਆਂ ਸਮੇਤ ਧਰਨੇ ‘ਚ ਹਿੱਸਾ ਪਾ ਰਹੀ ਹੈ-ਇਕ ਖ਼ਬਰ
ਕਿੱਥੇ ਗਿਆ ਤੇਰਾ ਦੋ ਕਰੋੜ ਨੌਕਰੀਆਂ ਦੇਣ ਦਾ ਤੇਰਾ ਵਾਅਦਾ, ਪ੍ਰਧਾਨ ਸੇਵਕ ਜੀ।

ਬਿਹਾਰ ‘ਚ ਗੂੰਗੀ ਤੇ ਬੋਲ਼ੀ ਲੜਕੀ ਨਾਲ਼ ਸਮੂਹਿਕ ਬਲਾਤਕਾਰ- ਇਕ ਖ਼ਬਰ
ਇਕ ਹੋਰ ਜੁਮਲਾ ‘ਲੜਕੀ ਬਚਾਉ ਲੜਕੀ ਪੜ੍ਹਾਉ’

ਸਰਕਾਰ ਪੰਜ ਸਾਲ ਚੱਲ ਸਕਦੀ ਹੈ ਤਾਂ ਅੰਦੋਲਨ ਵੀ ਪੰਜ ਸਾਲ ਚੱਲ ਸਕਦਾ ਹੈ- ਟਿਕੈਤ
ਕਾਦਰਯਾਰ ਉਹ ਨਰਕ ‘ਚ ਗਰਕ ਜਾਵੇ, ਜਿਹੜਾ ਏਸ ਮੈਦਾਨ ਤੋਂ ਮੂੰਹ ਮੋੜੇ।

ਰਿਟਾਇਰਡ ਜੱਜ ਕਾਟਜੂ ਨੇ ਖੇਤੀ ਕਾਨੂੰਨ ਰੱਦ ਕਰਨ ਲਈ ਮੋਦੀ ਨੂੰ ਪੱਤਰ ਲਿਖਿਆ- ਇਕ ਖ਼ਬਰ
ਸ਼ਾਹ ਮੁਹੰਮਦਾ ਓਸ ਤੋਂ ਸਦਾ ਡਰੀਏ, ਬਾਦਸ਼ਾਹਾਂ ਤੋਂ ਭੀਖ ਮੰਗਾਂਵਦਾ ਈ।

ਹਰਿਆਣਾ ਵਿਚ ਲੱਗਿਆ ਭਾਜਪਾ ਨੂੰ ਕਿਸਾਨੀ ਅੰਦੋਲਨ ਦਾ ਸੇਕ- ਇਕ ਖ਼ਬਰ
ਵੇਖ ਫਰੀਦਾ ਕਿਆ ਹੂਆ, ਸ਼ੱਕਰ ਹੋਈ ਵਿਸ।

ਭੂਪਿੰਦਰ ਸਿੰਘ ਮਾਨ ਨੇ ਸੁਪਰੀਮ ਕੋਰਟ ਵਲੋਂ ਬਣਾਈ ਕਮੇਟੀ ਨੂੰ ਕਹੀ ਅਲਵਿਦਾ- ਇਕ ਖ਼ਬਰ
ਭੱਠ ਪਿਆ ਸੋਨਾ, ਜਿਹੜਾ ਕੰਨਾਂ ਨੂੰ ਖਾਵੇ।

ਚੋਣਾਂ ‘ਚ ਬਸਪਾ ਕਿਸੇ ਨਾਲ਼ ਗੱਠਜੋੜ ਨਹੀਂ ਕਰੇਗੀ- ਮਾਇਆਵਤੀ
ਘੜਾ ਚੁੱਕ ਲਊਂ ਪੱਟਾਂ ‘ਤੇ ਹੱਥ ਧਰ ਕੇ, ਖਸਮਾਂ ਨੂੰ ਖਾਣ ਕੁੜੀਆਂ।

ਗ਼ੈਰਕਾਨੂੰਨੀ ਮਾਈਨਿੰਗ ‘ਚ ਸ਼ਾਮਲ ਵੱਡੇ ਮਗਰਮੱਛਾਂ ਨੂੰ ਬੇਨਕਾਬ ਕਰੋ- ਹਰਪਾਲ ਚੀਮਾ
ਲੱਡੂ ਖਾ ਕੇ ਚੁਬਾਰੇ ਵਿਚੋਂ ਨਿੱਕਲੀ, ਮੱਖੀਆਂ ਨੇ ਪੈੜ ਦੱਬ ਲਈ।

ਜਲੰਧਰ ਦੇ ਪ੍ਰੋਫੈਸਰ ਨੂੰ ਕਿਸਾਨ ਅੰਦੋਲਨ ਦੇ ਹੱਕ ‘ਚ ਲਿਖਣ ਕਰ ਕੇ ਐਨ.ਆਈ.ਏ.ਦਾ ਨੋਟਿਸ- ਇਕ ਖ਼ਬਰ
ਜੇਠ ਦੇ ਬੁਰੇ ਦਿਨ ਆਏ, ਕਿੱਕਰਾਂ ਨੂੰ ਪਾਵੇ ਜੱਫੀਆਂ।

ਕਿਸਾਨ ਅੰਦੋਲਨ ਨੂੰ ਦੇਸ਼ ਅਤੇ ਵਿਦੇਸ਼ ਤੋਂ ਸਮਰਥਨ ਮਿਲ ਰਿਹੈ- ਕਿਸਾਨ ਆਗੂ
ਮੇਰੀ ਕੱਤਣੀ ਨਸੀਬਾਂ ਵਾਲ਼ੀ, ਭਰੀ ਰਹੇ ਲੱਡੂਆਂ ਦੀ।

ਕੁਝ ਪਾਰਟੀਆਂ ਦੇ ਲੀਡਰ ਹਨ ਜੋ ਕਿਸਾਨ ਮਸਲੇ ਨੂੰ ਹੱਲ ਨਹੀਂ ਹੋਣ ਦੇ ਰਹੇ- ਹਰਜੀਤ ਗਰੇਵਾਲ
ਉਹੀਓ ਤੇਰੀ ਤੁਣਤੁਣੀ, ਉਹੀਓ ਤੇਰਾ ਰਾਗ।

ਕੀ ਕਿਸਾਨ ਅੰਦੋਲਨ ਦੀ ਸਭ ਤੋਂ ਵੱਡੀ ਪ੍ਰਾਪਤੀ ਰਾਸ਼ਟਰੀ ਇਕਮੁੱਠਤਾ ਨਹੀਂ?- ਸਪੋਕਸਮੈਨ
ਇਹੋ ਰਾਸ਼ਟਰੀ ਏਕਤਾ ਤਾਂ ਸਰਕਾਰ ਨੂੰ ਕਾਂਬਾ ਛੇੜ ਰਹੀ ਹੈ।  
 

11 ਜਨਵਰੀ 2021

ਰਿਲਾਇੰਸ ਨੇ ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਦਾ ਬੂਹਾ ਖੜਕਾਇਆ- ਇਕ ਖ਼ਬਰ
ਢਿੱਡ ਛਿਲ ਲਿਆ ਬੋਸਕੀ ਵਰਗਾ, ਰੋੜਾਂ ਵਾਲੀ ਕੰਧ ਟੱਪ ਕੇ।

ਚੋਰ ਸ਼ਮਸ਼ਾਨ ਘਾਟ ਦੀਆਂ ਭੱਠੀਆਂ ਹੀ ਪੁੱਟ ਕੇ ਲੈ ਗਏ- ਇਕ ਖ਼ਬਰ
ਭੁੱਖ ਨੰਗ ਦੀ ਕੋਈ ਪ੍ਰਵਾਹ ਨਾਹੀਂ, ਹੁਕਮ ਹੋਵੇ ਤਾਂ ਦੇਗਾਂ ਨੂੰ ਚੱਟੀਏ ਜੀ।

