23 ਜਨਵਰੀ 2023

ਭਗਵੰਤ ਮਾਨ ਨੂੰ ਆਪ ਸਰਕਾਰ ਚਲਾਉਣੀ ਚਾਹੀਦੀ ਹੈ ਨਾ ਕਿ ਕਿਸੇ ਰੀਮੋਟ ਕੰਟਰੋਲ ਨਾਲ਼- ਰਾਹੁਲ ਗਾਂਧੀ
ਰਾਹੁਲ ਜੀ ਪਹਿਲਾਂ ਆਪਣੀ ਪੀੜ੍ਹੀ ਹੇਠ ਸੋਟਾ ਫੇਰੋ ਫਿਰ ਸਲਾਹ ਦਿਉ।

ਅਪਣੇ ਬਿੱਗ ਬੌਸ ਨੂੰ ਖੁਸ਼ ਕਰਨ ਲਈ ਰਾਜਪਾਲ ਕਬੀਲੇ ਦੇ ਸਰਦਾਰ ਵਾਂਗ ਰਵਈਆ ਅਪਨਾਅ ਰਹੇ ਹਨ- ਸਿਸੋਦੀਆ
ਖ਼ੁਸ਼ ਮਾਹੀ ਨੂੰ ਕਰਨ ਦੀ ਮਾਰੀ, ਸੁਰਮਾ ਪਾਈ ਰੱਖਦੀ।

ਮੁੱਖ ਮੰਤਰੀ ਵਲੋਂ ਜ਼ੀਰਾ ਸ਼ਰਾਬ ਫੈਕਟਰੀ ਬੰਦ ਕਰਨ ਦੇ ਹੁਕਮ- ਇਕ ਖ਼ਬਰ
ਨਾ ਰਹੇ ਬਾਂਸ, ਨਾ ਵੱਜੇ ਬੰਸਰੀ।

ਮਨਪ੍ਰੀਤ ਬਾਦਲ ਨੂੰ ਸੱਤਾ ਦੀ  ਭੁੱਖ ਹੈ- ਰਾਜਾ ਵੜਿੰਗ
ਰਾਜਾ ਵੜਿੰਗ ਜੀ ਇਸ ਹਮਾਮ ਵਿਚ ਸਾਰੇ ਹੀ ਨੰਗੇ ਹਨ।

ਮਨਪ੍ਰੀਤ  ਬਾਦਲ ਨੇ ਕਾਂਗਰਸ ਦਾ ਪੱਲਾ ਛੱਡ ਕੇ ਭਾਜਪਾ ਦਾ ਹੱਥ ਫੜਿਆ- ਇਕ ਖ਼ਬਰ
ਮੇਰੀ ਬਾਂਹਿਂ ਨਾ ਛੋੜੀਂ ਜੀ ਮੈਂ ਲਾਗੀ ਲੜ ਤੇਰੇ, ਲੜ ਤੇਰੇ।

ਸਿੱਖਾਂ ਵਿਚ ਅਕਾਲੀ ਫੂਲਾ ਸਿੰਘ ਵਰਗੇ ਕਿਰਦਾਰਾਂ ਦੀ ਘਾਟ-  ਗਿਆਨੀ ਹਰਪ੍ਰੀਤ ਸਿੰਘ
ਗੁਰਮੁਖ ਪਿਆਰਿਓ ਤੁਹਾਡੇ ਕੋਲ ਹੁਣ ਮੌਕਾ ਹੈ, ਕਰੋ ਇਹ ਘਾਟ ਪੂਰੀ।

ਬਾਦਲ ਅਕਾਲੀ ਦਲ ਨੇ ਪੰਥਕ ਸਲਾਹਕਾਰ ਬੋਰਡ ਬਣਾਇਆ- ਇਕ ਖ਼ਬਰ
ਜੋ ਸੌਦਾ ਸਾਧ ਅਤੇ ਭਾਜਪਾ ਨਾਲ਼ ਨੇੜਤਾ ਦੀਆਂ ਸੰਭਾਵਨਾਵਾਂ ਤਲਾਸ਼ੇਗਾ।

