19 ਦਸੰਬਰ 2022

ਭਵਿੱਖ ‘ਚ ਅਕਾਲੀ ਦਲ ਨਾਲ ਭਾਜਪਾ ਦੇ ਗੱਠਜੋੜ ਦਾ ਸਵਾਲ ਹੀ ਨਹੀਂ-ਵਿਜੈ ਰੂਪਾਨੀ

ਤੇਰੀ ਮੇਰੀ, ਤੇਰੀ ਮੇਰੀ ਨਹੀਂ ਨਿਭਣੀ, ਮੈਂ ਪਤਲੀ ਤੂੰ ਭਾਰਾ।

ਭਰੇ ਬਾਜ਼ਾਰ ‘ਚ ਸ਼ਰੇਆਮ ਲੁਟੇਰਿਆਂ ਨੇ ਮੰਗਤੇ ਤੋਂ 300 ਰੁਪਏ ਲੁੱਟ ਲਏ- ਇਕ ਖ਼ਬਰ

ਭੁੱਖ ਨੰਗ ਦੀ ਏਥੇ ਪ੍ਰਵਾਹ ਨਾਹੀਂ, ਹੁਕਮ ਹੋਵੇ ਤਾਂ ਦੇਗ਼ਾਂ ਨੂੰ ਚੱਟੀਏ ਜੀ।

ਘਟੀਆ ਸੜਕ ਮਾਮਲਾ: ਨਾ ਠੇਕਾ ਰੱਦ ਹੋਇਆ ਤੇ ਨਾ ਕਿਸੇ ਅਧਿਕਾਰੀ ਖ਼ਿਲਾਫ਼ ਕਾਰਵਾਈ ਹੋਈ- ਇਕ ਖ਼ਬਰ

ਨਾ ਝੰਗ ਛੁੱਟਿਆ ਨਾ ਕੰਨ ਪਾਟੇ, ਝੁੰਡ ਲੰਘ ਗਿਆ ਇੰਜ ਹੀਰਾਂ ਦਾ।

ਆਪਸੀ ਫੁੱਟ ਨੇ ਕਾਂਗਰਸ ਨੂੰ 80 ਤੋਂ 18 ‘ਤੇ ਪਹੁੰਚਾਇਆ- ਰਾਜਾ ਵੜਿੰਗ

ਇਸ ਘਰ ਕੋ ਆਗ ਲੱਗ ਗਈ ਘਰ ਕੇ ਚਿਰਾਗ਼ ਸੇ।

ਮੁੱਖ ਮੰਤਰੀ ਤੇ ਰਾਜਪਾਲ ਦੀ ਆਪਸੀ ਖਹਿਬਾਜ਼ੀ ਦਾ ਨੁਕਸਾਨ ਪੰਜਾਬ ਭੁਗਤ ਰਿਹੈ- ਰਾਜਾ ਵੜਿੰਗ

ਦੋ ਹਾਥੀ ਲੜਨ ਤਾਂ ਵਿਚਾਰਾ ਘਾਹ ਹੀ ਮਿੱਧਿਆ ਜਾਂਦੈ।

ਪੰਜਾਬ ਭਰ ‘ਚ ਦੌਰੇ ਕਰਨਗੇ ਸੁਖਬੀਰ ਸਿੰਘ ਬਾਦਲ- ਇਕ ਖ਼ਬਰ

ਜਿਨ੍ਹਾਂ ਰਾਹਾਂ ਦੀ ਮੈਂ ਸਾਰ ਨਾ ਜਾਣਾ, ਉਨ੍ਹੀਂ ਰਾਹੀਂ ਵੇ ਮੈਨੂੰ ਤੁਰਨਾ ਪਿਆ।

ਅਰਥ ਵਿਵਸਥਾ ਨੂੰ ਵਧਦਾ ਦੇਖ ਕੇ ਕੁਝ ਲੋਕ ਸੜ ਰਹੇ ਹਨ- ਵਿੱਤ ਮੰਤਰੀ

ਪੀੜ੍ਹੀ ਉੱਤੇ ਬਹਿ ਜਾ ਵੀਰਨਾ, ਸੱਸ ਚੰਦਰੀ ਦੇ ਰੁਦਨ ਸੁਣਾਵਾਂ।

ਦਾਦੂਵਾਲ ਵਲੋਂ ਸੁਖਬੀਰ ਸਿੰਘ ਬਾਦਲ ਨੂੰ ਖੁੱਲ੍ਹੀ ਬਹਿਸ ਦੀ ਚੁਣੌਤੀ- ਇਕ ਖ਼ਬਰ

ਜੇ ਤੂੰ ਚੁੰਘੀਆਂ ਬੂਰੀਆਂ ਤਾਂ ਵਿਚ ਮੈਦਾਨੇ ਆ।

ਕੈਪਟਨ ਅਮਰਿੰਦਰ ਸਿੰਘ ਨੇ ਪ੍ਰਧਾਨ ਮੰਤਰੀ ਮੋਦੀ ਨਾਲ ਕੀਤੀ ਮੁਲਾਕਾਤ- ਇਕ ਖ਼ਬਰ

ਕੁਰਸੀ ਮੇਰੇ ਵੀਰ ਦੀ, ਠਾਣੇਦਾਰ ਦੇ ਬਰਾਬਰ ਡਹਿੰਦੀ।

ਮੌਜੂਦਾ ਸਿੱਖ ਮਸਲਿਆਂ ਸਬੰਧੀ ਸੇਧ ਦੇਣ ਜਥੇਦਾਰ- ਧਾਮੀ

ਵਾਇਆ ਬਠਿੰਡਾ ਨਾ ਜਾਉ ਧਾਮੀ ਸਾਹਿਬ, ਸਿੱਧੀ ‘ਮਾਲਕਾਂ’ ਤੋਂ ਹੀ ਸੇਧ ਮੰਗ ਲਵੋ।

ਬੇਅਦਬੀ ਮਾਮਲਿਆਂ ਪ੍ਰਤੀ ਗੰਭੀਰ ਹੈ ‘ਆਪ’ ਸਰਕਾਰ- ਮਾਲਵਿੰਦਰ ਸਿੰਘ ਕੰਗ

ਬਦਲ ਗਈਆਂ ਸ਼ਕਲਾਂ ਰਾਗ ਪੁਰਾਣੇ ਨੇ, ਸੱਦੇ ਸਿਰਫ਼ ਨਵੇਂ ਨੇ ਕਾਗ ਪੁਰਾਣੇ ਨੇ- (ਬਾਬਾ ਨਜਮੀ)

ਭਗਵੰਤ ਮਾਨ ਨੇ ‘ਆਪ’ ਦੀ ਮਸ਼ਹੂਰੀ ਲਈ ਪੰਜਾਬ ਦਾ ਪੈਸਾ ਗੁਜਰਾਤ ‘ਚ ਲੁਟਾਇਆ- ਭੁੱਲੇਵਾਲ ਰਾਠਾਂ

ਚੋਰਾਂ ਦੇ ਕੱਪੜੇ, ਡਾਂਗਾਂ ਦੇ ਗਜ਼।

ਚੀਨ ਹਮਲੇ ਵਧਾ ਰਿਹਾ ਹੈ ਤੇ ਸਰਕਾਰ ਦਰਾਮਦ- ਕੇਜਰੀਵਾਲ

ਵੇ ਮੈਂ ਚੋਰੀ ਚੋਰੀ ਲਾ ਲਈਆਂ, ਤੇਰੇ ਨਾਲ਼ ਅੱਖੀਆਂ।

ਸੂਬੇ ਦਾ ਮਾਹੌਲ ਖ਼ਰਾਬ ਕਰਨਾ ਚਾਹੁੰਦੀਆਂ ਹਨ ਪੰਜਾਬ ਵਿਰੋਧੀ ਤਾਕਤਾਂ- ਰਾਜਾ ਵੜਿੰਗ

ਛੜੇ ਜੇਠ ਦੀ ਮੈਂ ਅੱਖ ਵਿਚ ਰੜਕਾਂ, ਕੰਧ ਉੱਤੋਂ ਰਹੇ ਝਾਕਦਾ।

ਦਿੱਲੀ ਤੇ ਪੰਜਾਬ ‘ਚ ਕੀਤੇ ਕੰਮ ਲੈ ਕੇ ਜਾਵਾਂਗੇ ਦੇਸ਼ ਭਰ ਵਿਚ- ਭਗਵੰਤ ਮਾਨ

ਨੱਚਾਂ ਮੈਂ ਪਟਿਆਲੇ ਮੇਰੀ ਧਮਕ ਜਲੰਧਰ ਪੈਂਦੀ।

12 ਦਸੰਬਰ 2022

ਭਾਜਪਾ ਦੀਆਂ ਨਵਿਆਂ ਨੂੰ ਅਹੁਦੇਦਾਰੀਆਂ, ਪੁਰਾਣਿਆਂ ਨੂੰ ਦਿਖਾ ਰਹੀਆਂ ਬੂਹੇ ਬਾਰੀਆਂ- ਇਕ ਖ਼ਬਰ

ਨਵਿਆਂ ਦੇ ਸੰਗ ਲੱਗ ਕੇ, ਭੁੱਲ ਗਈ ਯਾਰ ਪੁਰਾਣੇ।

 

ਯਮੁਨਾ ਦਾ ਪਾਣੀ: ਪੰਜਾਬ ਨੂੰ ਦੇਣ ਤੋਂ ਕੇਂਦਰ ਦੀ ਕੋਰੀ ਨਾਂਹ-ਇਕ ਖ਼ਬਰ

ਉਹ ਫਿਰੇ ਨੱਥ ਘੜਾਉਣ ਨੂੰ, ਉਹ ਫਿਰੇ ਨੱਕ ਵਢਾਉਣ ਨੂੰ।

 

ਮੁੱਖ ਮੰਤਰੀ ਦਾ ਹਰਾ ਪੈੱਨ ਅਜੇ ਤੱਕ ਗ਼ਰੀਬਾਂ ਦੇ ਹੱਕ’ਚ ਨਹੀਂ ਚੱਲਿਆ- ਵੜੈਚ

ਅਜੇ ਦਿੱਲੀਉਂ ਹਰੀ ਸਿਆਹੀ ਨਹੀਂ ਆਈ ਬਈ।

ਗੁਜਰਾਤ ਵਿਚ ‘ਆਪ’ ਨੇ ਕਾਂਗਰਸ ਦੀ ਖੇਡ ਵਿਗਾੜੀ- ਚਿਦੰਬਰਮ

ਟੁੱਟ ਪੈਣੇ ਦਰਜੀ ਨੇ ਮੇਰੀ ਰੱਖ ਲਈ ਸੁੱਥਣ ‘ਚੋਂ ਟਾਕੀ।

ਪੰਜ ਪੰਜ ਮਰਲੇ ਦੇ ਸਰਕਾਰੀ ਪਲਾਟਾਂ ਦੀ ਉਮੀਦ ‘ਚ ਲੰਘ ਚੱਲੀ ਜ਼ਿੰਦਗੀ-ਇਕ ਖ਼ਬਰ

ਸਰਟੀਫ਼ੀਕੇਟ ਚੈੱਕ ਕਰ ਲਉ ਬਈ ਕਿਤੇ ਚੰਨ ਉੱਤੇ ਤਾਂ ਨਹੀਂ ਪਲਾਟ ਕੱਟੇ ਹੋਏ।

ਲੋਕਾਂ ਦੇ ਹੱਕਾਂ ਦੇ ਘਾਣ ਖ਼ਿਲਾਫ਼ ਹਮੇਸ਼ਾਂ ਲੜਦੀ ਰਹਾਂਗੀ- ਮਮਤਾ ਬੈਨਰਜੀ

ਉਹ ਘਰ ਰਤਨੀ ਦਾ, ਜਿੱਥੇ ਚੱਲਣ ਪੁਰਾਣੇ ਚਰਖ਼ੇ।

‘ਆਪ’ ਦੇ ਰਾਜ ‘ਚ ਪੰਜਾਬ ਦੇ ਲੋਕਾਂ ਦੀ ਲੁੱਟ- ਪ੍ਰਨੀਤ ਕੌਰ

ਬੀਬੀ ਜੀ ਜਿਹੜੇ ਸੁਰੱਖਿਅਤ ਘੁਰਨਿਆਂ ਵਲ ਨੂੰ ਭੱਜ ਰਹੇ ਐ, ਉਹ ਕੌਣ ਨੇ?