ਕਿਸਾਨਾਂ ਨਾਲ਼ ਗੱਲ ਬਾਤ ਦਾ ਨਾਟਕ ਕਰ ਰਹੀ ਹੈ ਮੋਦੀ ਸਰਕਾਰ- ਸ਼ਿਵ ਸੈਨਾ
ਪੱਲਾ ਮਾਰ ਕੇ ਬੁਝਾ ਗਈ ਦੀਵਾ, ਅੱਖ ਨਾਲ਼ ਗੱਲ ਕਰ ਗਈ।

ਹੁਣ ਕਿਸਾਨ ਅੰਦੋਲਨ ਅੰਤਰਰਾਸ਼ਟਰੀ ਮੁੱਦਾ ਬਣ ਚੁੱਕਿਐ- ਗੁਰਨਾਮ ਸਿੰਘ ਚਡੂਨੀ
ਮੈਂ ਜਾਣਾ ਜੋਗੀ ਦੇ ਨਾਲ, ਕੰਨੀਂ ਮੁੰਦਰਾਂ ਪਾ ਕੇ।

ਅਕਾਲੀ ਦਲ ਤਾਕਤ ‘ਚ ਆ ਕੇ ਮਨਰੇਗਾ ਦੇ ਹਜ਼ਾਰ ਕ੍ਰੋੜ ਦੇ ਘਪਲੇ ਦੀ ਜਾਂਚ ਕਰਵਾਏਗਾ- ਸੁਖਬੀਰ
ਸੁਪਨੇ ਮੁੰਗੇਰੀ ਲਾਲ ਦੇ, ਕੋਈ ਮੁੱਲ ਨਹੀਂ ਇਹਨਾਂ ਦਾ ਲਗਦਾ।

ਜ਼ਿੰਦਗੀ ‘ਚ ਚੁਨੌਤੀਆਂ ਦਾ ਮੁਕਾਬਲਾ ਡਟ ਕੇ ਕਰਨਾ ਹੀ ਸੱਚੀ ਜਿੱਤ- ਮੋਦੀ
ਕਿਸਾਨਾਂ ਵਲੋਂ ਦਿਤੀ ਹੋਈ ਚੁਨੌਤੀ ਬਾਰੇ ਕੀ ਖਿਆਲ ਐ ਮੋਦੀ ਸਾਬ ਜੀ।

ਕੇਂਦਰ ਵਲੋਂ ਫੰਡਾਂ ਅਤੇ ਪ੍ਰਾਜੈਕਟਾਂ ‘ਚ ਪੰਜਾਬ ਨਾਲ ਵਿਤਕਰਾ ਕੀਤਾ ਜਾਂਦੈ- ਮਨਪ੍ਰੀਤ ਬਾਦਲ
ਤੇਰਾ ਕੱਖ ਨਹੀਂ ਬਚਨੀਏਂ ਰਹਿਣਾ, ਛੜਿਆਂ ਦਾ ਹੱਕ ਮਾਰ ਕੇ।

ਏਨੀ ਜ਼ਲਾਲਤ ਮਗਰੋਂ ਭਾਜਪਾ ‘ਚ ਜਾਣ ਦਾ ਸਵਾਲ ਹੀ ਪੈਦਾ ਨਹੀਂ ਹੁੰਦਾ- ਹਰਸਿਮਰਤ ਬਾਦਲ
ਬੂਰੀ ਝੋਟੀ ਲੈ ਦੇ ਬਾਬਲਾ, ਮੈਂ ਜੇਠ ਦੀ ਲੱਸੀ ਨਹੀਂ ਪੀਣੀ।

ਕਿਸਾਨ ਅੰਦੋਲਨ ‘ਚ ਕੋਰੋਨਾ ਨੂੰ ਲੈ ਕੇ ਸੁਪਰੀਮ ਕੋਰਟ ਨੇ ਚਿੰਤਾ ਪ੍ਰਗਟਾਈ- ਇਕ ਖ਼ਬਰ
ਸੁਪਰੀਮ ਕੋਰਟ ਜੀ, ਭਾਜਪਾ ਦੀਆਂ ਚੋਣ ਰੈਲੀਆਂ ਵੇਲੇ ਕੋਰੋਨਾ ਹਾਲੀਡੇਅ ਗਿਆ ਹੁੰਦਾ।

ਟ੍ਰੈਕਟਰ ਪਰੇਡ ਦੌਰਾਨ ਨੌਜਵਾਨਾਂ ਦਾ ਉਤਸ਼ਾਹ ਦੇਖ ਕੇ ਸਰਕਾਰ ਕੰਬ ਜਾਵੇਗੀ-ਕਿਸਾਨ ਆਗੂ
ਵੀਰੇ ਆਉਣਗੇ ਸੰਧੂਰੀ ਚੀਰੇ ਬੰਨ੍ਹ ਕੇ, ਕਿਥੇ ਲੁਕੇਂਗੀ ਪਤਲੀਏ ਨਾਰੇ।

ਰਵਨੀਤ ਬਿੱਟੂ ਵਿਰੁੱਧ ਪ੍ਰਦਰਸ਼ਨ ਕਰ ਰਹੇ ਭਾਜਪਾ ਵਰਕਰਾਂ ਦੀ ਕਾਂਗਰਸੀਆਂ ਨਾਲ਼ ਝੜਪ-ਇਕ ਖ਼ਬਰ
ਕੂੰਡੇ ਭੱਜ ਗਏ, ਘੋਟਣੇ ਟੁੱਟ ਗਏ, ਤਕੀਏ ਮਲੰਗ ਲੜ ਪਏ।

ਜਿਆਣੀ ਵਰਗੇ ਭਾਜਪਾ ਆਗੂਆਂ ਨੂੰ ਕੇਂਦਰ ਸਰਕਾਰ ਵਰਤ ਰਹੀ ਐ- ਹਰਸਿਮਰਤ ਕੌਰ ਬਾਦਲ
ਬੀਬੀ ਜੀ, ਜ਼ਰਾ ਆਪਣੀ ਪੀੜ੍ਹੀ ਹੇਠ ਵੀ ਸੋਟਾ ਫੇਰੋ, ਆਪਣੀ ‘ਬ੍ਰਹਮ’ ਵਾਲੀ ਵੀਡੀਉ ਹੀ ਵੇਖ ਲਉ।

ਮੁੱਖ ਮੰਤਰੀ ਕੈਪਟਨ ਨੇ ਭਲਾਈ ਸਕੀਮਾਂ ਦਾ ਪਿਟਾਰਾ ਖੋਲ੍ਹਿਆ- ਇਕ ਖ਼ਬਰ
ਲਗਦੈ ਬਈ ਚੋਣਾਂ ਆਉਣੇ ਵਾਲੀਆਂ।

ਰਾਜੋਆਣਾ ਮਾਮਲੇ ‘ਤੇ ਸਿਆਸਤ ਕਰ ਰਿਹਾ ਹੈ ਬਾਦਲ ਅਕਾਲੀ ਦਲ- ਸੁਖਜਿੰਦਰ ਰੰਧਾਵਾ
ਹੁਣ ਅੱਕਾਂ ਤੋਂ ਭਾਲ਼ਦੀ ਡੇਲੇ, ਜੱਟਾਂ ਨੇ ਕਰੀਰ ਪੁੱਟ ਲਏ।