ਭਾਜਪਾ ਤੋਂ ਬਾਅਦ ਹੁਣ ਬਸਪਾ ਵਲੋਂ ਵੀ ਅਕਾਲੀ ਦਲ ਨਾਲ ਗੱਠਜੋੜ ਤੋੜਨ ਦੇ ਸੰਕੇਤ- ਇਕ ਖ਼ਬਰ
ਮੇਰੀ ਲਗਦੀ ਕਿਸੇ ਨਾ ਦੇਖੀ ਕਿ ਟੁੱਟਦੀ ਨੂੰ ਜੱਗ ਜਾਣਦਾ।

ਸੁਖਬੀਰ ਬਾਦਲ ਨੇ ਸੌਦਾ ਸਾਧ ਨੂੰ ਪੈਰੋਲ ਦਿਤੇ ਜਾਣ ਦੀ ਕੀਤੀ ਨਿਖੇਧੀ- ਇਕ ਖ਼ਬਰ
ਨਾਮ ਦਾਨ ਦੇ ਸਾਬਣ ਨਾਲ਼ ਧੋ ਲੈ, ਪਾਪਾਂ ਵਾਲ਼ੀ ਮੈਲ਼ੀ ਜਿੰਦੜੀ।

ਕੇਂਦਰ ਦੇ ਇਸ਼ਾਰੇ ‘ਤੇ ਸੂਬਿਆਂ ਨੂੰ ਪਰੇਸ਼ਾਨ ਕਰ ਰਹੇ ਹਨ ਰਾਜਪਾਲ- ਭਗਵੰਤ ਮਾਨ
ਚੁੱਕੀ ਹੋਈ ਪੰਚਾਂ ਦੀ, ਠਾਣੇਦਾਰ ਦੇ ਬਰਾਬਰ ਬੋਲੇ।

ਪੰਜਾਬ ਦੇ ਆਗੂਆਂ ਨੂੰ ਬਾਈਪਾਸ ਕਰਨ ਲੱਗੀ ਭਾਜਪਾ ਹਾਈ ਕਮਾਨ- ਇਕ ਖ਼ਬਰ
ਨਵਿਆਂ ਦੇ ਸੰਗ ਲੱਗ ਕੇ, ਭੁੱਲ ਗਈ ਯਾਰ ਪੁਰਾਣੇ।

ਸੌਦਾ ਸਾਧ ਨੇ ਮੁੜ ਪਾਈ ਪੈਰੋਲ ਦੀ ਅਰਜ਼ੀ- ਇਕ ਖ਼ਬਰ
ਟਿੱਲੇ ਵਾਲ਼ਿਆਂ ਮਿਲਾ ਦੇ ਜੱਟੀ ਹੀਰ ਨੂੰ, ਤੇਰਾ ਕਿਹੜਾ ਮੁੱਲ ਲਗਦਾ।

ਮਨਪ੍ਰੀਤ ਬਾਦਲ ਨੇ ਪਹਿਲਾਂ ਅਕਾਲੀ ਦਲ ਦਾ ਭੋਗ ਪਾਇਆ ਹੁਣ ਸਾਡਾ ਪਾ ਗਿਐ- ਪਰਤਾਪ ਸਿੰਘ ਬਾਜਵਾ
ਉਡ ਕੇ ਚਿੰਬੜ ਗਿਆ, ਕਿਸੇ ਚੰਦਰੀ ਵਾੜ ਦਾ ਛਾਪਾ।

ਨਿਆਂਪਾਲਿਕਾ ‘ਤੇ ਕਬਜ਼ਾ ਕਰਨਾ ਚਾਹੁੰਦੀ ਹੈ ਸਰਕਾਰ- ਕਪਿਲ ਸਿੱਬਲ
ਮੇਰੀ ਸੇਜ ‘ਤੇ ਸੌਂ ਗਿਆ ਨੀਂ, ਉਹ ਰਾਂਝਣ ਮੱਲੋਜ਼ੋਰੀਂ।