ਸ਼੍ਰੋਮਣੀ ਕਮੇਟੀ ਨੂੰ ਬਾਦਲਾਂ ਦੇ ਚੁੰਗਲ ‘ਚੋਂ ਛੁਡਵਾਉਣ ਲਈ ਯਤਨ ਜਾਰੀ- ਭਾਈ ਚੰਗਾਲ

ਸੱਸ ਮਰੀ ‘ਤੇ ਚੁਬਾਰਾ ਪਾਉਣਾ, ਔਖੀ ਸੌਖੀ ਦਿਨ ਕੱਟਦੀ।

ਬੀਬੀ ਜਾਗੀਰ ਕੌਰ ਅਤੇ ਜਗਮੀਤ ਸਿੰਘ ਬਰਾੜ ਦੀ ਬਾਦਲ ਦਲ ਤੇ ਬਾਦਲਾਂ ਨੂੰ ਸਿੱਧੀ ਚੁਣੌਤੀ-ਇਕ ਖ਼ਬਰ

ਜੱਟ ਸ਼ਾਹਾਂ ਨੂੰ ਖੰਘੂਰੇ ਮਾਰੇ, ਕਣਕਾਂ ਨਿਸਰ ਪਈਆਂ।

ਜੰਮੂ-ਕਸ਼ਮੀਰ ‘ਚ ਬੇਰੁਜ਼ਗਾਰੀ ‘ਚ ਰਿਕਾਰਡ ਤੋੜ ਵਾਧਾ- ਇਕ ਖ਼ਬਰ

ਬਹੁਤ ਸ਼ੋਰ ਸੁਨਤੇ ਥੇ ਪਹਿਲੂ ਮੇਂ ਦਿਲ ਕਾ, ਜੋ ਚੀਰਾ ਤੋ ਕਤਰਾ ਏ ਖੂੰ ਨਿਕਲਾ। (ਗ਼ਾਲਿਬ)

ਗੁਜਰਾਤ ਨੇ ਖੋਖਲੇ ਵਾਅਦੇ, ਰਿਉੜੀ ਅਤੇ ਮਾੜੀ ਸਿਆਸਤ ਨੂੰ ਨਕਾਰ ਦਿਤਾ- ਸ਼ਾਹ

ਸ਼ਾਹ ਜੀ ਕੀ ਇਹੀ ਫਾਰਮੂਲਾ ਹਿਮਾਚਲ ਪ੍ਰਦੇਸ਼ ‘ਤੇ ਲਾਗੂ ਨਹੀਂ ਹੁੰਦਾ?

ਭਾਜਪਾ ਖਿਲਾਫ਼ ਇਕਜੁੱਟ ਹੋਵੇ ਵਿਰੋਧੀ ਧਿਰ- ਨਿਤੀਸ਼

ਕਿਹੜੀ ਵਿਰੋਧੀ ਧਿਰ ਨਿਤੀਸ਼ ਸਾਹਿਬ?

ਸ਼੍ਰੋਮਣੀ ਅਕਾਲੀ ਦਲ ਨੇ ਜਗਮੀਤ ਬਰਾੜ ਨੂੰ ਪਾਰਟੀ ਦੀ ਮੁਢਲੀ ਮੈਂਬਰਸ਼ਿੱਪ ਤੋਂ ਕੱਢਿਆ- ਇਕ ਖ਼ਬਰ

ਕਿਉਂ ਕੀਤੀ ਅਸਾਂ ਨਾਲ ਬਸ ਵੇ, ਕੋਈ ਦੋਸ਼ ਅਸਾਡਾ ਦੱਸ ਵੇ।

ਭਾਜਪਾ ਨੇ ਕੈਪਟਨ ਨੂੰ ਵਫ਼ਾਦਾਰੀ ਦਾ ਤੋਹਫ਼ਾ ਦਿਤਾ- ‘ਆਪ’

ਸ਼ਾਹ ਮੁਹੰਮਦਾ ਆਖਦੇ ਲੋਕ ਸਿੰਘ ਜੀ, ਤੁਸੀਂ ਚੰਗੀਆਂ ਪੂਰੀਆਂ ਪਾ ਆਏ।

ਪ੍ਰਿਅੰਕਾ ਗਾਂਧੀ ਦੀ ਰਣਨੀਤੀ ਨਾਲ ਹਿਮਾਚਲ ‘ਚ ਹੋਈ ਕਾਂਗਰਸ ਦੀ ਜਿੱਤ- ਕਾਂਗਰਸ ਬੁਲਾਰਾ

ਤੀਲੀ ਵਾਲ਼ੀ ਖਾਲ ਟੱਪ ਗਈ, ਲੌਂਗ ਵਾਲ਼ੀ ਨੇ ਭਨਾ ਲਏ ਗੋਡੇ।

ਭਾਜਪਾ ਕੋਰ ਕਮੇਟੀ ਨੂੰ ਵੀ ਦਲ ਬਦਲੂਆਂ ਦਾ ਰੰਗ ਚੜ੍ਹਿਆ- ਇਕ ਖ਼ਬਰ

ਖ਼ਰਬੂਜ਼ੇ ਨੂੰ ਦੇਖ ਖ਼ਰਬੂਜਾ ਰੰਗ ਫੜਦੈ ਬਈ।

ਗੁਜਰਾਤ ਚੋਣਾਂ ਲਈ ਬਣਾਈ ਨੀਤੀ ਸਾਡੇ ਕੰਮ ਨਹੀਂ ਆਈ- ਕਾਂਗਰਸ

ਨੀ ਐਡਾ ਤੇਰਾ ਕਿਹੜਾ ਦਰਦੀ, ਸੁੱਤੀ ਪਈ ਨੂੰ ਪੱਖੀ ਦੀ ਝੱਲ ਮਾਰੇ।

28 ਨਵੰਬਰ 2022

ਮੋਦੀ ਸਰਕਾਰ ਨੇ ਕਿਸਾਨਾਂ ਨਾਲ ਕੀਤੇ ਵਾਅਦੇ ਪੂਰੇ ਨਹੀਂ ਕੀਤੇ- ਖੜਗੇ

ਤੇਰਾ ਲਾਰਾ ਵੇ ਸ਼ਰਾਬੀਆਂ ਦੀ ਗੱਪ ਵਰਗਾ।

ਨਹਿਰੂ ਤੇ ਇੰਦਰਾ ਗਾਂਧੀ ਦੀ ਆਲੋਚਨਾ ਤੋਂ ਦੁਖੀ ਹਾਂ- ਫਾਰੂਕ ਅਬਦੁੱਲਾ

ਮੇਰੇ ਯਾਰ ਨੂੰ ਮੰਦਾ ਨਾ ਬੋਲੀਂ, ਮੇਰੀ ਭਾਵੇਂ ਜਿੰਦ ਕੱਢ ਲੈ।

ਗੁਜਰਾਤ ਚੋਣਾਂ: ਭਾਜਪਾ ਵਲੋਂ ਵਾਅਦਿਆਂ ਦੀ ਝੜੀ- ਇਕ ਖ਼ਬਰ

ਯਾਨੀ ਕਿ ਭਾਜਪਾ ਨੇ ਰਿਉੜੀਆਂ ਵਾਲ਼ਾ ਲਿਫ਼ਾਫ਼ਾ ਢੇਰੀ ਕਰ ਦਿਤਾ।

ਬਾਈਡੇਨ ਨੇ ਹਥਿਆਰਾਂ ‘ਤੇ ਪਾਬੰਦੀ ਲਗਾਉਣ ਦਾ ਫ਼ੈਸਲਾ ਮੁੜ ਦੁਹਰਾਇਆ- ਇਕ ਖ਼ਬਰ

ਹਾਥੀ ਕੇ ਦਾਂਤ ਖਾਨੇ ਕੇ ਔਰ, ਦਿਖਾਨੇ ਕੇ ਔਰ।

ਸੰਯੁਕਤ ਰਾਸ਼ਟਰ ‘ਚ ਇਰਾਨ ਵਿਰੁੱਧ ਮਤੇ ਦੌਰਾਨ ਭਾਰਤ ਰਿਹਾ ਗ਼ੈਰਹਾਜ਼ਰ- ਇਕ ਖ਼ਬਰ

ਅੱਧੀ ਤੇਰੀ ਆਂ ਮੁਲਾਹਜ਼ੇਦਾਰਾ, ਅੱਧੀ ਆਂ ਗ਼ਰੀਬ ਜੱਟ ਦੀ।

ਹਰਿਆਣਾ ਦੇ ਗ੍ਰਹਿ ਮੰਤਰੀ ਨੇ ਜ਼ੀਰਕ ਪੁਰ ਸੜਕ ਚਾਰ ਮਾਰਗੀ ਕਰਨ ਲਈ ਭਗਵੰਤ ਮਾਨ ਨੂੰ ਚਿੱਠੀ ਲਿਖੀ- ਇਕ ਖ਼ਬਰ