ਕੇਂਦਰ ਸਰਕਾਰ ਦੀ ਨੀਤੀ ਅਤੇ ਨੀਅਤ ਦੋਵੇਂ ਖੋਟੀਆਂ- ਕਿਸਾਨ ਆਗੂ
ਕੀ ਕਰਨਾ ਕੱਪੜੇ ਰੰਗਿਆਂ ਨੂੰ, ਜੇ ਮਨ ਰੰਗਿਆ ਨਾ ਜਾਵੇ।

ਅਸੀਂ ਸੁਪਰੀਮ ਕੋਰਟ ਵਲੋਂ ਬਣਾਈ ਕਮੇਟੀ ਅੱਗੇ ਪੇਸ਼ ਨਹੀਂ ਹੋਵਾਂਗੇ- ਰਾਜੇਵਾਲ
ਤੇਰੀ ਰੰਨ ਦਾ ਨਾ ਭਰਨਾ ਪਾਣੀ, ਤੇਰੀ ਨਾ ਮੁਥਾਜ ਝੱਲਣੀ।

ਪਾਕਿ ਮੰਤਰੀ ਗੁੱਲ ਰਸ਼ੀਦ ਨੇ ਦੋਸ਼ ਲਗਾਇਆ ਕਿ ਉਹਨਾਂ ਦੀ ਬਿਜਲੀ ਭਾਰਤ ਨੇ ਗੁੱਲ ਕੀਤੀ-ਇਕ ਖ਼ਬਰ
ਤਾਂ ਕੀ ਹੋ ਗਿਆ ਭਾਰਤੀ ਮੀਡੀਆ ਰੋਜ਼ ਉਹਨਾਂ ਤੇ ਕੋਈ ਨਾ ਕੋਈ ਦੋਸ਼ ਲਗਾਉਂਦਾ ਰਹਿੰਦੈ।

ਰਾਜਸੀ ਵਿਰੋਧੀਆਂ ਨੂੰ ਭਾਜਪਾ ਦੀ ਚੜ੍ਹਤ ਹਜ਼ਮ ਨਹੀਂ ਹੋ ਰਹੀ- ਵਿਨੋਦ ਗੁਪਤਾ
ਪਿਛਲੇ ਦਿਨਾਂ ‘ਚ ਚੜ੍ਹਤ ਹੋਈ ਵੀ ਬਹੁਤ ਐ, ਕਿਤੇ ਨਜ਼ਰ ਨਾ ਲੱਗ ਜਾਵੇ।

ਜਿਆਣੀ ਤੇ ਗਰੇਵਾਲ ਦੇ ਸਮਾਜਕ ਬਾਈਕਾਟ ਦਾ ਸੱਦਾ ਗ਼ੈਰ ਸੰਵਿਧਾਨਕ- ਮਿੱਤਲ
ਤੁਸੀਂ ਆਪ ਭਾਵੇਂ ਗੈਰ ਸੰਵਿਧਾਨਕ ਬਿੱਲ ਵੀ ਪਾਸ ਕਰੀ ਜਾਵੋਂ।   

05 ਜਨਵਰੀ 2021

ਨਿੰਦਣਯੋਗ ਅਤੇ ਅਣਉਚਿਤ ਵਤੀਰਾ ਅਪਣਾ ਕੇ ਭਾਜਪਾ ਮਰਯਾਦਾ ਦੀ ਹੱਦ ਪਾਰ ਨਾ ਕਰੇ- ਕਾਂਗਰਸ
ਤਾਲੋਂ ਘੁੱਥੀ ਡੂੰਮਣੀ, ਬੋਲੇ ਆਲ ਪਤਾਲ।

ਪੰਜਾਬ ਵਿਧਾਨ ਸਭਾ ਚੋਣਾਂ ਲਈ ਤਿਆਰੀਆਂ ਸ਼ੁਰੂ- ਇਕ ਖ਼ਬਰ
ਚਰਖੇ ਦੀ ਘੂਕ ਸੁਣ ਕੇ, ਜੋਗੀ ਉੱਤਰ ਪਹਾੜੋਂ ਆਏ।

ਸੁਖਬੀਰ ਵਲੋਂ ਪ੍ਰਧਾਨ ਮੰਤਰੀ ਮੋਦੀ ‘ਤੇ ਤਿੱਖੇ ਸ਼ਬਦੀ ਹਮਲੇ- ਇਕ ਖ਼ਬਰ
ਰੱਬ ਤੈਨੂੰ ਰੱਖੇ ਬੱਚਿਆ, ਨਿੱਤ ਝੂਠੀਆਂ ਗਵਾਹੀਆਂ ਦੇਵੇਂ।

ਪੰਜਾਬੀਆਂ ਨਾਲ਼ ਕੇਂਦਰ ਨੇ ਗ਼ਲਤ ਸਿੰਙ ਫ਼ਸਾਏ- ਹਾਰਦਿਕ ਪਟੇਲ
ਪੁੱਠਾ ਪੰਗਾ ਲੈ ਲਿਆ ਜੱਟੀਏ, ਬੋਕ ਦੇ ਸਿੰਙਾਂ ਨੂੰ ਹੱਥ ਲਾ ਕੇ।

ਈ.ਵੀ.ਐਮ.ਮਸ਼ੀਨ ‘ਚ ਘਪਲਾ ਕਰ ਕੇ ਮੋਦੀ ਬਣੇ ਪ੍ਰਾਈਮ ਮਨਿਸਟਰ- ਐਡਵੋਕੇਟ ਭਾਨੂੰ ਪ੍ਰਤਾਪ
ਘਰ ਬਾਰ ਲੈ ਗਈ ਲੁੱਟ ਕੇ, ਯਾਰੀ ਲਾਈ ਸੀ ਗਵਾਂਢਣ ਕਰ ਕੇ।

ਅਸੀਂ ਭਾਰਤ ਨੂੰ ਸੁਪਰ ਪਾਵਰ ਬਣਾਉਣਾ ਚਾਹੁੰਦੇ ਹਾਂ- ਰਾਜ ਨਾਥ ਸਿੰਘ
ਦਿਉ ਠੇਕਾ ਨਿੰਬੂ ਮਿਰਚੀ ਕਿਸੇ ਬਾਹਰਲੇ ਦੇਸ਼ ਤੋਂ ਮੰਗਵਾਉਣ ਦਾ।

ਸਰਕਾਰ ਕਿਸਾਨਾਂ ਦੀ ਮਜ਼ਬੂਤੀ ਲਈ ਕੰਮ ਕਰਦੀ ਰਹੇਗੀ- ਮੋਦੀ
ਯਾਨੀ ਕਿ ਕਿਸਾਨ ਦੀ ਧੌਣ ਦੁਆਲੇ ਪਾਏ ਰੱਸੇ ਨੂਂ ਵਟਾ ਚੜ੍ਹਦਾ ਰਹੇਗਾ।

ਨੋਬਲ ਇਨਾਮ ਜੇਤੂ ਅੰਮ੍ਰਤਿਆ ਸੇਨ ਵਲੋਂ ਕਿਸਾਨ ਮੋਰਚੇ ਦੀ ਹਮਾਇਤ- ਇਕ ਖ਼ਬਰ
ਲਉ ਜੀ ਅੰਮ੍ਰਤਿਆ ਸੇਨ ਵਿਚਾਰਾ ਵੀ ਗਿਆ ਸਮਝੋ ਗ਼ਦਾਰਾਂ ਦੀ ਲਿਸਟ ‘ਚ।

ਮਹਾਰਾਸ਼ਟਰ ਸਰਕਾਰ ਨੂੰ ਅਸਥਿਰ ਕਰਨ ਲਈ ਭਾਜਪਾ ਕੇਂਦਰੀ ਏਜੰਸੀਆਂ ਨੂੰ ਵਰਤ ਰਹੀ ਹੈ- ਸੰਜੇ ਰਾਊਤ
ਕੈਦ ਕਰਾ ਦਊਂਗੀ, ਮੈਂ ਡਿਪਟੀ ਦੀ ਸਾਲ਼ੀ।