ਪੰਜਾਬ ਕਾਂਗਰਸ ਦੀ ਮੌਜੂਦਾ ਲੀਡਰਸ਼ਿੱਪ ਸਿੱਧੂ ਨੂੰ ਪ੍ਰਵਾਨ ਕਰਨ ਲਈ ਤਿਆਰ ਨਹੀਂ-ਇਕ ਖ਼ਬਰ
ਟੁੱਟ ਪੈਣੇ ਜੇਠ ਦਾ ਮੁੰਡਾ, ਚੀਰਾ ਬੰਨ੍ਹ ਕੇ ਸਾਹਮਣੇ ਬਹਿੰਦਾ।

17 ਜਨਵਰੀ 2023

ਭਗਵੰਤ ਮਾਨ ਦੀ ਘੁਰਕੀ ਤੋਂ ਬਾਅਦ ਪੀ.ਸੀ.ਐੱਸ. ਅਫ਼ਸਰ ਵਾਪਿਸ ਡਿਊਟੀ ‘ਤੇ ਆਏ- ਇਕ ਖ਼ਬਰ

ਆਕੜਦੇ ਹੋ! ਸਾਨ੍ਹ ਹੁੰਨੇ ਆਂ! ਹੁਣ ਮੋਕ ਮਾਰਦੇ ਹੋ! ਗਊ ਦੇ ਜਾਏ ਜੁ ਹੋਏ।

120 ਔਰਤਾਂ ਨਾਲ ਬਲਾਤਕਾਰ ਕਰਨ ਵਾਲੇ ਹਰਿਆਣੇ ਦੇ ਜਲੇਬੀ ਬਾਬਾ ਨੂੰ 14 ਸਾਲ ਕੈਦ- ਇਕ ਖ਼ਬਰ

ਪੈਰੋਲ ਤਾਂ ਵੱਟ ‘ਤੇ ਪਈ ਐ ਤੇ ਜਲਦੀ ਹੀ ਢੋਲ ਢਮੱਕਿਆਂ ਨਾਲ ਬਾਹਰ ਆ ਜਾਵੇਗਾ।

2022 ‘ਚ ਦਿੱਲੀ ਰਿਹਾ ਭਾਰਤ ਦਾ ਸਭ ਤੋਂ ਵੱਧ ਪ੍ਰਦੂਸ਼ਿਤ ਸ਼ਹਿਰ- ਇਕ ਖ਼ਬਰ

ਬਦਨਾਮ ਭੀ ਹੋਂਗੇ ਤੋ ਕਿਆ ਨਾਮ ਨਾ ਹੋਗਾ।

ਪੰਜਾਬ ‘ਚ ਖਾਨਾਜੰਗੀ ਦਾ ਖ਼ਦਸ਼ਾ- ਸੁਖਬੀਰ ਬਾਦਲ

ਲਾ ਦਿਉ ਸਾਰਾ ਜ਼ੋਰ ਕਰ ਲਿਉ 25 ਸਾਲ ਰਾਜ ਫੇਰ।

ਪੰਜਾਬ ਦੀ ਅਫ਼ਸਰਸ਼ਾਹੀ ਬਗ਼ਾਵਤ ਦੇ ਰਾਹ ‘ਤੇ- ਇਕ ਖ਼ਬਰ

ਜਦੋਂ ਕੱਢ ਕੇ ਵਹੀ ਲੇਖਾ ਮੰਗਿਆ, ਫੇਰ ਕੀ ਜਵਾਬ ਦੇਵੋਂਗੇ।

ਦਿੱਲੀ ਤੇ ਹਰਿਆਣੇ ਤੋਂ ਬਾਅਦ ਬੀ.ਜੇ.ਪੀ. ਹੁਣ ਸ਼੍ਰੋਮਣੀ ਕਮੇਟੀ ‘ਤੇ ਕਬਜ਼ਾ ਕਰਨਾ ਚਾਹੁੰਦੀ ਹੈ- ਸੁਖਬੀਰ ਬਾਦਲ