ਧਰਤੀ ਨੂੰ ਕਲੀ ਕਰਾ ਦੇ ਵੇ, ਨੱਚੂੰਗੀ ਸਾਰੀ ਰਾਤ।

ਸਨਅਤੀ ਪਲਾਟ ਅਲਾਟਮੈਂਟ ਘੁਟਾਲੇ ਦੀ ਜਾਂਚ ਵਾਲ਼ੀ ਫ਼ਾਈਲ ਗੁਆਚੀ-ਇਕ ਖ਼ਬਰ

ਸਾਰੇ ਡੈਸਕ ਫੋਲਦਾ ਆਈਂ ਵੇ, ਸਾਡੀ ਫ਼ਾਈਲ ਗੁਆਚੀ।

ਕਾਂਗਰਸ ਨੂੰ ਗੁਜਰਾਤ ‘ਚ ਵੋਟਾਂ ਮੰਗਣ ਦਾ ਕੋਈ ਹੱਕ ਨਹੀਂ- ਮੋਦੀ

ਗਲੀਆ ਹੋ ਜਾਣ ਸੁੰਞੀਆਂ, ਵਿਚ ਮਿਰਜ਼ਾ ਯਾਰ ਫਿਰੇ।

ਭਾਜਪਾ ਤੋਂ ਅਸੰਤੁਸ਼ਟ ਹੋਣ ਕਾਰਨ ਕਾਂਗਰਸ ਵਲ ਲੋਕਾਂ ਦਾ ਸਮਰਥਨ ਵਧਿਆ- ਸ਼ਮਸ਼ੇਰ ਗੋਗੀ

ਵੈਰੀਆਂ ਦਾ ਖੂਹ ਵਗਦਾ, ਮੈਨੂੰ ਤੇਰੀ ਵੇ ਜਾਨ ਦਾ ਧੋਖਾ।

ਹਰਿਆਣਾ ਵਿਧਾਨ ਸਭਾ ਲਈ ਚੰਡੀਗੜ੍ਹ ‘ਚ ਥਾਂ ਮੰਗਣੀ ਤਰਕਹੀਣ ਤੇ ਬੇਬੁਨਿਆਦ- ਜਾਖੜ

ਚੰਦ ਕੌਰ ਚੱਕਵਾਂ ਚੁੱਲ੍ਹਾ, ਕਿਤੇ ਯਾਰਾਂ ਨੂਂ ਭਿੜਾ ਕੇ ਮਾਰੂ।

ਸੱਤਾ ਤੋਂ ਲਾਂਭੇ ਹੋਏ ਲੋਕ ਯਾਤਰਾਵਾਂ ਕੱਢ ਰਹੇ ਹਨ- ਮੋਦੀ

ਰੱਥ ਯਾਤਰਾ ਕੀਹਨੇ ਸੀ ਸ਼ੁਰੂ ਕੀਤੀ, ਪਹਿਲਾਂ ਪੀੜ੍ਹੀ ਆਪਣੀ ਹੇਠ ਸੋਟਾ ਫੇਰਿਉ ਜੀ।

ਸ਼੍ਰੋਮਣੀ ਕਮੇਟੀ ਵਲੋਂ ਯੂਟਿਊਬ ਚੈਨਲ ਸ਼ੁਰੂ ਕਰਨ ਦਾ ਫ਼ੈਸਲਾ- ਧਾਮੀ

ਚੰਨ ਚੰਨਾਂ ਦੇ ਮਾਮਲੇ, ਚੜ੍ਹਨ ਕੇ ਨਾ ਹੀ ਚੜ੍ਹਨ।

ਕੇਂਦਰ ਨੇ ਚੋਣ ਕਮਿਸ਼ਨ ਨੂੰ ਕੀਤਾ ਕਮਜ਼ੋਰ- ਵਿਰੋਧੀ ਪਾਰਟੀਆਂ

ਰੰਗ ਪੀਲਾ ਕਿਉਂ ਪੈ ਗਿਆ, ਭਾਬੋ ਮੈਨੂੰ ਰੋਜ਼ ਪੁੱਛਦੀ।

ਮੁੱਖ ਮੰਤਰੀ ਦਫ਼ਤਰ ਅੱਗੇ ਪੱਕੇ ਮੋਰਚੇ ਦੀਆਂ ਤਿਆਰੀਆਂ ਜ਼ੋਰ ਨਾਲ਼ ਸ਼ੁਰੂ- ਇਕ ਖ਼ਬਰ

ਤੇਰੇ ਬੂਹੇ ਅੱਗੇ ਡਾਂਗ ਖੜਕਾਉਣੀ, ਦਾਰੂ ਪੀ ਕੇ ਮਿੱਤਰਾਂ ਨੇ।

ਸ਼੍ਰੋਮਣੀ ਅਕਾਲੀ ਦਲ ਚੰਡੀਗੜ੍ਹ ਦਾ ਇਕ ਇੰਚ ਵੀ ਹਰਿਆਣੇ ਨੂੰ ਨਹੀਂ ਦੇਣ ਦੇਵੇਗਾ- ਇਕ ਖ਼ਬਰ

ਪੀ ਸ਼ਰਾਬਾਂ ਤਖ਼ਤੋਂ ਲੱਥੇ ਰਾਜੇ ਰਾਜ ਗਵਾ ਕੇ, ਤਾਜ ਲੁਹਾ ਕੇ।

20 ਨਵੰਬਰ 2022

ਸੰਯੁਕਤ ਕਿਸਾਨ ਮੋਰਚੇ ਦੇ ਪ੍ਰਮੁੱਖ ਆਗੂ ਮੁੜ ਸਿਰ ਜੋੜ ਕੇ ਬੈਠੇ- ਇਕ ਖ਼ਬਰ

ਸਉਣ ਵੀਰ ਕਰੇ ‘ਕੱਠੀਆਂ, ਭਾਦੋਂ ਚੰਦਰੀ ਵਿਛੋੜੇ ਪਾਵੇ।

ਸ਼੍ਰੋਮਣੀ ਅਕਾਲੀ ਦਲ ਥੱਕ ਹਾਰ ਕੇ ਬੀ.ਜੇ.ਪੀ. ਨਾਲ ਗੱਠਜੋੜ ਲਈ ਉਤਾਵਲਾ- ਇਕ ਖ਼ਬਰ

ਹੁਣ ਅੱਕਾਂ ਤੋਂ ਭਾਲ਼ਦੀ ਡੇਲੇ, ਜੱਟਾਂ ਨੇ ਕਰੀਰ ਪੁੱਟ ਲਏ।

ਬਾਈਡੇਨ ਨੇ ਜੀ-20 ਸੰਮੇਲਨ ਤੋਂ ਬਾਅਦ ਚੀਨੀ ਹਮਰੁਤਬਾ ਨਾਲ ਕੀਤੀ ਵੱਖ ਮੁਲਾਕਾਤ-ਇਕ ਖ਼ਬਰ

ਇਕ ਤੈਨੂੰ ਗੱਲ ਪੁੱਛਣੀ, ਪਰ ਪੁੱਛਣੀ ਮੈਂ ਓਹਲੇ ਹੋ ਕੇ।

ਦਾਦੂਵਾਲ ਨੂੰ ਹਰਿਆਣਾ ਕਮੇਟੀ ਦੀ ਪ੍ਰਧਾਨਗੀ ਤੋਂ ਹਟਾਉਣ ਦੀ ਮੰਗ-ਇਕ ਖ਼ਬਰ

ਕਾਲ਼ੇ ਕੋਲ ਮੰਜਾ ਨਹੀਂ ਡਾਹੁਣਾ, ਲਿਸ਼ਕੇ ਤਾਂ ਪੈ ਜੂ ਬਿਜਲੀ।

ਭਾਜਪਾ ਨਾਲ ਸਮਝੌਤੇ ਬਿਨਾਂ ਸਾਡੀਆਂ ਬਾਹਵਾਂ ਨਹੀਂ ਆਕੜੀਆਂ- ਮਲੂਕਾ

ਘੜਾ ਚੁੱਕ ਲਊਂ ਪੱਟਾਂ ’ਤੇ ਹੱਥ ਧਰ ਕੇ, ਖਸਮਾਂ ਨੂੰ ਖਾਣ ਕੁੜੀਆਂ।

ਸਿੱਖ ਧਰਮ ਦੇ ਪ੍ਰਚਾਰ ਲਈ ਸ਼੍ਰੋਮਣੀ ਕਮੇਟੀ ਮੁਲਾਜ਼ਮ ਹਿੱਸਾ ਪਾਉਣ- ਧਾਮੀ

ਦਾਲ਼ ਮੰਗੇਂ ਛੜਿਆਂ ਤੋਂ, ਨਾ ਸ਼ਰਮ ਗੁਆਂਢਣੇ ਆਵੇ।

ਪੰਜਾਬ ‘ਚ ਬੀ.ਜੇ.ਪੀ. ਤੇ ਅਕਾਲੀ ਦਲ ਦੇ ਗੱਠਜੋੜ ਦੀ ਕੋਈ ਸੰਭਾਵਨਾ ਨਹੀਂ- ਅਸ਼ਵਨੀ ਸ਼ਰਮਾ

ਕਿਤੇ ‘ਕੱਲੀ ਬਹਿ ਕੇ ਸੋਚੀਂ ਨੀਂ, ਅਸੀਂ ਕੀ ਨਹੀਂ ਕੀਤਾ ਤੇਰੇ ਲਈ।

ਬੰਗਾਲ ਤੇ ਟੀ.ਐਮ.ਸੀ. ਖ਼ਿਲਾਫ਼ ਘੜੀ ਜਾ ਰਹੀ ਹੈ ਸਾਜ਼ਿਸ਼- ਮਮਤਾ ਬੈਨਰਜੀ

ਪੂਣੀਆਂ ਮੈਂ ਤਿੰਨ ਕੱਤੀਆਂ, ਟੁੱਟ ਪੈਣੇ ਦਾ ਤੇਰ੍ਹਵਾਂ ਗੇੜਾ।

ਡੋਨਾਲਡ ਟਰੰਪ ਵਲੋਂ ਰਾਸ਼ਟਰਪਤੀ ਚੋਣਾਂ ਲੜਨ ਦਾ ਐਲਾਨ- ਇਕ ਖ਼ਬਰ

ਮੂੰਹ ਉਗਲਾਂ ਘੱਤ ਕੇ ਕਹਿਣ ਸਭੇ, ਕਾਰੇ ਕਰਨ ਥੀਂ ਇਹ ਨਾ ਸੰਗਦਾ ਏ।

ਕੇਂਦਰ ਦੀਆਂ ਨੀਤੀਆਂ ਨੇ ਅਰਥਿਕਤਾ ਤਬਾਹ ਕੀਤੀ, ਕਿਸਾਨੀ ਦਾ ਲੱਕ ਤੋੜਿਆ- ਰਾਹੁਲ ਗਾਂਧੀ

ਬਾਣੀਆ ਨੇ ਅੱਤ ਚੁੱਕ ਲਈ, ਸਾਰੇ ਜੱਟ ਕਰਜ਼ਾਈ ਕੀਤੇ।

ਜੇ ਕੇਂਦਰ ਰਾਜਾਂ ਦੇ ਬਕਾਏ ਨਹੀਂ ਦਿੰਦਾ ਤਾਂ ਅਸੀਂ ਵੀ ਜੀ.ਐਸ.ਟੀ. ਰੋਕ ਸਕਦੇ ਹਾਂ-ਮਮਤਾ

ਕੁਰਸੀ ‘ਤੇ ਬੈਠਦੀ ਲਗਾ ਕੇ ਮੇਜ਼ ਜੀ, ਬੀਬੀ ਦਾ ਸਰੂਪ ਬਿਜਲੀ ਤੋਂ ਤੇਜ਼ ਜੀ।

ਵੀਹ ਵੀਹ ਲੱਖ ‘ਚ ਵਿਕੀਆਂ ਨਾਇਬ ਤਹਿਸੀਲਦਾਰੀਆਂ- ਇਕ ਖ਼ਬਰ

ਟੁੱਟ ਪੈਣੇ ਦਰਜ਼ੀ ਨੇ, ਮੇਰੀ ਰੱਖ ਲਈ ਸੁੱਥਣ ‘ਚੋਂ ਟਾਕੀ।

ਏ.ਟੀ.ਐਮ. ਤੋੜਨ ਵਾਲਾ ਨਿਕਲਿਆ ਭਾਜਪਾ ਨੇਤਾ ਦਾ ਪੁੱਤਰ- ਇਕ ਖ਼ਬਰ