ਅਕਾਲੀ ਦਲ ਨੇ ਫਤਿਹਗੜ੍ਹ ਸਾਹਿਬ ਹਿੰਸਾ ਲਈ ਕਾਂਗਰਸ ਨੂੰ ਜ਼ਿੰਮੇਵਾਰ ਠਹਿਰਾਇਆ- ਇਕ ਖ਼ਬਰ
ਡਿਗੀ ਖੋਤੇ ਤੋਂ, ਗੁੱਸਾ ਘੁਮਿਆਰ ‘ਤੇ।

ਰਾਸ਼ਟਰਪਤੀ ਕੋਵਿੰਦ ਵਲੋਂ ਇਕਜੁੱਟ ਸਮਾਜ ਦੀ ਸਿਰਜਣਾ ਦਾ ਸੱਦਾ- ਇਕ ਖ਼ਬਰ
ਦਿੱਲੀ ਬਾਰਡਰ ‘ਤੇ ਇਕਜੁੱਟ ਹੋਏ ਸਮਾਜ ਬਾਰੇ ਗੋਦੀ ਮੀਡੀਆ ਦੀ ਬਕਵਾਸ ਨੂੰ ਕੁਝ ਕਹੋਗੇ ਜਨਾਬ?

ਕੜਾਕੇ ਦੀ ਠੰਢ ਵਿਚ ਵੀ ਅੰਦੋਲਨਕਾਰੀ ਕਿਸਾਨਾਂ ਦੇ ਹੌਸਲੇ ਬੁਲੰਦ- ਇਕ ਖ਼ਬਰ
ਕਾਦਰਯਾਰ ਕੀ ਸਿੱਧਾਂ ਦੀ ਸਿਫ਼ਤ ਕਰੀਏ, ਬਣ ਬੈਠੇ ਨੇ ਕਈ ਜਮਾਇਤਾਂ ਦੇ।

‘ਖਾਲਸਾ ਏਡ’ ਮਨੂੰਵਾਦੀ ਮੀਡੀਆਂ ਦੇ ਨਿਸ਼ਾਨੇ ‘ਤੇ ਕਿਉਂ?-ਇਕ ਸਵਾਲ
ਕਿਉਂਕਿ ਚੋਰਾਂ ਨੂੰ ਸਭ ਚੋਰ ਹੀ ਨਜ਼ਰ ਆਉਂਦੇ ਹਨ।

ਅਕਾਲੀ ਦਲ ਬਾਦਲ ਵਲੋਂ ਐਸ.ਸੀ. ਵਿੰਗ ਦੇ ਇਕ ਡੇਰਾ ਪ੍ਰੇਮੀ ਨੂੰ ਜ਼ਿਲ੍ਹਾ ਪ੍ਰਧਾਨ ਲਾਉਣ ‘ਤੇ ਵਿਵਾਦ- ਇਕ ਖ਼ਬਰ
ਮਿੱਤਰਾਂ ਦੇ ਤਿੱਤਰਾਂ ਨੂੰ, ਨੀਂ ਮੈਂ ਤਲੀਆਂ ‘ਤੇ ਚੋਗ ਚੁਗਾਵਾਂ।

ਬੇਅਦਬੀ ਅਤੇ ਗੋਲੀ ਕਾਂਡ ਦੇ ਪੀੜਤਾਂ ਨੂੰ ਸਾਲ 2020 ਵਿਚ ਵੀ ਇਨਸਾਫ਼ ਨਹੀਂ ਮਿਲਿਆ- ਇਕ ਖ਼ਬਰ
ਅੰਬ ਲਗਦੇ ਨਹੀਂ ਕਿੱਕਰਾਂ ਬੇਰੀਆਂ ਨੂੰ, ਮਾਸ ਮਿਲਦਾ ਨਹੀਂ ਇੱਲ ਦੇ ਆਲ੍ਹਣੇ ‘ਚੋਂ।

ਭਾਜਪਾ ਦੇ ਸੱਤਾ ਦੇ ਸੁਪਨਿਆਂ ‘ਚ ਅੜਿੱਕਾ ਬਣੇ ਖੇਤੀ ਕਾਨੂੰਨ-ਇਕ ਖ਼ਬਰ
ਨ੍ਹਾਤੀ ਧੋਤੀ ਰਹਿ ਗਈ, ਉੱਤੇ ਮੱਖੀ ਬਹਿ ਗਈ।

27 Dec. 2020

ਸੂਬੇ ਦੀ ਸਿਆਸੀ ਫਿਜ਼ਾ ਇਸ ਵਾਰ ਪੂਰੀ ਤਰ੍ਹਾਂ ਬਦਲਣ ਜਾ ਰਹੀ ਹੈ- ਰਵਨੀਤ ਬਿੱਟੂ
ਸੁੱਚਿਆਂ ਰੁਮਾਲਾਂ ਨੂੰ, ਲਾ ਦੇ ਧੰਨ ਕੁਰੇ ਗੋਟਾ।

ਮੋਦੀ ਸਰਕਾਰ ਨੇ ਗੱਲਬਾਤ ਦੇ ਸਾਰੇ ਬੂਹੇ ਕੀਤੇ ਬੰਦ-ਇਕ ਖ਼ਬਰ
ਉਜੜੀਆਂ ਭਰਜਾਈਆਂ, ਵਲੀ ਜਿਹਨਾਂ ਦੇ ਜੇਠ।

ਦੇਸ਼ ਨੂੰ ਗੁਮਰਾਹ ਕਰਨ ਵਾਲਾ ਪ੍ਰਧਾਨ ਮੰਤਰੀ ਕਿਸਾਨਾਂ ਨੂੰ ਗੁਮਰਾਹ ਦੱਸ ਰਿਹਾ ਹੈ- ਸਰਵਣ ਸਿੰਘ ਪੰਧੇਰ
ਜੇਠ ਦੇ ਬੁਰੇ ਦਿਨ ਆਏ, ਕਿੱਕਰਾਂ ਨੂੰ ਪਾਵੇ ਜੱਫੀਆਂ।

ਕਾਂਗਰਸ ਦਾ ਦੋਗਲਾ ਚਿਹਰਾ ਇਕ ਵਾਰ ਫੇਰ ਬੇਨਕਾਬ- ਡਾ. ਦਲਜੀਤ ਸਿੰਘ ਚੀਮਾ
ਡਾ. ਸਾਹਿਬ ਕਦੇ ਆਪਣਾ ਚਿਹਰਾ ਵੀ ਸ਼ੀਸ਼ੇ ‘ਚ ਦੇਖੋ, ਬ੍ਰਹਮ (ਭਰਮ) ‘ਚ ਨਾ ਰਿਹਾ ਕਰੋ।

ਆਰ.ਜੇ.ਡੀ. ਨੇ ਨਿਤੀਸ਼ ਨੂੰ ਭਾਜਪਾ ਨਾਲੋਂ ਸਬੰਧ ਤੋੜਨ ਦੀ ਦਿੱਤੀ ਚੁਣੌਤੀ- ਇਕ ਖ਼ਬਰ
ਵੇ ਘਰ ਤੇਲਣ ਦੇ, ਤੇਰਾ ਚਾਦਰਾ ਖੜਕੇ।

ਕੇਜਰੀਵਾਲ ਸ਼ਿਸ਼ਟਾਚਾਰ ਦੀਆਂ ਹੱਦਾਂ ਨਾ ਪਾਰ ਕਰੇ- ਕੈਪਟਨ
ਪਰ੍ਹੇ ਵਿਚ ਕੈਦੋ ਨੇ ਮਗ ਮਾਰੀ, ਲੋਕੋ ਵੇਖ ਲਉ ਗੱਲਾਂ ਅੱਲ ਵਲੱਲੀਆਂ ਜੀ।

ਭਾਰਤ ਨਾਲੋਂ ਬੰਗਲਾ ਦੇਸ਼ ਅਤੇ ਨੇਪਾਲ ਦੇ ਆਰਥਕ ਹਾਲਾਤ ਚੰਗੇ- ਇਕ ਖ਼ਬਰ
ਕਿਹੜੇ ਯਾਰ ਦਾ ਗੁਤਾਵਾ ਕੀਤਾ, ਅੱਖ ਵਿਚ ਕੱਖ ਪੈ ਗਿਆ।

ਕੌਮੀ ਏਕਤਾ ਦੇ ਰੰਗ ‘ਚ ਰੰਗੇ ਜਾਣ ਲੱਗੇ ਕਿਸਾਨ ਮੋਰਚੇ- ਇਕ ਖ਼ਬਰ
ਮਿੱਠੇ ਯਾਰਾਂ ਦੇ ਬਰੋਬਰ ਬਹਿ ਕੇ, ਮਿੱਠੇ ਮਿੱਠੇ ਬੇਰ ਚੁਗੀਏ।

ਕੇਜਰੀਵਾਲ, ਭਗਵੰਤ ਮਾਨ, ਹਰਪਾਲ ਚੀਮਾ ਤੇ ਸੁਖਬੀਰ ਬਾਦਲ ਦੋਗਲੇ ਤੇ ਝੂਠੇ ਸਿਆਸਤਦਾਨ- ਕੈਪਟਨ
ਪੰਜਾਬ ‘ਚ ਇਕੋ ਹੀ ਧਰਮ ਪੁੱਤਰ ਐ, ਬੁੱਝੋ ਭਲਾ ਉਹ ਕੌਣ ਐ?

ਕੜਾਕੇ ਦੀ ਠੰਡ ‘ਚ ਬੈਠੇ ਕਿਸਾਨਾਂ ਨਾਲ਼ ਸਰਕਾਰ ਖੇਡਾਂ ਖੇਡਣ ਲੱਗੀ- ਇਕ ਖ਼ਬਰ
ਮੂੰਹ ਉਂਗਲਾਂ ਘੱਤ ਕੇ ਕਹਿਣ ਸੱਭੇ, ਕਾਰੇ ਕਰਨ ਥੀਂ ਇਹ ਨਾ ਸੰਗਦਾ ਏ।

ਦਿਹਾਤੀ ਵਿਕਾਸ ਫੰਡ ਜਾਰੀ ਕਰਨ ‘ਚ ਕੇਂਦਰ ਦੀ ਟਾਲ ਮਟੋਲ- ਇਕ ਖ਼ਬਰ
ਤੇਰਾ ਕੱਖ ਨਹੀਂ ਬਚਨੀਏਂ ਰਹਿਣਾ, ਛੜਿਆਂ ਦਾ ਹੱਕ ਮਾਰ ਕੇ।

ਕਿਸਾਨੀ ਅੰਦੋਲਨ ਸਬੰਧੀ ਵਿਦੇਸ਼ੀ ਆਗੂਆਂ ਦੀਆਂ ਟਿੱਪਣੀਆਂ ਗੁਮਰਾਹਕੁਨ ਜਾਣਕਾਰੀ ‘ਤੇ ਆਧਾਰਿਤ-ਭਾਰਤ
ਜੱਗ ਜ਼ਾਹਰ ਤੇਰੀਆਂ ਕਰਤੂਤਾਂ, ਸਫ਼ਾਈਆਂ ਕਿੱਥੇ ਕਿੱਥੇ ਦੇਵੇਂਗੀ ਦਿੱਲੀਏ।
    
ਪੰਜਾਬ ਵਿਚ ਭਾਜਪਾ ਆਗੂਆਂ ਦਾ ਤਿੱਖਾ ਵਿਰੋਧ- ਇਕ ਖਬਰ
ਬਹਿਣ ਨਹੀਂ ਦਿੰਦੇ ਦਿੱਲੀ ਵਾਲ਼ੇ ਸਾਨੂੰ, ਪਿੰਡਾਂ ‘ਚੋਂ ਪਦੀੜਾਂ ਪੈਂਦੀਆਂ।

21 Dec. 2020

ਭਾਜਪਾ ਸਰਕਾਰ ਕਿਸਾਨਾਂ ਨਾਲ਼ ਕਈ ਵਾਰ ਵਾਅਦੇ ਕਰ ਕੇ ਮੁਕਰੀ-ਅਰਥ ਸ਼ਾਸਤਰੀ ਸਾਈਂ ਨਾਥ
ਮੇਰੇ ਨਰਮ ਕਾਲ਼ਜੇ ਲੜ ਗਏ, ਲੱਡੂ ਖਾ ਲਏ ਤੇਰੇ ਤੇਲ ਦੇ।

ਖੇਤੀ ਕਾਨੂੰਨਾਂ ਦੇ ‘ਫਾਇਦੇ’ ਗਿਣਾਉਣ ਲਈ ਹੰਸ ਦੀ ਦਿੱਲੀ ਨੇੜਲੇ ਪਿੰਡਾਂ ‘ਚ ਉਡਾਰੀ- ਇਕ ਖ਼ਬਰ
ਸਿੱਲ੍ਹੀ ਸਿੱਲ੍ਹੀ ਆਉਂਦੀ ਏ ਹਵਾ, ਕਸੀਦੇ ਝੂਠ ਦੇ ਕੋਈ ਗਾਉਂਦਾ ਹੋਵੇਗਾ।

ਦਿੱਲੀ ‘ਚ ਕਿਸਾਨ ਨਹੀਂ ਖਾਲਿਸਤਾਨ ਵਾਲੇ ਬੈਠੇ ਹਨ- ਭਾਜਪਾ ਵਿਧਾਇਕ ਲੀਲਾ ਰਾਮ
ਲੀਲਾ ਰਾਮਾ ਇਕ ਵਾਰੀ ਦਿੱਲੀ ਦੇ ਬਾਰਡਰਾਂ ‘ਤੇ ਪ੍ਰਭੂ ਦੀ ਲੀਲ੍ਹਾ ਵਰਤਦੀ ਦੇਖ ਆਉਂਦਾ।

ਸੰਸਦ ਦਾ ਸਰਦ ਰੁੱਤ ਦਾ ਸੈਸ਼ਨ ਕੈਂਸਲ ਕਰਨ ਦੀ ਹਰਸਿਮਰਤ ਵਲੋਂ ਨਿਖੇਧੀ- ਇਕ ਖ਼ਬਰ
ਜੇ ਸੈਸ਼ਨ ਹੁੰਦਾ ਬੀਬੀ ਫੇਰ ਵੀ ਤੂੰ ਇਹੀ ਕਹਿਣਾ ਸੀ ਕਿ ਕਿਸਾਨਾਂ ਨੂੰ ‘ਬ੍ਰਹਮ’ ਹੈ।

ਕੈਨੇਡਾ ਦੇ ਸਮਰਥਨ ਕਰ ਕੇ ਪ੍ਰਦਰਸ਼ਨਕਾਰੀ ਕਿਸਾਨਾਂ ਦਾ ਰੁਖ਼ ਹੋਇਆ ਸਖ਼ਤ- ਇਕ ਖ਼ਬਰ
ਮੁੰਡਾ ਮੈਨੂੰ ਵੇਖ ਲੈਣ ਦੇ, ਨੀਂ ਆਹ ਫੜ ਮਾਏਂ ਪੂਣੀਆਂ।