ਬਾਦਲ ਸਾਬ ਲੋਕ ਤਾਂ ਕਹਿੰਦੇ ਆ ਪਈ ਸ਼੍ਰੋਮਣੀ ਕਮੇਟੀ ਪਹਿਲਾਂ ਹੀ ਬੀ.ਜੇ.ਪੀ.ਪਾਸ ਐ।

 

ਸਿਮਰਨਜੀਤ ਸਿੰਘ ਮਾਨ ਵਲੋਂ ਕੇਂਦਰ ‘ਤੇ ਸਿੱਖਾਂ ਨਾਲ਼ ਵਿਤਕਰੇ ਦੇ ਦੋਸ਼-ਇਕ ਖ਼ਬਰ

ਉਹੀਓ ਤੇਰੀ ਤੁਣਤੁਣੀ, ਉਹੀਓ ਤੇਰਾ ਰਾਗ।

ਦਿੱਲੀ ਪੁਲਿਸ ਦੀ ਢਿੱਲੀ ਕਾਰਵਾਈ ‘ਤੇ ਸੁਪਰੀਮ ਕੋਰਟ ਵਰ੍ਹਿਆ- ਇਕ ਖ਼ਬਰ

ਦੋ ਪਈ ਕਿਧਰ ਗਈਆਂ ਸਦਕਾ ਢੂਈ ਦਾ।

ਅਫ਼ਸਰਾਂ ਦੀ ਸਮੂਹਿਕ ਛੁੱਟੀ ਲਈ ਮਾਨ ਸਰਕਾਰ ਜ਼ਿੰਮੇਵਾਰ- ਸੁਖਬੀਰ ਬਾਦਲ

ਸੱਸ ਪਿੱਟਣੀ ਮੈਂ ਲਹਿੰਗਾ ਪਾ ਕੇ, ਜੱਗ ਭਾਵੇਂ ਲਾਵੇ ਤੋਹਮਤਾਂ।

ਬੀਬੀ ਬਾਦਲ ਵਲੋਂ ਰਾਹੁਲ ਗਾਂਧੀ ਦੀ ਭਾਰਤ ਜੋੜੋ ਯਾਤਰਾ ਦਾ ਵਿਰੋਧ ਕਰਨ ਦਾ ਸੱਦਾ- ਇਕ ਖ਼ਬਰ

ਡੱਡੂਆਂ ਨੇ ਪਾਇਆ ਭੰਗੜਾ, ਕਾਟੋ ਸਾਜ਼ ਵਜਾਵੇ।

ਰਾਜਪਾਲਾਂ ਨੂੰ ਵਰਕਰਾਂ ਵਜੋਂ ਵਰਤ ਰਹੀ ਹੈ ਕੇਂਦਰ ਸਰਕਾਰ- ਖੜਗੇ

ਸੱਸ ਦੀ ਦੁਖੱਲੀ ਜੁੱਤੀ ਨੂੰ, ਸਹੁਰਾ ਨਿੱਤ ਪਟਿਆਲੇ ਜਾਵੇ।

ਅਫ਼ਸਰਾਂ ਦੇ ਹੱਕ ‘ਚ ਭਾਜਪਾ ਵਲੋਂ ਮਾਨ ਸਰਕਾਰ ਵਿਰੁੱਧ ਮੁਜਾਹਰੇ-ਇਕ ਖ਼ਬਰ

ਝੂਠੀਆਂ ਜ਼ਮੀਰਾਂ ਵਾਲ਼ੇ, ਖਾਲੀ ਹੱਥ ਜਾਂਦੇ ਦੇਖ ਲੈ।

ਅਕਾਲੀ ਦਲ ਬਾਦਲ ਵਲੋਂ ਲਾਏ ਬਹੁਤੇ ਹਲਕਾ ਇੰਚਾਰਜ ਦਾਹੜੀ ਤੇ ਕੇਸ ਕੱਟਣ ਦੇ ਸ਼ੌਕੀਨ- ਝੂੰਦਾਂ ਕਮੇਟੀ