ਤੇਲੀ ਕਰ ਕੇ ਰੁੱਖਾ ਖਾਈਏ, ਇਹ ਨਹੀਂ ਸਾਥੋਂ ਹੋਣਾ।

ਬੀਮੇ ਦੇ ਦਸ ਲੱਖ ਰੁਪਏ ਲੈਣ ਲਈ ਪੁੱਤਰ ਨੇ ਸੁਪਾਰੀ ਦੇ ਕੇ ਮਰਵਾਇਆ ਪਿਉ- ਇਕ ਖ਼ਬਰ

ਚਿੱਟਾ ਹੋ ਗਿਆ ਲਹੂ ਭਰਾਵੋ ਚਿੱਟਾ ਹੋ ਗਿਆ ਲਹੂ।

ਭਾਜਪਾ ਨਾਲ ਗੱਠਜੋੜ ਹੋਣ ‘ਤੇ ਅਕਾਲੀ ਦਲ ਹੋਵੇਗਾ ਵੱਡਾ ਭਰਾ- ਮਲੂਕਾ

ਉਹ ਕਹੇ ਦੇਹ ਚੋਪੜੀਆਂ, ਉਹ ਕਹੇ ਹੋ ਬੂਹਿਓਂ ਬਾਹਰ।

ਪੰਜਾਬ ਦਾ ਖ਼ਜ਼ਾਨਾ ਲੁਟਾ ਰਹੀ ਹੈ ‘ਆਪ’ ਸਰਕਾਰ- ਪ੍ਰਨੀਤ ਕੌਰ

ਹਾਂ ਜੀ ਬੀਬੀ ਜੀ ਠੀਕ ਫੁਰਮਾਇਆ ਤੁਸੀਂ, ਕੁਝ ਲੁੱਟਦੇ ਐ ਤੇ ਕੁਝ ਲੁਟਾਉਂਦੇ ਐ।

ਆਰ.ਐਸ.ਐਸ. ਤੇ ਭਾਜਪਾ ਸਿੱਖ ਮਾਮਲਿਆਂ ਵਿਚ ਦਖ਼ਲ ਨਾ ਦੇਣ- ਸ਼੍ਰੋਮਣੀ ਕਮੇਟੀ

ਓ ਭਾਈ ਇਸ ਤਰ੍ਹਾਂ ਦੇ ਬਿਆਨ ਦੇਣ ਤੋਂ ਪਹਿਲਾਂ ‘ਮਾਲਕਾਂ’ ਨਾਲ ਤਾਂ ਸਲਾਹ ਕਰ ਲਿਆ ਕਰੋ।

ਸੰਯੁਕਤ ਕਿਸਾਨ ਮੋਰਚੇ ਵਲੋਂ ਸਰਕਾਰ ਖ਼ਿਲਾਫ਼ ਪੱਕੇ ਮੋਰਚੇ ਸ਼ੁਰੂ- ਇਕ ਖ਼ਬਰ

ਹਾਜੀ ਲੋਕ ਮੱਕੇ ਵਲ ਜਾਂਦੇ, ਅਸਾਂ ਜਾਣਾ ਤਖ਼ਤ ਹਜ਼ਾਰੇ।

14 ਨਵੰਬਰ 2022

ਦਿੱਲੀ ‘ਚ ਪ੍ਰਦੂਸ਼ਣ ਲਈ ਪੰਜਾਬ ਜ਼ਿੰਮੇਵਾਰ- ਕੇਂਦਰ ਸਰਕਾਰ

ਜੇਠ ਦੀ ਨਜ਼ਰ ਬੁਰੀ, ਟੁੱਟ ਗਿਆ ਮੇਰਾ ਗਿੱਟਾ।

ਬਰਤਾਨਵੀ ਹਾਈ ਕੋਰਟ ਨੇ ਨੀਰਵ ਮੋਦੀ ਨੂੰ ਭਾਰਤ ਹਵਾਲੇ ਕਰਨ ਦੇ ਦਿਤੇ ਹੁਕਮ- ਇਕ ਖ਼ਬਰ

ਬੜੀ ਮੌਜ ਉਡਾ ਲਈ ਬਈ ਹੁਣ ਚਲੋ ਆਪਣੇ ਡੇਰੇ।

ਗੁਜਰਾਤ ਦੇ ਲੋਕਾਂ ਨੂੰ ‘ਡਬਲ ਇੰਜਣ’ ਦੇ ਧੋਖੇ ਤੋਂ ਬਚਾਵਾਂਗੇ- ਰਾਹੁਲ

ਓਭਾ ਜੀ, ਪਹਿਲਾਂ ਆਪਣਾ ਆਪ ਤਾਂ ਬਚਾ ਲਉ।

ਮੈਨੂੰ ਲੋਕਾਂ ਤੋਂ ਮਿਲਦੇ ਪਿਆਰ ਕਾਰਨ ਭਾਜਪਾ ਪ੍ਰੇਸ਼ਾਨ- ਕੇਜਰੀਵਾਲ

ਲੌਂਗ ਘੜਾ ਦਊਂਗਾ, ਗੁੱਸਾ ਛੱਡ ਮੁਟਿਆਰੇ।

ਭਾਰਤ ਤੇ ਰੂਸ ਦੇ ਰਿਸ਼ਤੇ ਡੂੰਘੇ ਤੇ ਪਰਖ਼ੇ ਹੋਏ- ਜੈਸ਼ੰਕਰ

ਮਿੱਠੇ ਯਾਰ ਦੇ ਬਰੋਬਰ ਬਹਿ ਕੇ, ਮਿੱਠੇ ਮਿੱਠੇ ਬੇਰ ਚੁਗੀਏ।

ਅਕਾਲੀ ਦਲ ‘ਚੋਂ ਮੈਨੂੰ ਕੋਈ ਨਹੀਂ ਕੱਢ ਸਕਦਾ- ਬੀਬੀ ਜਗੀਰ ਕੌਰ

ਸੀਟੀ ਤੇ ਸੀਟੀ ਵੱਜੇ, ਜਦੋਂ ਮੈਂ ਗਿੱਧੇ ਵਿਚ ਆਈ।

ਪ੍ਰਧਾਨ ਮੰਤਰੀ ਨੇ ਅਜੇ ਤੱਕ ਨੋਟਬੰਦੀ ਦੀ ਆਪਣੀ ਅਸਫ਼ਲਤਾ ਨੂੰ ਸਵੀਕਾਰ ਨਹੀਂ ਕੀਤਾ- ਖੜਗੇ

ਤੇਰੇ ਛੱਲੇ ਨੇ ਪੁਆੜੇ ਪਾਏ, ਲਿਆ ਭਾਬੀ ਨੇ ਪਛਾਣ ਮਿੱਤਰਾ।

ਹੁਣ ਲੋਕਾਂ ਨੂੰ ‘ਜੀ ਆਇਆਂ ਨੂੰ’ ਕਹਿ ਕੇ ਸੰਬੋਧਨ ਕਰਨਗੇ ਪੁਲਿਸ ਕਰਮਚਾਰੀ- ਇਕ ਖ਼ਬਰ

ਘੋਟਾ ਫੇਰਨ ਵੇਲੇ ਕਿਹਾ ਕਰਨਗੇ ‘ ਹਮ ਘਰ ਸਾਜਨ ਆਏ’।

ਸਿੱਖਾਂ ਵਿਰੁੱਧ ਪ੍ਰਚਾਰ ਬਾਰੇ ਅਕਾਲ ਤਖ਼ਤ ਦੇ ਜਥੇਦਾਰ ਨੇ ਚਿੰਤਾ ਪ੍ਰਗਟਾਈ- ਇਕ ਖ਼ਬਰ

ਬਸ ਅਸੀਂ ਸਮੇਂ ਸਮੇਂ ‘ਤੇ ਚਿੰਤਾ ਪ੍ਰਗਟਾਅ ਕੇ ਸੁਰਖੁਰੂ ਹੋ ਜਾਂਦੇ ਹਾਂ।

ਭਾਜਪਾ ਤੇ ਆਮ ਆਦਮੀ ਪਾਰਟੀ ਇਕ ਹੀ ਟੀਮ- ਕਨ੍ਹੱਈਆ ਕੁਮਾਰ

ਨੱਥਾ ਸਿੰਘ ਪ੍ਰੇਮ ਸਿੰਘ, ਵੰਨ ਐਂਡ ਦੀ ਸੇਮ ਥਿੰਗ।

ਮੀਡੀਆ ਨੂੰ ਸਰਕਾਰ ਦੀਆਂ ਖ਼ਾਮੀਆਂ ਉਜਾਗਰ ਕਰਨ ਦੀ ਲੋੜ- ਮਨਮੋਹਨ ਸਿੰਘ

ਰਾਂਝਾ ਜੋੜ ਕੇ ਪਰ੍ਹੇ ਫਰਿਆਦ ਕਰਦਾ, ਵੇਖੋ ਖੁੱਸਦੇ ਸਾਕ ਬੇਦੋਸ਼ਿਆਂ ਦੇ।

ਹਿਮਾਚਲ ਦੀਆਂ ਸਾਰੀਆਂ 68 ਸੀਟਾਂ ‘ਤੇ ‘ਆਪ’ ਦੀ ਜ਼ਮਾਨਤ ਜ਼ਬਤ ਹੋਵੇਗੀ- ਨੱਢਾ

ਚੜ੍ਹੀ ਰੰਗਪੁਰੋਂ ਜੰਞ ਖੇੜਿਆਂ ਦੀ, ਢੁੱਕੀ ਸ਼ਹਿਰ ਸਿਆਲਾਂ ਨੂੰ ਆ ਮੀਆਂ।

‘ਸੱਤਾ ਦੀ ਦੁਰਵਰਤੋਂ’ ਖ਼ਿਲਾਫ਼ ਇਮਰਾਨ ਵਲੋਂ ਰਾਸ਼ਟਰਪਤੀ ਨੂੰ ਪੱਤਰ- ਇਕ ਖ਼ਬਰ

ਚਿੱਠੀਆਂ ਸਾਹਿਬਾਂ ਜੱਟੀ ਨੇ, ਲਿਖ ਮਿਰਜ਼ੇ ਵਲ ਪਾਈਆਂ।

ਟਰੱਕ ‘ਤੇ ਭੁੱਕੀ ਵੇਚਦਾ ਪੁਲਿਸ ਵਲੋਂ ਕਾਬੂ- ਇਕ ਖ਼ਬਰ

ਇਹੀ ਤਾਂ ਵਿਕਾਸ ਐ! ਰੇਹੜੀ ਤੋਂ ਟਰੱਕ ਹੋ ਗਿਆ।

ਬੀਬੀ ਜਗੀਰ ਕੌਰ ਨੂੰ ਪਾਰਟੀ ‘ਚੋਂ ਕੱਢਣਾ ਸੁਖਬੀਰ ਬਾਦਲ ਦੀ ਨੈਤਿਕ ਹਾਰ- ਸੁਰਜੀਤ ਸਿੰਘ ਕੋਹਲੀ

ਜੇਠ ਦੇ ਬੁਰੇ ਦਿਨ ਆਏ, ਕਿੱਕਰਾਂ ਨੂੰ ਪਾਵੇ ਜੱਫੀਆਂ। 

06 ਨਵੰਬਰ 2022

ਕੇਜਰੀਵਾਲ ਨੇ ਪਰਾਲੀ ਸਾੜਨ ਵਾਲੇ ਪੰਜਾਬ ਦੇ ਕਿਸਾਨਾਂ ਨੂੰ ਕੀਤਾ ਦੋਸ਼-ਮੁਕਤ-ਇਕ ਖ਼ਬਰ

ਵਾਹ ਬਈ ਵਾਹ! ਇੰਨੀ ਛੇਤੀ ਤਾਂ ਗਿਰਗਿਟ ਵੀ ਰੰਗ ਨਹੀਂ ਬਦਲਦਾ।

ਦਿੱਲੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵਲੋਂ ਬੀਬੀ ਜਗੀਰ ਕੌਰ ਦੀ ਹਮਾਇਤ-ਇਕ ਖ਼ਬਰ