ਛਾਪਿਆਂ ਦੇ ਬਾਵਜੂਦ ਆੜ੍ਹਤੀਏ ਕਿਸਾਨ ਅੰਦੋਲਨ ਦੀ ਹਮਾਇਤ ਜਾਰੀ ਰੱਖਣਗੇ- ਰਵਿੰਦਰ ਸਿੰਘ ਚੀਮਾ
ਤੇਰੀ ਰੰਨ ਦਾ ਨਾ ਭਰਨਾ ਪਾਣੀ, ਤੇਰੀ ਨਾ ਮੁਥਾਜ ਝੱਲਣੀ।

ਅਕਾਲੀ ਦਲ ਨੇ ਭਾਜਪਾ ਦੀ ਪਿੱਠ ‘ਚ ਛੁਰਾ ਮਾਰਿਆ- ਸ਼ਵੇਤ ਮਲਿਕ
ਲਾਉਣੀ ਜੇ ਕਮਲ਼ੀਏ, ਨਿਭਾਉਣੀ ਕਿਉਂ ਨਾ ਸਿੱਖੀ।

ਐਮ.ਐਸ.ਪੀ. ਖਤਮ ਹੋਈ ਤਾਂ ਮੈਂ ਰਾਜਨੀਤੀ ਛੱਡ ਦਿਆਂਗਾ- ਖੱਟੜ
ਖੱਟੜ ਜੀ ਤੁਸੀਂ ਤਾਂ ਪਹਿਲਾਂ ਹੀ ਰਾਜਨੀਤਕ ਨਹੀਂ ਹੋ, ਮਹਿਜ਼ ਆਰ.ਐਸ.ਐਸ. ਦੇ ਪ੍ਰਚਾਰਕ ਹੋ।

ਜਿਹੋ ਜਿਹੇ ਲੋਕਾਂ ਦੀ ਸਰਕਾਰ, ਉਹੋ ਜਿਹੀਆਂ ਨੀਤੀਆਂ- ਆਰ. ਐਸ. ਘੁੰਮਣ
ਜਿਹੋ ਜਿਹੀ ਕੋਕੋ, ਉਹੋ ਜਿਹੇ ਬੱਚੇ।

ਇਲੈਕਟੋਰਲ ਕਾਲੇਜ ਨੇ ਬਾਇਡਨ ਦੀ ਜਿੱਤ ‘ਤੇ ਲਗਾਈ ਮੋਹਰ- ਇਕ ਖ਼ਬਰ
ਅਬ ਤੇਰਾ ਕਿਆ ਹੋਗਾ ਕਾਲੀਆ ?

ਦੋ ਔਰਤਾਂ 20 ਪੇਟੀਆਂ ਨਾਜਾਇਜ਼ ਸ਼ਰਾਬ ਸਮੇਤ ਗ੍ਰਿਫ਼ਤਾਰ- ਇਕ ਖ਼ਬਰ
ਮਰਦਾਂ ਤੋਂ ਕਿਹੜੀ ਗੱਲੇ ਘੱਟ ਅਸੀਂ, ਸਾਡੇ ਹੱਕ ਵੀ ਬਰਾਬਰ ਨੇ।

ਪੰਜਾਬ ਵਿਚੋਂ ਧੜਾ ਧੜ ਭਾਜਪਾ ਆਗੂਆਂ ਦੇ ਅਸਤੀਫ਼ੇ ਆਉਣ ਲੱਗੇ- ਇਕ ਖ਼ਬਰ
ਡਰਿਓ ਲੋਕੋ ਡਰਿਓ ਵੇ, ਲੰਬੜਾਂ ਦੀ ਸੇਪ ਨਾ ਕਰਿਓ ਵੇ।

ਕੇਜਰੀਵਾਲ ਕਾਨੂੰਨਾਂ ਦੀਆਂ ਕਾਪੀਆਂ ਸਾੜ ਕੇ ਕਿਸਾਨਾਂ ਨੂੰ ਮੂਰਖ ਨਹੀਂ ਬਣਾ ਸਕਦਾ- ਹਰਸਿਮਰਤ
ਤੇ ਬੀਬੀ ਜੀ ਤੁਸੀਂ ਵੀ ਹੁਣ ਲੋਕਾਂ ਨੂੰ ਹੋਰ ਮੂਰਖ ਨਹੀਂ ਬਣਾ ਸਕਦੇ।

ਭਾਜਪਾ ਵਰਗੀ ਲੋਕ ਵਿਰੋਧੀ ਸਰਕਾਰ ਅੱਜ ਤੱਕ ਨਹੀਂ ਆਈ- ਅਖਿਲੇਸ਼ ਯਾਦਵ
ਕਾਦਰਯਾਰ ਅਣਹੋਣੀਆਂ ਕਰਨ ਜੇਹੜੇ, ਆਖਰਵਾਰ ਉਹਨਾਂ ਪੱਛੋਤਾਵਣਾ ਜੀ।

ਸੱਤਾ ਤੋਂ ਬਾਹਰ ਹੋ ਕੇ ਹੀ ਬਾਦਲਾਂ ਨੂੰ ਪੰਥ, ਪੰਜਾਬ ਤੇ ਕਿਸਾਨ ਚੇਤੇ ਆਉਂਦੇ ਹਨ- ‘ਆਪ’ ਪਾਰਟੀ
ਨਹੀਂ ਪੰਥ ਦੇ ਵਲ ਧਿਆਨ ਤੇਰਾ, ਮਤਲਬ ਆਪਣੇ ਦਾ ਨਿਰਾ ਯਾਰ ਏਂ ਤੂੰ।

ਕਿਸਾਨ ਅੰਦੋਲਨ ਵਿਚੋਂ ਸਿਆਸੀ ਜ਼ਮੀਨ ਲੱਭ ਰਿਹਾ ਹੈ ਬਾਦਲ ਪਰਵਾਰ- ਬਡਹੇੜੀ
ਉਹ ਮਾਂ ਮਰ ਗਈ ਜਿਹੜੀ ਦਹੀਂ ਨਾਲ਼ ਟੁੱਕ ਦਿੰਦੀ ਸੀ।

14 Dec. 2020

ਭਾਜਪਾ ਸਰਕਾਰ ਦੀਆਂ ਫੁੱਟਪਾਊ ਤੇ ਭੜਕਾਊ ਚਾਲਾਂ ਨੂੰ ਪਛਾੜਨ ਦਾ ਸੱਦਾ- ਉਗਰਾਹਾਂ ਜਥੇਬੰਦੀ
ਜਾਣਾ ਦਰਬਾਰ ਮੈਂ ਦਲੀਲਾਂ ਧਾਰੀਆਂ, ਦੱਸਦਾਂ ਹਕੀਕਤਾਂ ਤਮਾਮ ਸਾਰੀਆਂ।

ਸ਼ਰਦ ਪਵਾਰ ਤੋਂ ਪੀ.ਐਮ. ਬਣਨ ਦੇ ਮੌਕੇ ਖੁੱਸਣ ਦਾ ਮੁੱਦਾ ਬਣਿਆ ਚਰਚਾ ਦਾ ਵਿਸ਼ਾ- ਇਕ ਖ਼ਬਰ
ਅਬ ਪਛਤਾਏ ਕਿਆ ਹੋਤ, ਜਬ ਚਿੜੀਆਂ ਚੁਗ ਗਈ ਖੇਤ।