ਤੇੜ ਲਾ ਕੇ ਖੱਦਰ ਦਾ ਸਾਫ਼ਾ, ਚੰਦਰਾ ਸ਼ੌਕੀਨ ਹੋ ਗਿਆ।

ਗ਼ਰੀਬੀ ਪੱਖੋਂ ਭਾਰਤ 117 ਦੇਸ਼ਾਂ ਦੀ ਸੂਚੀ ‘ਚੋਂ 102ਵੇਂ ਨੰਬਰ ‘ਤੇ ਅਪੜਿਆ- ਇਕ ਖ਼ਬਰ

ਖੇਤ ਤਾਂ ਆਪਣਾ ਡੱਬਰਿਆਂ ਖਾ ਲਿਆ, ਮੇਰਾ ਕਾਲਜਾ ਧੜਕੇ। 

ਰਿਸ਼ਵਤਖੋਰ ਅਫ਼ਸਰਸ਼ਾਹੀ ਨਾਲ ਨਰਮੀ ਨਹੀਂ ਵਰਤੀ ਜਾ ਸਕਦੀ- ਬਾਜਵਾ

ਲਿਖਿਆ ਵਿਚ ਕੁਰਾਨ ਕਿਤਾਬ ਦੇ ਜੀ, ਗੁਨਾਹਗ਼ਾਰ ਖੁਦਾ ਦਾ ਚੋਰ ਹੈ ਜੀ।

                             ---------------------

09 ਜਨਵਰੀ 2023

ਲੰਮੇ ਸਮੇਂ ਤੋਂ ਆਪਣੇ ਬੈਂਕ ਖਾਤਿਆਂ ’ਚੋਂ ਤਨਖਾਹਾਂ ਨਾ ਕਢਵਾਉਣ ਵਾਲੇ ਅਫ਼ਸਰਾਂ ‘ਤੇ ਸਰਕਾਰ ਦੀ ਨਜ਼ਰ-ਇਕ ਖ਼ਬਰ

