ਜ਼ਿੰਦਗੀ ਨੂੰ ਖੁਸ਼ਗਵਾਰ ਬਣਾਉਣ ਲਈ ਸਿਆਣਪ ਦੇ ਨਾਲ ਨਾਲ ਥੋੜ੍ਹਾ ਜਿਹਾ ਬਚਪਨ ਵੀ ਜਰੂਰੀ ਹੈ। ਸਿਆਣਪ ਸਾਨੂੰ ਤਜਰਬਾ ਦਿੰਦੀ ਹੈ, ਗਲਤ-ਸਹੀ ਦੀ ਪਹਿਚਾਣ ਕਰਵਾਉਂਦੀ ਹੈ, ਪਰ ਜਦੋਂ ਇਹ ਬਹੁਤ ਵੱਧ ਜਾਂਦੀ ਹੈ ਤਾਂ ਜੀਵਨ ਤੋਂ ਹਾਸੇ ਤੇ ਮਾਸੂਮ ਖੁਸ਼ੀਆਂ ਦੂਰ ਹੋਣ ਲੱਗਦੀਆਂ ਹਨ। ਹਰ ਗੱਲ ਨੂੰ ਬਹੁਤ ਸੋਚਣ ਨਾਲ ਜ਼ਿੰਦਗੀ ਬੇਰਸ ਹੋ ਜਾਂਦੀ ਹੈ। ਬਚਪਨ ਦੀ ਮਾਸੂਮੀਅਤ ਤੇ ਚੁਲਬੁਲਾਪਨ ਜੀਵਨ ਦੇ ਰੰਗਾਂ ਨੂੰ ਬਣਾਈ ਰੱਖਦਾ ਹੈ। ਬੱਚਿਆਂ ਨਾਲ ਬੱਚਿਆਂ ਵਾਂਗ ਗੱਲ ਕਰਨਾ, ਛੋਟੀਆਂ ਗੱਲਾਂ ਵਿੱਚ ਖੁਸ਼ ਹੋਣਾ ਅਤੇ ਸਾਦਗੀ ਨਾਲ ਹੱਸਣਾ ਹੀ ਜ਼ਿੰਦਗੀ ਦੇ ਸੁਆਦ ਨੂੰ ਵਧਾਉਂਦਾ ਹੈ। ਅੱਜਕੱਲ੍ਹ ਦੇ ਵੱਧਦੇ ਤਣਾਓ ਵਾਲੇ ਮਾਹੌਲ ਵਿੱਚ ਬਚਪਨ ਵਾਲੀ ਭੋਲਭਾਲੀ ਸੋਚ ਮਨੁੱਖ ਲਈ ਦਿਲ ਦੀ ਦਵਾਈ ਸਾਬਤ ਹੁੰਦੀ ਹੈ।
ਕਈ ਮਾਵਾਂ ਕਹਿੰਦੀਆਂ ਹਨ ਕਿ ਉਹ ਆਪਣੇ ਬੇਟਿਆਂ ਨਾਲ ਬੱਚਿਆਂ ਵਾਂਗ ਹੀ ਗੱਲ ਕਰਦੀਆਂ ਹਨ। ਕਈ ਵਾਰ ਤੋਤਲੀ ਆਵਾਜ਼ ਵਿੱਚ ਗੱਲ ਕਰਨ ‘ਤੇ ਬੱਚੇ ਹੱਸ ਪੈਂਦੇ ਹਨ, ਪਰ ਉਹ ਪਲ ਜੀਵਨ ਦੇ ਸਭ ਤੋਂ ਸੁਹਾਵਣੇ ਪਲ ਬਣ ਜਾਂਦੇ ਹਨ। ਇਹੀ ਅਸਲੀ ਖੁਸ਼ੀ ਹੈ ਜੋ ਮਨੁੱਖ ਨੂੰ ਦਿਲੋਂ ਜੀਣ ਦੀ ਪ੍ਰੇਰਣਾ ਦਿੰਦੀ ਹੈ। ਸਮਾਜ ਦੇ ਵਿਦਵਾਨ ਮੰਨਦੇ ਹਨ ਕਿ ਜ਼ਿੰਦਗੀ ਨੂੰ ਰੰਗੀਨ ਤੇ ਮਾਣਯੋਗ ਬਣਾਉਣ ਲਈ ਸਿਆਣਪ ਦੇ ਨਾਲ ਥੋੜ੍ਹਾ ਜਿਹਾ ਬਚਪਨ ਸੰਭਾਲ ਕੇ ਰੱਖਣਾ ਬਹੁਤ ਜਰੂਰੀ ਹੈ। ਇਹੀ ਬਚਪਨ ਮਨੁੱਖ ਨੂੰ ਮੁਸਕਰਾਉਣਾ ਸਿਖਾਉਂਦਾ ਹੈ ਅਤੇ ਜੀਵਨ ਦੇ ਹਰ ਪਲ ਨੂੰ ਖੁਸ਼ੀ ਨਾਲ ਜੀਣ ਦਾ ਮੌਕਾ ਦਿੰਦਾ ਹੈ।
ਗੁਰਮੀਤ ਕੌਰ ਕਾਹਲੋਂ
ਗੱਗੜਪੁਰ

ਕੁੱਝ ਰਿਸ਼ਤੇ ਮੈਨੂੰ ਸੀਤ ਹਵਾ ਵਰਗੇ ਲੱਗਦੇ ਨੇ,
ਜਿਹੜੇ ਤਪਦੀ ਲੋਅ ਵਿੱਚ ਠੰਢਕ ਦਾ ਅਹਿਸਾਸ ਕਾਲਜੇ ਲਾਉਦੇ ਨੇ।
ਕੁੱਝ ਰਿਸ਼ਤੇ ਗਰਮ ਹਵਾਵਾਂ ਵਰਗੇ,
ਜਿਹੜੇ  ਪੋਹ ਮਾਘ ਦੀ ਠੰਢ ਵਿੱਚ ਮੇਰਾ ਨਿੱਘ ਬਣਦੇ ਨੇ,
ਕੁੱਝ ਰਿਸ਼ਤੇ ਚੱਟਾਨਾ ਵਰਗੇ
ਜਿਹੜੇ ਹਰ ਚੰਗੇ ਮਾੜੇ ਸਮੇਂ ਨਾਲ ਖੜੇ ਹੀ ਰਹਿੰਦੇ ਨੇ।
ਕੁੱਝ ਰਿਸ਼ਤੇ ਮੋਮ ਵਰਗੇ
ਜਿਹੜੇ ਮੇਰੇ ਲਈ ਆਪਣੇ ਆਪ ਨੂੰ ਪਿਘਲਾ ਰਹੇ ਨੇ,
ਕੁੱਝ ਰਿਸ਼ਤੇ ਕੱਚ ਵਰਗੇ ਨੇ
ਜਿਹੜੇ ਬਹੁਤ ਡਰ ਲੱਗਦਾ ਹੱਥ ਚੋ ਛੁੱਟ ਨਾ ਜਾਣ।
ਕੁੱਝ ਰਿਸ਼ਤੇ ਉਮੀਦ ਵਰਗੇ ਲੱਗਦੇ ਨੇ,
ਜਿਹੜੀ ਕਦੇ ਡੋਲ ਤਾਂ ਜਾਂਦੀ ਏ ਪਰ ਸਾਥ ਹਮੇਸ਼ਾ ਰਹਿੰਦੀ ਏ।
ਕੁੱਝ ਰਿਸ਼ਤੇ ਮੈਨੂੰ ਸਾਝ ਵਰਗੇ ਲੱਗਦੇ ਨੇ,
ਜੋ ਦਿਲੋਂ ਟੁੱਟਦੀ ਹੀ ਨਹੀਂ
ਕੁੱਝ ਰਿਸ਼ਤੇ ਮੇਰੀ ਮੁਸਕਾਨ ਨੇ।
ਜਿੰਨਾ ਨੂੰ ਮੈ ਹਮੇਸ਼ਾ ਬੁੱਲਾ ਤੇ  ਰੱਖਦੀ ਹਾਂ,
ਤੇ ਕੁੱਝ ਰਿਸ਼ਤੇ ਮੇਰੀ ਜਾਨ ਨੇ।
ਜਿੰਨਾ ਲਈ ਮੈਂ ਕਦੇ ਆਪਣੀ ਪਰਵਾਹ ਨਹੀਂ ਕੀਤੀ,
ਮੇਰੇ ਨਾਲ ਜੁੜੇ ਸਾਰੇ ਰਿਸ਼ਤੇ ਅਨਮੋਲ ਨੇ।
ਜਿੰਨਾ ਨੂੰ ਮੈ ਬਹੁਤ ਸਾਭਂ ਕੇ  ਰੱਖਦੀ ਹਾਂ।