ਇਕ ਲੱਖ ਕਿਸਾਨਾਂ ਦਾ ਹੋਰ ਜਥਾ ਦਿੱਲੀ ਪਹੁੰਚਿਆ ਧਰਨੇ ‘ਤੇ- ਇਕ ਖ਼ਬਰ
ਚਲ ਚੱਲੀਏ ਅਠੌਲੇ ਵਾਲੇ ਮੇਲੇ, ਹੋਰ ਛੱਡ ਦੇ ਸਭ ਝਮੇਲੇ।

ਹਰਿਆਣਾ ਸਰਕਾਰ ਨੇ ਕਿਸਾਨਾਂ ਦੇ ਰਾਹ ‘ਚ ਮੁੜ ਅਟਕਾਏ ਪੱਥਰ- ਇਕ ਖ਼ਬਰ
ਲਾਮ ਲੱਦ ਅਸਬਾਬ ਸਭ ਸਾਧ ਚੱਲੇ, ਚੜ੍ਹੇ ਪਰਬਤਾਂ ਦੇ ਉੱਪਰ ਜਾ ਭਾਈ।

ਅੱਖ ‘ਤੇ ਰਬੜ ਦੀ ਬੁਲੇਟ ਵੱਜਣ ਦੇ ਬਾਵਜੂਦ ਨਿਹੰਗ ਸਿੰਘ ਸ਼ੇਰ ਵਾਂਗ ਗਰਜਿਆ- ਇਕ ਖ਼ਬਰ
ਜੱਗਾ ਵੱਢਿਆ ਬੋਹੜ ਦੀ ਛਾਵੇਂ, ਨੌਂ ਮਣ ਰੇਤ ਭਿੱਜ ਗਈ।

ਮੋਦੀ ਨੂੰ ਕੁਰਸੀ ‘ਤੇ ਬਿਠਾਉਣ ਵਾਲੇ ਲੋਕ ਉਤਾਰਨਾ ਵੀ ਜਾਣਦੇ ਹਨ- ਭਾਈ ਬਡਾਲਾ
ਵਕਤੋਂ ਮੈਂ ਖੁੰਝ ਗਈ, ਘੜਾ ਦੇਖ ਨਾ ਲਿਆ ਟੁਣਕਾ ਕੇ।

ਵਿਆਹ ਦੇ ਦੂਜੇ ਦਿਨ ਹੀ ਵਿਆਹੁਤਾ ਨਕਦੀ ਅਤੇ ਗਹਿਣੇ ਲੈ ਕੇ ਹੋ ਗਈ ਫੁਰਰ..-ਇਕ ਖ਼ਬਰ
ਲੁੱਟ ਕੇ ਲੈ ਗਈ, ਪੱਟ ਕੇ ਲੈ ਗਈ...............................

ਬੇਅਦਬੀ ਕਾਂਡ: ਸੱਤਾ ਤਬਦੀਲੀ ਦੇ ਬਾਅਦ ਵੀ ਕਿਉਂ ਨਹੀਂ ਮਿਲ ਰਿਹਾ ਇਨਸਾਫ਼- ਸੁਖਰਾਜ ਸਿੰਘ
ਸੁਖਰਾਜ ਸਿਆਂ ਚਾਚਾ ਭਤੀਜੇ ਦੇ ਖਿਲਾਫ਼ ਕਿਵੇਂ ਜਾ ਸਕਦੈ!

ਪੰਜਾਬ ਤੇ ਹਰਿਆਣਾ ਦੇ ਸਕੇ ਭਰਾਵਾਂ ਵਾਲੇ ਰਿਸ਼ਤੇ ਉਸਰਨ ‘ਤੇ ਸਾਨੂੰ ਮਾਣ- ਰਾਮੂਵਾਲੀਆ, ਅਖਿਲੇਸ਼
ਰੰਡੀਆਂ ਤਾਂ ਰੰਡ ਕੱਟਦੀਆਂ ਪਰ ਮੁਸ਼ਟੰਡੇ ਨਹੀਂ ਕੱਟਣ ਦਿੰਦੇ।

ਮੋਦੀ ਨੇ ਸਿਆਸੀ ਖੇਤਰ ਦੀ ਨੁਹਾਰ ਬਦਲੀ-ਨਕਵੀ
ਮੇਰੇ ਨਰਮ ਕਾਲ਼ਜੇ ਲੜ ਗਏ, ਲੱਡੂ ਖਾ ਲਏ ਤੇਰੇ ਤੇਲ ਦੇ।

ਮੈਂ ਆਪਣੀ ਪਾਰਟੀ ਤੇ ਕਿਸਾਨਾਂ ਨਾਲ਼ ਖੜ੍ਹਾ ਹਾਂ- ਸੰਨੀ ਦਿਓਲ
ਅੱਧੀ ਤੇਰੀ ਆਂ ਮੁਲਾਹਜ਼ੇਦਾਰਾ, ਅੱਧੀ ਆਂ ਗ਼ਰੀਬ ਜੱਟ ਦੀ।

ਖੇਤੀ ਬਿੱਲ ਰੱਦ ਕਰਨ ਲਈ ਬਾਦਲ ਨੇ ਮੋਦੀ ਨੂੰ ਲਿਖਿਆ ਪੱਤਰ- ਇਕ ਖ਼ਬਰ
ਹੁਣ ਅੱਕਾਂ ਤੋਂ ਭਾਲ਼ਦੀ ਡੇਲੇ, ਜੱਟਾਂ ਨੇ ਕਰੀਰ ਪੁੱਟ ਲਏ।

ਦਮਦਮੀ ਟਕਸਾਲ ਵਲੋਂ ਕਿਸਾਨ ਸੰਘਰਸ਼ ਬਾਰੇ ਚੁੱਪੀ ਸਾਧਣਾ ਅਤੀ ਮੰਦਭਾਗਾ- ਤੁੰਗ, ਤਾਲਿਬਪੁਰਾ
ਕਿਹੜੇ ਯਾਰ ਦਾ ਗੁਤਾਵਾ ਕੀਤਾ, ਅੱਖ ਵਿਚ ਕੱਖ ਪੈ ਗਿਆ।

ਜਦੋਂ ਸਸਤੀ ਅੰਗੇਜ਼ਮੈਂਟ ਰਿੰਗ ਪੁਆਉਣ ਤੋਂ ਮੰਗੇਤਰ ਲੜਕੀ ਨੇ ਕਰ ਦਿੱਤਾ ਇਨਕਾਰ- ਇਕ ਖ਼ਬਰ
ਲੌਂਗ ਘੜਾ ਦਊਂਗਾ, ਗੁੱਸਾ ਛੱਡ ਮੁਟਿਆਰੇ।

ਕਿਸਾਨ ਅੰਦੋਲਨ ਦਾ ਹਰਿਆਣਾ ਸਰਕਾਰ ‘ਤੇ ਕੋਈ ਅਸਰ ਨਹੀਂ- ਸਿੱਖਿਆ ਮੰਤਰੀ ਹਰਿਆਣਾ
ਬੇਸ਼ਰਮ ਦੇ ਢੂ.. ‘ਤੇ ਦਰਖ਼ਤ ਉੱਗਿਆ ਕਹਿੰਦਾ ਛਾਵੇਂ ਬੈਠਾਂਗੇ।

08 Dec. 2020

ਅਕਾਲੀ ਦਲ ਦੀ ਸਹਿਮਤੀ ਨਾਲ ਪਾਸ ਹੋਏ ਖੇਤੀ ਕਾਨੂੰਨ-ਜਾਖੜ
ਜਾਖੜ ਸਾਬ, ਕੈਪਟਨ ਤੇ ਮਨਪ੍ਰੀਤ ਸਿੰਘ ਬਾਦਲ ਵੀ ਮੀਟਿੰਗਾਂ ‘ਚ ਜਾਂਦੇ ਰਹੇ ਐ।