ਦੁਸ਼ਮਨ ਦਾ ਦੁਸ਼ਮਨ ਸਾਡਾ ਦੋਸਤ।

ਹਰ ਹਾਲਤ ‘ਚ ਚੋਣ ਲੜਾਂਗੀ- ਬੀਬੀ ਜਗੀਰ ਕੌਰ

ਵਾਰਸ ਸ਼ਾਹ ਨਾ ਮੁੜਾਂ ਰੰਝੇਟੜੇ ਤੋਂ, ਭਾਵੇਂ ਬਾਪ ਦੇ ਬਾਪ ਦਾ ਬਾਪ ਆਵੇ।

ਆਈ.ਐਸ.ਆਈ. ਨਾਲ ਕੰਮ ਕਰਨ ਵਾਲੀ ਅਮਰੀਕਨ ਔਰਤ ਨੂੰ ਹੋਈ 20 ਸਾਲ ਦੀ ਸਜ਼ਾ-ਇਕ ਖ਼ਬਰ

ਆਈ.ਐਸ.ਆਈ. ਨਾਲ ਕੰਮ ਕਰਨ ਵਾਲੀ ਬਰਤਾਨਵੀ ਔਰਤ ਕਰ-ਦਾਤਾਵਾਂ ਦੇ ਪੈਸੇ ਨਾਲ ਉਡਾ ਰਹੀ ਹੈ ਗੁਲਛਰੇ।

ਸਰਕਾਰੀ ਫ਼ਾਰਮੂਲਾ: ਪਰਾਲ਼ੀ ਦਾ ਧੂੰਆਂ ਉੱਠਿਆਂ ਤਾਂ ਨੰਬਰਦਾਰਾਂ ਦੀ ਖੈਰ ਨਹੀਂ- ਇਕ ਖ਼ਬਰ

ਨਾਨੀ ਖਸਮ ਕਰੇ, ਦੋਹਤਾ ਚੱਟੀ ਭਰੇ।

ਬੀਬੀ ਜਗੀਰ ਕੌਰ ਦੇ ਮਾਮਲੇ ‘ਚ ਅਕਾਲੀ ਦਲ ਨੇ ਭਾਜਪਾ ਘੇਰੀ, ਲਾਲ ਪੁਰਾ ‘ਤੇ ਲਾਏ ਦੋਸ਼-ਇਕ ਖ਼ਬਰ

ਡਿਗੀ ਖੋਤੇ ਤੋਂ, ਗੁੱਸਾ ਘੁਮਿਆਰ ‘ਤੇ।

13 ਹਜ਼ਾਰ ਰੁਪਏ ਰਿਸ਼ਵਤ ਲੈਣ ਦੇ ਦੋਸ਼ ਵਿਚ ਮਾਲ ਪਟਵਾਰੀ ਗ੍ਰਿਫ਼ਤਾਰ-ਇਕ ਖ਼ਬਰ

ਛੂਟਤੀ ਨਹੀਂ ਹੈ ਕਾਫ਼ਰ, ਮੂੰਹ ਕੋ ਲਗੀ ਹੂਈ।

‘ਜਥੇਦਾਰ’ ਨੇ ਮੇਰੇ ਵਲੋਂ ਲਿਖੀ ਚਿੱਠੀ ਦਾ ਮੁੜ ਕੋਈ ਜਵਾਬ ਨਹੀਂ ਦਿਤਾ-ਪੰਜੋਲੀ

ਮੇਰੇ ਢੋਲ ਦੀ ਚਿੱਠੀ ਨਾ ਲਿਆਇਆ, ਮਰ ਜੇਂ ਤੂੰ ਡਾਕ ਵਾਲਿਆ।

ਕਾਂਗਰਸ ਡੁੱਬਦਾ ਜਹਾਜ਼, ਜਿਸ ਦਾ ਕੋਈ ਭਵਿੱਖ ਨਹੀਂ- ਅਮਿਤ ਸ਼ਾਹ

ਤੂੰ ਤਾਂ ਅਮਲੀ ਹੋ ਗਿਆ ਭਾਰਾ, ਘਰ ਤੇਰੇ ਨਹੀਉਂ ਵਸਣਾ।

ਬਾਦਲ ਅਕਾਲੀ ਦਲ ਵਲੋਂ ਬੀਬੀ ਜਗੀਰ ਕੌਰ ਨੂੰ ਮੁਅੱਤਲ ਕਰ ਦਿਤਾ ਗਿਆ- ਇਕ ਖ਼ਬਰ

ਕਾਹਨੂੰ ਮਾਰਦੈਂ ਜੱਟਾ ਲਲਕਾਰੇ, ਵੇ ਔਖੀ ਹੋ ਜੂ ਕੈਦ ਕੱਟਣੀ।

ਮੁਖ਼ਤਾਰ ਅੰਸਾਰੀ ਨੂੰ ਪੰਜਾਬ ‘ਚ ਰੱਖਣ ਲਈ ਵਕੀਲਾਂ ‘ਤੇ ਖਰਚੇ ਗਏ 55 ਲੱਖ ਰੁਪਏ- ਇਕ ਖ਼ਬਰ

ਐਰ ਗ਼ੈਰ ਨੂੰ ਸ਼ੱਕਰ ਦਾ ਦਾਣਾ, ਭਗਤੇ ਨੂੰ ਖੰਡ ਪਾ ਦਿਉ।

ਡੇਰਾ ਮੁਖੀ ਨੂੰ ਪੈਰੋਲ ਦਿਵਾਉਣ ਵਿਚ ਸਰਕਾਰ ਦਾ ਕੋਈ ਹੱਥ ਨਹੀਂ- ਖੱਟਰ

ਦੋ ਘੁੱਟ ਪੀ ਕੇ ਦਾਰੂ, ਪੈਰ ‘ਤੇ ਮੁਕਰ ਗਿਆ।

ਕੈਪਟਨ ਅਮਰਿੰਦਰ ਦਾ ਦੌਰ ਹੁਣ ਖ਼ਤਮ ਹੋ ਗਿਐ- ਰਾਜਾ ਵੜਿੰਗ

ਇਹ ਜੱਗ ਸਰਾਏ ਹਮੇਸ਼ਗੀ ਦਾ, ਕੀਹਨੇ ਰੱਖਿਆ ਏ ਤੰਬੂ ਤਾਣ ਯਾਰੋ। 

ਅਕਾਲੀ ਦਲ ਲਈ ਚੁਣੌਤੀ ਬਣਿਆ ਸ਼੍ਰੋਮਣੀ ਕਮੇਟੀ ਦਾ ਇਜਲਾਸ- ਇਕ ਖ਼ਬਰ

ਪਾਣੀ ਡੋਲ੍ਹ ਗਈ ਝਾਂਜਰਾਂ ਵਾਲੀ, ਕੈਂਠੇ ਵਾਲ਼ਾ ਤਿਲਕ ਪਿਆ।

ਅਕਾਲੀ ਆਗੂ ਡਾ.ਚੀਮਾ ਅਤੇ ਰੱਖੜਾ ਬੀਬੀ ਜਗੀਰ ਕੌਰ ਨੂੰ ਉਸਦੇ ਘਰ ਜਾ ਕੇ ਮਿਲੇ- ਇਕ ਖ਼ਬਰ

ਅਸੀਂ ਦਰ ਤੇਰੇ ‘ਤੇ ਆਏ, ਖ਼ੈਰ ਪਾ ਦੇ ਸਾਨੂੰ ਦਾਤੀਏ।

ਰਿਸ਼ਵਤ ਮੰਗਣ ਦੇ ਦੋਸ਼ ਵਿਚ ਵਿਜੀਲੈਂਸ ਇੰਸਪੈਕਟਰ ਗ੍ਰਿਫ਼ਤਾਰ-ਇਕ ਖ਼ਬਰ

ਕੀ ਭਾਲ਼ਦਾ ਏਂ ਉੱਥੋਂ ਫ਼ਕਰਦੀਨਾ, ਜਿੱਥੇ ਵਾੜ ਹੀ ਖੇਤ ਨੂੰ ਖਾਂਵਦੀ ਏ।

31 ਅਕਤੂਬਰ 2022

ਬੀਬੀ ਜਗੀਰ ਕੌਰ ਵਲੋਂ ਖੁੱਲ੍ਹੇ-ਆਮ ਸ਼੍ਰੋਮਣੀ ਕਮੇਟੀ ਦੀ ਪ੍ਰਧਾਨਗੀ ਮੰਗਣ ਨਾਲ ਸੁਖਬੀਰ ਦੀ ਚਿੰਤਾ ਵਧੀ- ਇਕ ਖ਼ਬਰ    

ਹੀਰਾ ਨਾ ਮੋਤੀ ਮਾਂਗੂੰ, ਨਾ ਕੰਗਨੋਂ ਕੀ ਜੋੜੀ ਮਾਗੂੰ, ਮੈਂ ਤੋਂ ਮਾਂਗੂੰ ਪ੍ਰਧਾਨਗੀ, ਬਸ ਪ੍ਰਧਾਨਗੀ।

ਪੰਥਕ ਇਕਜੁੱਟਤਾ ਲਈ ਸਿਰਫ਼ ਸਿਆਸੀ ਏਕਤਾ ਅਹਿਮ ਨਹੀਂ- ਜਥੇਦਾਰ ਹਰਪ੍ਰੀਤ ਸਿੰਘ

ਗੋਲਕਾਂ ਦੀ ਏਕਤਾ ਵੀ ਉਤਨੀ ਹੀ ਜ਼ਰੂਰੀ ਹੈ ਜਥੇਦਾਰ ਜੀ।

ਰਿਸ਼ੀ ਸੂਨਕ ਬਾਰੇ ਭਾਜਪਾ ਤੇ ਵਿਰੋਧੀ ਧਿਰਾਂ ਵਿਚਾਲੇ ਸ਼ਬਦੀ ਜੰਗ- ਇਕ ਖ਼ਬਰ

ਬੇਗਾਨੀ ਸ਼ਾਦੀ ਮੈਂ ਅਬਦੁੱਲੇ ਦੀਵਾਨੇ।

ਕੇਜਰੀਵਾਲ ਵਲੋਂ ਕਰੰਸੀ ਨੋਟਾਂ ‘ਤੇ ਲਕਸ਼ਮੀ ਅਤੇ ਗਣੇਸ਼ ਦੀ ਤਸਵੀਰ ਲਾਉਣ ਦੀ ਮੋਦੀ ਨੂੰ ਅਪੀਲ- ਇਕ ਖ਼ਬਰ

ਉਘਰਿ ਗਇਆ ਜੈਸਾ ਖੋਟਾ ਢਬੂਆ ਨਦਰਿ ਸਰਾਫਾ ਆਇਆ- (ਗੁਰਬਾਣੀ)

ਅਮੀਰਾਂ ਦਾ ਪੱਖ ਪੂਰਦੀ ਹੈ ਮੋਦੀ ਦੀ ਭਾਜਪਾ ਸਰਕਾਰ –ਰਾਹੁਲ ਗਾਂਧੀ

ਸੀਤਾ ਦੇ ਛਲਣੇ ਨੂੰ, ਸੋਨੇ ਦਾ ਮਿਰਗ ਬਣਾਇਆ।

ਸੌਦਾ ਸਾਧ ਅਤੇ ਬਿਲਕਿਸ ਬਾਨੋ ਦੇ ਦੋਸ਼ੀਆਂ ਨੂੰ ਜੇਹਲ ਭੇਜਿਆ ਜਾਵੇ- ਸਵਾਤੀ ਮਾਲੀਵਾਲ

ਵਾਹ ਨੀ! ਸ਼ੇਰ ਬੱਚੀਏ।

ਦਰਬਾਰ ਸਾਹਿਬ ਤੋਂ ਗੁਰਬਾਣੀ ਦਾ ਅਸ਼ੁੱਧ ਪ੍ਰਸਾਰਣ ਕਿਉਂ?- ਬੀਰ ਦਵਿੰਦਰ ਸਿੰਘ

ਪ੍ਰਬੰਧਕ ਵਿਚਾਰੇ ਬਾਦਲਾਂ ਦੀ ਪ੍ਰਧਾਨਗੀ ਬਚਾਉਣ ਕਿ ਗੁਰਬਾਣੀ ਦੀ ਸ਼ੁੱਧਤਾ ਅਸ਼ੁੱਧਤਾ ਪਰਖਣ !

ਕਰੰਸੀ ਨੋਟਾਂ ‘ਤੇ ਲਕਸ਼ਮੀ ਤੇ ਗਣੇਸ਼ ਦੀ ਤਸਵੀਰ ਲਗਾਉਣ ਨਾਲ ਦੇਸ਼ ਦਾ ਅਰਥਚਾਰਾ ਸੁਧਰੇਗਾ- ਕੇਜਰੀਵਾਲ

ਕੇਜਰੀਵਾਲ ਜੀ ਇਹ ਵੀ ਦੱਸ ਦਿੰਦੇ ਕਿ ਆਈ.ਆਈ.ਟੀ. ਦੇ ਸਿਲੇਬਸ ‘ਚ ਕਿਸ ਚੈਪਟਰ ‘ਚ ਦਰਜ ਹੈ ਇਹ ਨੁਸਖਾ।

ਸ਼ਸ਼ੀ ਥਰੂਰ ਵਲੋਂ ਖੜਗੇ ਨੂੰ ਪੂਰਾ ਸਮਰਥਨ ਅਤੇ ਸਹਿਯੋਗ ਦੇਣ ਦਾ ਵਾਅਦਾ- ਇਕ ਖ਼ਬਰ

ਜਿੱਥੇ ਚਲੇਂਗਾ ਚੱਲੂੰਗੀ ਨਾਲ ਤੇਰੇ, ਟਿਕਟਾਂ ਦੋ ਲੈ ਲਈਂ।

ਰਾਜਸਥਾਨ ‘ਚ ਕੁੜੀਆਂ ਦੀ ਸ਼ਰੇਆਮ ‘ਨੀਲਾਮੀ’, ਕੌਮੀ ਮਹਿਲਾ ਕਮਿਸ਼ਨ ਨੇ ਜਾਂਚ ਲਈ ਬਣਾਈ ਟੀਮ- ਇਕ ਖ਼ਬਰ

ਬੇਟੀ ਬਚਾਉ, ਬੇਟੀ ਪੜ੍ਹਾਉ ਵਾਲ਼ੇ ਕਿਧਰ ਗਏ ਬਈ।

ਭਗਵੰਤ ਮਾਨ ਨੇ ਕੇਂਦਰ ਅੱਗੇ ਗੋਡੇ ਟੇਕੇ- ਅਕਾਲੀ ਦਲ

ਤੁਸੀਂ ਵੀ ਤਾਂ ਭਾਜਪਾ ਨੂੰ ਬਿਨਾਂ ਸ਼ਰਤ ਹਮਾਇਤ ਦੇ ਕੇ ਗੋਡੇ ਟੇਕਦੇ ਰਹੇ ਹੋ।

ਰੂਸ ਦੇ ਭਾਰਤ ਨਾਲ ਰਿਸ਼ਤੇ ਬਹੁਤ ਅਹਿਮ ਤੇ ਖ਼ਾਸ- ਪੂਤਿਨ

ਡੋਰ ਵੱਟ ਕੇ ਗਲੇ ਦੇ ਵਿਚ ਪਾਵਾਂ, ਮਿੱਤਰਾ ਤਵੀਤ ਬਣ ਜਾ।

ਨਿਤੀਸ਼ ਕੁਮਾਰ ਨੇ ਗ੍ਰਹਿ ਮੰਤਰਾਲੇ ਵਲੋਂ ਸੱਦੀ ਮੀਟਿੰਗ ਤੋਂ ਬਣਾਈ ਦੂਰੀ- ਇਕ ਖ਼ਬਰ

ਟੁੱਟ ਜਾਊਗਾ ਬਿਲੌਰੀ ਚੂੜਾ, ਮਿੱਤਰਾ ਬਾਂਹ ਛੱਡ ਦੇ।

ਸ਼੍ਰੋਮਣੀ ਕਮੇਟੀ ‘ਤੇ ਕੌਮ ਦਾ ਕਬਜ਼ਾ, ਕਿਸੇ ਦਾ ਨਿਜੀ ਨਹੀਂ-ਸੁਖਬੀਰ ਬਾਦਲ

ਕਾਹਨੂੰ ਛੱਡਦੈਂ ਗਪੌੜੇ ਏਡੇ, ਸਭ ਕੁਝ ਜਾਣੇ ਦੁਨੀਆਂ।

ਸਿਆਸੀ ਸਿੱਖ ਜਥੇਬੰਦੀਆਂ ਸੱਤਾ ਦਾ ਲਾਲਚ ਛੱਡਣ- ਜਥੇਦਾਰ ਅਕਾਲ ਤਖ਼ਤ

ਤੇਲੀ ਕਰ ਕੇ ਰੁੱਖਾ ਖਾਈਏ, ਇਹ ਨਾ ਪੁੱਗਦਾ ਸਾਨੂੰ।

23 ਅਕਤੂਬਰ 2022

ਸੱਤਾ ਦੀ ਲਾਲਸਾ ਕਾਰਨ ਸ਼ੀ ਜਿਨਪਿੰਗ ਨੇ ਚੀਨ ‘ਚ ਸਿਸਟਮ ਅਤੇ ਸੰਵਿਧਾਨ ਬਦਲ ਦਿਤਾ-ਇਕ ਖ਼ਬਰ

ਸੰਧਾਵਾਲੀਏ ਜੇਹੀ ਨਾ ਕਿਸੇ ਕੀਤੀ, ਤੇਗ਼ਾਂ ਵਿਚ ਦਰਬਾਰ ਦੇ ਮਾਰੀਆਂ ਨੇ।

ਅਕਾਲੀ ਧੜਿਆਂ ‘ਚ ਏਕੇ ਦੀਆਂ ਕੋਸ਼ਿਸ਼ਾਂ ‘ਚ ਵਿਘਨ ਪਾਉਣ ਲਈ ਮੈਨੂੰ ਨੋਟਿਸ ਦਿਤਾ ਗਿਆ- ਜਗਮੀਤ ਬਰਾੜ

‘ਮਾਲਕਾਂ’ ਨੂੰ ਪ੍ਰਧਾਨਗੀ ਚਾਹੀਦੀ ਐ ਉਹਨੀਂ ਪੰਥ ਦੇ ਏਕੇ ‘ਚੋਂ ਕੀ ਲੈਣੈ ਬਾਈ ਜਗਮੀਤ ਸਿਆਂ।

ਸਭ ਤੋਂ ਬੁਰੇ ਦੌਰ ‘ਚ ਪਹੁੰਚੀ ਚੀਨ ਦੀ ਅਰਥਵਿਵਸਥਾ- ਇਕ ਖ਼ਬਰ

ਸਦਾ ਨਾ ਬਾਗੀਂ ਬੁਲਬੁਲ ਬੋਲੇ, ਸਦਾ ਨਾ ਮੌਜ ਬਹਾਰਾਂ।

ਡੀ.ਏ.ਪੀ. ਹਰਿਆਣੇ ਭੇਜਣ ਕਰ ਕੇ ਪੰਜਾਬ ਵਿਚ ਖਾਦ ਦੀ ਤੋਟ- ਇਕ ਖ਼ਬਰ

ਅਸਾਂ ਜੇਠ ਨੂੰ ਲੱਸੀ ਨਹੀਂ ਦੇਣੀ, ਦਿਉਰ ਭਾਵੇਂ ਦੁੱਧ ਪੀ ਲਵੇ।

ਬਰਤਾਨਵੀ ਪ੍ਰਧਾਨ ਮੰਤਰੀ ਲਿਜ਼ ਟਰੱਸ ਵਲੋਂ ਦੇ ਦਿਤਾ ਗਿਆ ਅਸਤੀਫ਼ਾ- ਇਕ ਖ਼ਬਰ

ਕੋਹ ਨਾ ਚਲੀ, ਬਾਬਾ ਤ੍ਰਿਹਾਈ।

ਚਿੱਟਾ ਵੇਚਣ ਵਾਲ਼ੇ ਤਿੰਨ ਦੋਸ਼ੀ ਪੁਲਿਸ ਨੇ ਕੀਤੇ ਕਾਬੂ, ਇਕ ਫ਼ਰਾਰ।

ਪੁਲਿਸ ਜੀ, ਕਦੀ ਵੇਚਣ ਵਾਲ਼ਿਆਂ ਨੂੰ ਇਹ ਵੀ ਪੁੱਛ ਲਿਆ ਕਰੋ ਕਿ ਉਹ ਲਿਆਉਂਦੇ ਕਿੱਥੋਂ ਹਨ।

ਪੈਰੋਲ ‘ਤੇ ਆਏ ਸੌਦਾ ਸਾਧ ਦੇ ‘ਸਤਿਸੰਗ’ ਵਿਚ ਪਹੁੰਚੇ ਭਾਜਪਾ ਆਗੂ- ਇਕ ਖ਼ਬਰ

ਹਾਏ ਰੇ ਯੇਹ ਵੋਟ ਕੀ ਮਜਬੂਰੀਆਂ, ਮਿਟਾਨੀ ਪੜਤੀਂ ਹੈਂ ਕਿਤਨੀ ਦੂਰੀਆਂ।

ਜਗੀਰ ਕੌਰ ਵਲੋਂ ਸ਼੍ਰੋਮਣੀ ਕਮੇਟੀ ਦੇ ਪ੍ਰਧਾਨ ਦੀ ਚੋਣ ਲੜਨ ਦਾ ਐਲਾਨ- ਇਕ ਖ਼ਬਰ

ਮੈਨੂੰ ਨਰਮ ਕੁੜੀ ਨਾ ਜਾਣੀ, ਲੜ ਜੂੰ ਭਰਿੰਡ ਬਣ ਕੇ।

ਚੀਨ ਦੀ ਧਮਕੀ ਦਾ ਤਾਇਵਾਨ ਨੇ ਮੂੰਹ ਤੋੜ ਜਵਾਬ ਦਿਤਾ, ਕਿਹਾ- ਕੋਈ ਸਮਝੌਤਾ ਮੰਨਜ਼ੂਰ ਨਹੀਂ- ਇਕ ਖ਼ਬਰ