ਪੰਜਾਬੀ ਹੋਣ ਦਾ ਫ਼ਰਜ਼ ਨਿਭਾਉਣ ਪੰਜਾਬ ਦੇ ਭਾਜਪਾ ਨੇਤਾ-ਅਮਨ ਅਰੋੜਾ
ਪੁੱਤਰਾ ਬੰਤੀ ਦਿਆ, ਕਦੇ ਪਿੰਡ ਵਲ ਫੇਰਾ ਪਾ ।

ਹਰਿਆਣਾ ਦੇ ਕਿਸਾਨ ਐਸ.ਵਾਈ.ਐੱਲ. ਨਹਿਰ ਦੀ ਉਸਾਰੀ ਦਾ ਮੁੱਦਾ ਵੀ ਨਾਲ਼ ਜੋੜਨ- ਖੇਤੀ ਮੰਤਰੀ ਦਲਾਲ
ਵਿਆਹ ‘ਚ ਬੀਅ ਦਾ ਲੇਖਾ, ਬੱਲੇ ਬਈ ਦਲਾਲ ਜੀ।

ਮੋਗਾ ਦੇ ਐੱਸ.ਐੱਸ.ਪੀ.ਨੇ ਸਿਆਸੀ ਬਦਲੀਆਂ ਵਿਰੁੱਧ ਚੁੱਕਿਆ ਝੰਡਾ- ਇਕ ਖ਼ਬਰ
ਸੁਤੀ ਹੋਈ ਸੋਨ ਚਿੜੀ, ਲੈਣ ਲੱਗੀ ਅੰਗੜਾਈਆਂ।

ਕਿਸਾਨੀ ਮੋਰਚੇ ‘ਚ ਹੋ ਸਕਦੀ ਹੈ ਘੁਸਪੈਠ- ਜਥੇਦਾਰ ਅਕਾਲ ਤਖ਼ਤ
ਖ਼ਬਰਦਾਰ ਰਹਿਣਾ ਬਈ ਚੌਂਕੀ ਜ਼ਾਲਮਾਂ ਦੀ ਆਈ।

ਈ.ਡੀ. ਜਾਂ ਹੋਰ ਕਿਸੇ ਤੋਂ ਮੈ ਨਹੀਂ ਡਰਦਾ- ਕੈਪਟਨ
ਅਮਿਤ ਸ਼ਾਹ ਨਾਲ ਮੁਲਾਕਾਤ ਤੋਂ ਬਾਅਦ ਮਾਰੀ ਬੜ੍ਹਕ ਦਾ ਕੀ ਰਾਜ਼ ਐ ਕੈਪਟਨ ਸਾਬ੍ਹ ?

ਦਿੱਲੀ ‘ਚ 10 ਦਸੰਬਰ ਨੂੰ ਨਵੇਂ ਸੰਸਦ ਭਵਨ ਦਾ ਭੂਮੀ ਪੂਜਨ ਕਰਨਗੇ ਮੋਦੀ- ਇਕ ਖ਼ਬਰ
ਰੋਮ ਸੜ ਰਿਹੈ.................................

ਕਿਸਾਨ ਮੋਰਚਾ ਜ਼ਮੀਨ ਦਾ ਹੀ ਨਹੀਂ ਜ਼ਮੀਰਾਂ ਦਾ ਮੋਰਚਾ ਹੈ ਇਹ- ਗੁਰਪ੍ਰੀਤ ਘੁੱਗੀ
ਬਾਬਲ ਧਰਮੀ ਦੀ, ਕੁਲ ਨੂੰ ਦਾਗ਼ ਨਾ ਲਾਈਏ।

ਕੈਨੇਡਾ ਸ਼ਾਂਤੀਪੂਰਨ ਪ੍ਰਦਰਸ਼ਨਾਂ ਦੇ ਅਧਿਕਾਰ ਦਾ ਹਮੇਸ਼ਾ ਸਮਰਥਨ ਕਰੇਗਾ- ਟਰੂਡੋ
ਮੈਨੂੰ ਵੇਖ ਲੈਣ ਦੇ ਮੁੰਡਾ, ਨੀ ਆਹ ਫੜ ਮਾਏਂ ਪੂਣੀਆਂ।

ਕਿਸਾਨ ਅੰਦੋਲਨ ਚਲਦੇ ਖੱਟਰ ਸਰਕਾਰ ਵੀ ਖ਼ਤਰੇ ‘ਚ- ਇਕ ਖ਼ਬਰ
ਨੱਚਾਂ ਮੈਂ ਲੁਧਿਆਣੇ, ਮੇਰੀ ਧਮਕ ਜਲੰਧਰ ਪੈਂਦੀ।

ਕਿਸਾਨਾਂ ਨੂੰ ਖ਼ਾਲਿਸਤਾਨੀ ਕਹਿਣ ਵਾਲ਼ੇ ਮੁਆਫ਼ੀ ਮੰਗਣ- ਲਕਸ਼ਮੀ ਕਾਂਤਾ ਚਾਵਲਾ
ਇਹਨਾਂ ਸੁਹਣਿਆਂ ਮੂੰਹਾਂ ‘ਤੇ ਖ਼ਾਕ ਪੈਣੀ, ਕੁੰਡੇ ਲੱਗਣੇ ਅੰਤ ਹਵੇਲੀਆਂ ਨੂੰ।

ਕੇਂਦਰ ਸਰਕਾਰ ਵਿਰੁੱਧ ਜਿੱਤ ਵਾਲ਼ਾ ਹਾਥੀ ਤਾਂ ਲੰਘ ਗਿਆ ਸਿਰਫ਼ ਪੂਛ ਬਾਕੀ ਹੈ- ਕਿਸਾਨ ਆਗੂ
ਗੂੰਜੇ ਚਰਖ਼ਾ ਬਿਸ਼ਨੀਏ ਤੇਰਾ, ਲੋਕਾਂ ਭਾਣੇ ਮੋਰ ਬੋਲਦਾ।

ਕਿਸਾਨਾਂ ਦੀ ਬਦੌਲਤ ਹੀ ਮੈਂ ਸਭ ਕੁਝ ਹਾਂ- ਪ੍ਰਕਾਸ਼ ਸਿੰਘ ਬਾਦਲ
ਬਿਲਕੁਲ ਠੀਕ, ਕਿਸਾਨਾਂ ਨੂੰ ਵੇਚ ਕੇ ਹੀ ਸਭ ਕੁਝ ਬਣਾਇਆ।

ਮਾਲੇਗਾਉਂ ਧਮਾਕਾ ਕੇਸ: ਵਿਸ਼ੇਸ਼ ਅਦਾਲਤ ‘ਚ ਪੇਸ਼ ਨਹੀਂ ਹੋਈ ਪ੍ਰੱਗਿਆ ਸਿੰਘ ਠਾਕੁਰ-ਇਕ ਖ਼ਬਰ
ਮੈਂ ਡਿਪਟੀ ਦੀ ਸਾਲ਼ੀ, ਕੈਦ ਕਰਾ ਦਊਂਗੀ।
ਖੇਤੀ ਕਾਨੂੰਨ ਵਾਪਸ ਨਾ ਹੋਏ ਤਾਂ ਦੇਸ਼ ਭਰ ’ਚ ਪ੍ਰਦਰਸ਼ਨ ਕਰਾਂਗੇ- ਮਮਤਾ ਬੈਨਰਜੀ
ਮੈਨੂੰ ਨਰਮ ਕੁੜੀ ਨਾ ਜਾਣੀ, ਲੜਜੂੰ ਭਰਿੰਡ ਬਣ ਕੇ।