ਗੱਲ ਸੋਚ ਕੇ ਕਰੀਂ ਜ਼ੈਲਦਾਰਾ, ਅਸਾਂ ਨਹੀਂ ਕਨੌੜ ਝੱਲਣੀ।

ਬਾਜਵਾ ਨੇ ਭਗਵੰਤ ਮਾਨ ਨੂੰ ਦਿਤੀ ਸਲਾਹ, ਗੁਜਰਾਤ ਲਈ ਪੰਜਾਬ ਨਾ ਛੱਡੋ-ਇਕ ਖ਼ਬਰ

ਕਾਹਨੂੰ ਚੂਪਨੈ ਚਰ੍ਹੀ ਦੇ ਟਾਂਡੇ, ਘਰ ‘ਚ ਸੰਧੂਰੀ ਅੰਬੀਆਂ।

ਚੀਨ ਨੇ ਸ਼ਾਹਿਦ ਮਹਿਮੂਦ ਨੂੰ ਆਲਮੀ ਅੱਤਵਾਦੀ ਐਲਾਨਣ ਦੇ ਮਤੇ ‘ਚ ਪਾਇਆ ਅੜਿੱਕਾ- ਇਕ ਖ਼ਬਰ

ਮੂੰਹ ਉਂਗਲਾਂ ਘੱਤ ਕੇ ਕਹਿਣ ਸਭੇ, ਕਾਰੇ ਕਰਨ ਥੀਂ ਇਹ ਨਾ ਸੰਗਦਾ ਏ।

ਉੱਪ ਕੁਲਪਤੀ ਨਾ ਹਟਾਇਆ ਤਾਂ ਮੈਂ ਕਾਨੂੰਨੀ ਸਲਾਹ ਲਵਾਂਗਾ- ਰਾਜਪਾਲ ਪੁਰੋਹਿਤ

ਭੰਨ ਕੇ ਟਰੱਕ ਬਹਿ ਗਿਆ, ਅੱਖਾਂ ਤੱਤੀਆਂ ਕਰਨ ਦਾ ਮਾਰਾ।

ਪੰਜਾਬ ਐਗਰੀਕਲਚਰ ਯੂਨੀਵਰਸਿਟੀ ਦਾ ਵੀ.ਸੀ. ਪੰਜਾਬ ਸਰਕਾਰ ਨਹੀਂ ਬਦਲੇਗੀ- ਇਕ ਖ਼ਬਰ

ਖਾ ਲਈ ਅਸੀਂ ਵੀ ਕਸਮ, ਪਾਣੀ ਉੱਚਿਆਂ ਪੁਲ਼ਾਂ ‘ਤੇ ਚਾੜ੍ਹਨਾ।

ਮਨੁੱਖੀ ਅਧਿਕਾਰਾਂ ਦਾ ਸਨਮਾਨ ਕਰੇ ਭਾਰਤ- ਗੁਟੇਰੇਜ਼

ਬਦੀਆਂ ਨਾ ਕਰ ਵੇ, ਕੈ ਦਿਨ ਦੀ ਜ਼ਿੰਦਗਾਨੀ।

ਗੁਜਰਾਤ ਵਿਚ ਇਸ ਵਾਰ ਲੋਕ ਆਮ ਆਦਮੀ ਪਾਰਟੀ ਨੂੰ ਮੌਕਾ ਦੇਣਗੇ- ‘ਆਪ’ ਪਾਰਟੀ ਬੁਲਾਰਾ

ਹੌਲ਼ੀ ਹੌਲ਼ੀ ਚੜ੍ਹ ਮੁੰਡਿਆ, ਮੈਂ ਪਤਲੇ ਬਾਂਸ ਦੀ ਪੌੜੀ।

17 ਅਕਤੂਬਰ 2022

ਕੋਟਕਪੂਰਾ ਗੋਲ਼ੀ ਕਾਂਡ ਬਾਰੇ ਐਸ.ਆਈ. ਟੀ. ਨੇ ਪ੍ਰਕਾਸ਼ ਸਿੰਘ ਬਾਦਲ ਤੋਂ ਪੁੱਛ-ਗਿੱਛ ਕੀਤੀ-ਇਕ ਖ਼ਬਰ

ਕੁਝ ਬੋਲ ਵੇ ਦਿਲਾਂ ਦੀ ਘੁੰਡੀ ਖੋਲ੍ਹ ਵੇ, ਕਿ ਸੱਤ ਸਾਲ ਹੋ ਗਏ ਬਾਬਿਆ।

ਪੰਜਾਬ ਵਿਚ ਨਾ ਧਰਨੇ ਰੁਕੇ ਤੇ ਨਾ ਹੀ ਜਾਮ ਖੁੱਲ੍ਹੇ-ਇਕ ਖ਼ਬਰ

ਨਾ ਝੰਗ ਛੁੱਟਿਆ ਨਾ ਕੰਨ ਪਾਟੇ, ਝੁੰਡ ਲੰਘ ਗਿਆ ਇੰਜ ਹੀਰਾਂ ਦਾ।

ਐਸ.ਆਈ.ਟੀ. ਫੋਰੈਜ਼ਿੰਕ ਮਾਹਰ ਲੈ ਕੇ ਕੋਟਕਪੂਰੇ ਜਾਂਚ ਲਈ ਪੁੱਜੀ- ਇਕ ਖ਼ਬਰ

ਨਹੀਂ ਲੱਭਣੇ ਲਾਲ ਗੁਆਚੇ, ਮਿੱਟੀ ਨਾ ਫ਼ਰੋਲ ਜੋਗੀਆ।

ਪਰਾਲ਼ੀ ਦੇ ਹੱਲ ਲਈ ਕੇਂਦਰ ਅਤੇ ਸੂਬਾ ਸਰਕਾਰ ਹੋਈਆਂ ਫੇਲ੍ਹ- ਪ੍ਰਤਾਪ ਸਿੰਘ ਬਾਜਵਾ

ਬਾਜਵਾ ਸਾਬ ਤੁਹਾਡੀ ਸਰਕਾਰ ਵੇਲੇ ਕੀ ਪਰਾਲ਼ੀ ਛੂਮੰਤਰ ਹੋ ਜਾਂਦੀ ਸੀ?

ਕਾਰਪੋਰੇਟ ਘਰਾਣਿਆਂ ਨੂੰ ਲਾਭ ਦੇਣ ਅਤੇ ਕਿਸਾਨਾਂ ਵਿਰੁੱਧ ਸਾਜ਼ਿਸ਼ਾਂ ਰਚ ਰਹੀ ਹੈ ਸਰਕਾਰ-ਸੁਪਿੰਦਰ ਬੱਗਾ

ਐਰ ਗ਼ੈਰ ਨੂੰ ਸ਼ੱਕਰ ਦਾ ਦਾਣਾ, ਭਗਤੇ ਨੂੰ ਖੰਡ ਪਾ ਦਿਉ।

ਪੰਜਾਬ ਦੇ ਦਰਿਆਈ ਪਾਣੀਆਂ ਬਾਰੇ ਭਗਵੰਤ ਮਾਨ ਕੋਲ ਸਪਸ਼ਟਤਾ ਦੀ ਘਾਟ- ਬਾਜਵਾ

ਚਾਂਦੀ ਦੀਆਂ ਕਹੀਆਂ ਨਾਲ ਨਹਿਰ ਪੁੱਟਣ ਵਾਲਿਆਂ ਕੋਲ ਕਿਹੜੀ ਸਪਸ਼ਟਤਾ ਸੀ?

ਹਰਿਆਣਾ ਸਰਕਾਰ ਨਾਲ ਗੱਲਬਾਤ ਦੀ ਥਾਂ ਨਹਿਰ ਨੂੰ ਪੂਰਨਾ ਸ਼ੁਰੂ ਕਰੋ- ਰਾਜਾ ਵੜਿੰਗ

ਨਾ ਰਹੇ ਬਾਂਸ, ਨਾ ਵਜੇ ਬੰਸਰੀ।

ਏ.ਆਈ.ਜੀ. ਕਪੂਰ ਦੀਆਂ ਚੰਡੀਗੜ੍ਹ, ਪਟਿਆਲਾ ਤੇ ਲਹਿਰਾ ਗਾਗਾ ‘ਚ 15 ਕਰੋੜ ਦੀਆਂ 8 ਜਾਇਦਾਦਾਂ- ਇਕ ਖ਼ਬਰ

ਚੋਰਾਂ ਦੇ ਕੱਪੜੇ, ਡਾਂਗਾਂ ਦੇ ਗਜ਼।

ਜਿੱਥੋਂ ਠੀਕ ਲੱਗੇਗਾ, ਅਸੀਂ ਉੱਥੋਂ ਹੀ ਤੇਲ ਖਰੀਦਾਂਗੇ- ਹਰਦੀਪ ਸਿੰਘ ਪੁਰੀ

ਛਾਂਵੇਂ ਬਹਿ ਕੇ ਕੱਤਿਆ ਕਰੂੰ, ਵਿਹੜੇ ਲਾ ਤ੍ਰਿਵੈਣੀ।

ਹਕੂਮਤਾਂ ਤੋਂ ਇਨਸਾਫ਼ ਦੀ ਸਾਨੂੰ ਆਸ ਨਹੀਂ ਰਹੀ- ਬਲਕੌਰ ਸਿੰਘ

ਕਾਦਰਯਾਰ ਅਣਹੋਣੀਆਂ ਕਰਨ ਜਿਹੜੇ, ਆਖਰਵਾਰ ਉਹਨਾਂ ਪੱਛੋਤਾਵਣਾ ਈ।

ਪੰਜਾਬ ਦੇ ‘ਆਪ’ ਵਿਧਾਇਕਾਂ ਨੇ ਲਾਏ ਗੁਜਰਾਤ ਵਿਚ ਡੇਰੇ- ਇਕ ਖ਼ਬਰ

ਚਲ ਚੱਲੀਏ ਅਠੌਲੇ ਵਾਲ਼ੇ ਮੇਲੇ, ਸਭ ਛੱਡ ਦੇ ਹੋਰ ਝਮੇਲੇ।

ਕੇਂਦਰ ਸਰਕਾਰ ਮੰਡੀਆਂ ਤੋੜਨ ਦੇ ਨਵੇਂ ਢੰਗ ਲੱਭ ਰਹੀ ਹੈ-ਰਾਜੇਵਾਲ

ਬੰਨੇ ਬੰਨੇ ਹੀਰ ਭਾਲ਼ਦਾ, ਰਾਂਝਾ ਪੱਜ ਮੱਝੀਆਂ ਦਾ ਲਾਵੇ।

ਸੁਖਬੀਰ ਦੀ ਸ਼ਮੂਲੀਅਤ ਵਾਲੀ ਕਿਸੇ ਕਮੇਟੀ ਵਿਚ ਸ਼ਾਮਲ ਨਹੀਂ ਹੋਣਗੇ ਢੀਂਡਸਾ-ਦਵਿੰਦਰ ਸਿੰਘ ਸੋਢੀ

ਤੇਰੀ ਤੋੜ ਕੇ ਛੱਡਣਗੇ ਗਾਨੀ, ਵੱਸ ਪੈ ਗਈ ਅੜ੍ਹਬਾਂ ਦੇ।

ਪੰਜਾਬ ਦੇ ਮਸਲੇ ਵਿਚ ਕਦੇ ਪਿੱਠ ਨਹੀਂ ਵਿਖਾਵਾਂਗਾ- ਲੱਖਾ ਸਿਧਾਣਾ

ਪੱਤਣੋਂ ਪਾਰ ਲੰਘਣਾ, ਮੈਨੂੰ ਯਾਰ ਉਡੀਕੇ ਖੜ੍ਹ ਕੇ।

ਬਾਦਲਾਂ ਤੇ ਸਰਨਿਆਂ ਦੀ ਏਕਤਾ ਪੰਥਕ ਨਹੀਂ,ਨਿਰੋਲ ਵਪਾਰਕ ਏਕਤਾ ਹੈ- ਹਰਮੀਤ ਸਿੰਘ ਕਾਲਕਾ

ਹਾਰ ਕੇ ਜੇਠ ਨਾਲ਼ ਲਾਈਆਂ, ਮਰਦੀ ਨੇ ਅੱਕ ਚੱਬਿਆ।

09  ਅਕਤੂਬਰ 2022

ਇਕ ਕਰੋੜ ਦੀ ਰਿਸ਼ਵਤ ਲੈਣ ਦੇ ਦੋਸ਼ ਵਿਚ ਏ.ਆਈ.ਜੀ. ਅਸ਼ੀਸ਼ ਕਪੂਰ ਵਿਜੀਲੈਂਸ ਵਲੋਂ ਗ੍ਰਿਫ਼ਤਾਰ- ਇਕ ਖ਼ਬਰ
ਸੁਣ ਲੇ ਨਿਹਾਲੀਏ ਚੋਰਾਂ ਦੀਆਂ ਗੱਲਾਂ।

ਕੇਂਦਰ ਨੇ ਅਸਿੱਧੇ ਢੰਗ ਨਾਲ ਸਿੱਖਾਂ ਦੇ ਮਸਲਿਆਂ ‘ਚ ਦਖ਼ਲ ਦਿਤਾ- ਚੰਦੂਮਾਜਰਾ
ਵਿਹੜੇ ਵੜਦਾ ਖੜਕ ਨਈਉਂ ਕਰਦਾ, ਬਾਬੇ ਗਲ਼ ਟੱਲ ਦਿਉ।

ਪੰਥਕ ਏਕਤਾ ਦੇ ਨਾਂ ‘ਤੇ ਸਰਨਿਆਂ ਤੇ ਬਾਦਲਾਂ ਵਿਚ ਗਲਵਕੜੀ ਪੈ ਗਈ- ਇਕ ਖ਼ਬਰ
ਸੱਪ ਨੂੰ ਸੱਪ ਲੜੇ ਤੇ ਜ਼ਹਿਰ ਕਿਸ ਨੂੰ ਚੜ੍ਹੇ।

ਯੂਕਰੇਨ ਨੂੰ ਚਾਰ ਹੋਰ ਆਧੁਨਿਕ ਰਾਕਟ ਸਿਸਟਮ ਦੇਵੇਗਾ ਅਮਰੀਕਾ-ਇਕ ਖ਼ਬਰ
ਚੜ੍ਹ ਜਾ ਬੱਚਾ ਸੂਲ਼ੀ, ਰਾਮ ਭਲੀ ਕਰੇਗਾ।

ਮੈਂ ਨਹੀਂ ਪਾਈ ਸਰਕਾਰ ਦੇ ਹੱਕ ‘ਚ ਵੋਟ, ਨਾ ਕੀਤਾ ਸਮਰਥਨ- ਇਯਾਲੀ
ਗ਼ਲਤ ਮਾਈ ਧੰਨੋ ਵੀ ਨਹੀਂ, ਠੀਕ ਭਾਈਆ ਬੰਤਾ ਸੂੰਹ ਵੀ ਆ।

ਭਗਵੰਤ ਮਾਨ ਅੰਨ੍ਹੇਵਾਹ ਕੇਜਰੀਵਾਲ ਮਗਰ ਲੱਗਣਾ ਬੰਦ ਕਰੇ – ਬਾਜਵਾ
ਅੰਨ੍ਹਿਆਂ ਦੀ ਮੰਡੀ ਦਾ, ਛੱਡ ਦੇ ਸਾਕ ਕੁਸੰਗਾ।

ਲਾਵਾਰਿਸ ਸਾਨ੍ਹ ਨੇ ਅੱਠ ਮੋਟਰਸਾਈਕਲ ਤੇ ਇਕ ਕਾਰ ਨੁਕਸਾਨੀ- ਇਕ ਖ਼ਬਰ
ਆਤੰਕਵਾਦੀ ਸਾਨ੍ਹ।

ਸ਼੍ਰੋਮਣੀ ਕਮੇਟੀ ਨੂੰ ਤੋੜਨ ਦੀਆਂ ਸਾਜ਼ਿਸ਼ਾਂ ਸਫ਼ਲ ਨਹੀਂ ਹੋਣ ਦਿਆਂਗੇ- ਡਾ.ਚੀਮਾ
ਪਾਕਿਸਤਾਨ ਗੁਰਦੁਆਰਾ ਕਮੇਟੀ ਬਣਨ ਵੇਲੇ ਵੀ ਇਹੋ ਜਿਹੇ ਦਮਗਜ਼ੇ ਮਾਰੇ ਸੀ ਤੁਸੀਂ।

ਸ਼੍ਰੋਮਣੀ ਕਮੇਟੀ ਵਲੋਂ ਕੀਤੇ ਜਾ ਰਹੇ ਰੋਸ ਪ੍ਰਦਰਸ਼ਨਾਂ ‘ਚ ਵੱਧ ਤੋ ਵੱਧ ਸੰਗਤ ਹਾਜ਼ਰ ਹੋਵੇ- ਗੁਰਪ੍ਰੀਤ ਸਿੰਘ ਗੋਪੀ
ਰੱਬ ਦਾ ਵਾਸਤਾ ਈ ਸੰਗਤ ਜੀ, ਬਚਾ ਲਵੋ ਬਾਦਲਾਂ ਨੂੰ, ਕਰੋ ਕਿਰਪਾ।

ਭਾਜਪਾ ਦਾ ਮੁਕਾਬਲਾ ਕਰਨ ਲਈ ਨਵੀਂ ਸੋਚ ਵਾਲੀ ਕਾਂਗਰਸ ਦੀ ਲੋੜ- ਸ਼ਸ਼ੀ ਥਰੂਰ
ਕੰਤ ਸਹੇੜੀਂ ਵੇ ਬਾਬਲਾ, ਗੁਟਕੂੰ ਗੁਟਕੂੰ ਕਰਦਾ।

ਹਰਿਆਣਾ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਝੀਂਡਾ ਨੂੰ ਹਟਾਇਆ- ਇਕ ਖ਼ਬਰ
ਸੁੱਤੀ ਪਈ ਤੋਂ ਝਾਂਜਰਾਂ ਲਾਹੀਆਂ, ਵੈਲੀ ਨਾ ਹੋਵੇ ਪੁੱਤ ਜੱਟ ਦਾ।

ਨਿਜੀ ਮੁਫ਼ਾਦਾਂ ਲਈ ਨਹੀਂ, ਪੰਥ ਦੇ ਭਲੇ ਲਈ ਸੁਖਬੀਰ ਬਾਦਲ ਨਾਲ ਗੱਠਜੋੜ ਕਰ ਰਿਹਾ ਹਾਂ- ਸਰਨਾ
ਪੰਥ ਦੇ ਭਲੇ ਲਈ ਬਾਦਲਾਂ ਨਾਲ਼ ਗੱਠ-ਜੋੜ! ਹਾ ਹਾ ਹਾ ਹਾ........

ਭਾਜਪਾ ‘ਚ ਜਾ ਕੇ ਸੁਨੀਲ ਜਾਖੜ ਦੀ ਸ਼ਬਦਾਵਲੀ ‘ਚੋਂ ਤਹਿਜ਼ੀਬ ਗ਼ਾਇਬ ਹੋਣ ‘ਤੇ ਅਫ਼ਸੋਸ- ਸਿਮਰਨਜੀਤ ਸਿੰਘ ਮਾਨ
ਤੁਹਾਡੀ ਸ਼ਬਦਾਵਲੀ ‘ਚ ਹਰ ਵੇਲੇ ‘ਟੈਂਕਾ’ ਲਟਕਦਾ ਰਹਿੰਦਾ ਮਾਨ ਸਾਬ।

ਕਾਂਗਰਸ ਨੂੰ ਆਪਣਾ ਕਾਰਜਕਾਲ ਯਾਦ ਕਰਨਾ ਚਾਹੀਦੈ- ਅਮਨ ਅਰੋੜਾ
ਸੱਸ ਭੈੜੀ ਮਾਰੇ ਬੋਲੀਆਂ, ਦਿਨ ਭੁੱਲ ਗਈ ਕਲਹਿਣੀ ਆਪਣੇ।

ਗੁਜਰਾਤ ਦੇ ਵੋਟਰ ‘ਆਪ’ ਪਾਰਟੀ ਦੀਆਂ ਨੀਤੀਆਂ ਤੋਂ ਖੁਸ਼- ਆਪ ਬੁਲਾਰਾ
ਆਪੇ ਮੈਂ ਰੱਜੀ ਪੁੱਜੀ, ਆਪੇ ਮੇਰੇ ਬੱਚੇ ਜਿਊਣ।