ਆਉਣ ਜਾਣ ਲਈ ਤਾਂ ਕਾਰ ਰੱਖੀ ਐ, ਬੁਲੇਟ ਤਾਂ ਰੱਖਿਐ ਪਟਾਕੇ ਪਾਉਣ ਨੂੰ।

 ਪਾਰਟੀ ਦੇ ਹਰ ਵਰਕਰ ਦੀ ਰਾਇ ਲਵਾਂਗੇ-ਸੁਖਬੀਰ ਬਾਦਲ

ਪਰ ਹੋਊਗਾ ਉਹੀ ਜੋ ਅਸੀਂ ਚਾਹਾਂਗੇ।

2047 ਤੱਕ ਭਾਰਤ ‘ਚ ਪ੍ਰਤੀ ਵਿਅਕਤੀ ਆਮਦਨ 10,000 ਡਾਲਰ ਹੋ ਜਾਵੇਗੀ- ਭਾਰਤੀ ਆਰਥਿਕ ਸਲਾਹਕਾਰ

ਜਿਵੇਂ ਕਿਸਾਨਾਂ ਦੀ ਆਮਦਨ ਦੁੱਗਣੀ ਹੋ ਗਈ ਬਈ।

ਮੀਡੀਆ ਨੂੰ ਮੇਰੀ ਟੀ-ਸ਼ਰਟ ਦਿਖਦੀ ਹੈ, ਗ਼ਰੀਬਾਂ ਦੇ ਪਾਟੇ ਕੱਪੜੇ ਨਹੀਂ- ਰਾਹੁਲ ਗਾਂਧੀ

ਗ਼ਰੀਬ! ਕਿੱਥੇ ਨੇ ਗ਼ਰੀਬ? 32 ਰੁਪਏ ਰੋਜ਼ਾਨਾ ‘ਚ ਐਸ਼ਾਂ ਕਰ ਰਹੇ ਨੇ ਲੋਕ।

ਅਕਾਲੀ ਦਲ ਨੂੰ ਕਿਸਾਨਾਂ ਲਈ ਕੀਤੀ ਕੁਰਬਾਨੀ ਮਹਿੰਗੀ ਪੈ ਗਈ-ਸੁਖਬੀਰ ਬਾਦਲ

ਲਉ ਜੀ, ਹੋਰ ਸੁਣੋ, ਕਿਸਾਨੀ ਬਿੱਲਾਂ ਦੇ ਹੱਕ ‘ਚ ਬੋਲਣ ਨੂੰ ਸਾਰਾ ਟੱਬਰ ਕੁਰਬਾਨੀ ਕਹੀ ਜਾਂਦੈ।

ਪਟਿਆਲਾ ਜੇਲ੍ਹ ‘ਚ ਬਿੱਟੂ ਵਲੋਂ ਆਸ਼ੂ ਨਾਲ ਮੁਲਾਕਾਤ- ਇਕ ਖ਼ਬਰ

ਤੇਰੀ ਆਈ ਮੈਂ ਮਰ ਜਾਂ, ਤੇਰਾ ਵਾਲ ਵੀ ਵਿੰਗਾ ਨਾ ਹੋਵੇ।

ਪਾਣੀਆਂ ਦੇ ਮੁੱਦੇ ‘ਤੇ ਸਹਿਯੋਗ ਕਰਨ ਸੂਬੇ- ਮੋਦੀ  

ਧੀਏ ਗੱਲ ਸੁਣ, ਨੂੰਹੇਂ ਕੰਨ ਕਰ।

ਗੁਲਾਮ ਨਬੀ ਆਜ਼ਾਦ ਦਾ ਸਾਥ ਛੱਡ ਕੇ 17 ਆਗੂ ਮੁੜ ਕਾਂਗਰਸ ‘ਚ ਸ਼ਾਮਲ ਹੋਏ- ਇਕ ਖ਼ਬਰ

ਜਾਨ ਬਚੀ ਔਰ ਲਾਖੋਂ ਪਾਏ, ਲੌਟ ਕੇ ਬੁੱ...ਘਰ ਕੋ ਆਏ।

ਕੈਨੇਡਾ ‘ਚ ਇਕ ਠੱਗ ਜੋੜੇ ਨੇ ਕਿਸੇ ਦਾ ਘਰ ਆਪਣਾ ਕਹਿ ਕੇ ਵੇਚ ਦਿਤਾ- ਇਕ ਖ਼ਬਰ

ਵੇਚਣ ਵਾਲਾ ਉਸ ਦੇਸ਼ ਤੋਂ ਆਇਆ ਲਗਦੈ ਜਿੱਥੇ ਇਕ ਪਲਾਟ ਚਾਰ ਚਾਰ ਵਾਰੀ ਵਿਕ ਜਾਂਦੈ।

ਮਲ਼ਾਈ ਖਾਣ ਵਾਲ਼ੇ ਲੀਡਰ ਵਿਦੇਸ਼ ਜਾਂ ਦੂਜੀਆਂ ਪਾਰਟੀਆਂ ‘ਚ ਚਲੇ ਗਏ- ਲਾਲ ਸਿੰਘ

ਖਾਏ ਪੀਏ ਯਹਾਂ ਸੇ ਖਿਸਕੇ, ਯੇਹ ਅੱਛੀ ਸੂਰਤ ਵਾਲੇ ਯਾਰ ਕਿਸ ਕੇ।

ਮੌਜੂਦਾ ਅਕਾਲੀ ਦਲ ਲੀਹਾਂ ਤੋਂ ਭਟਕ ਚੁੱਕਾ ਹੈ- ਹਰਭਜਨ ਸਿੰਘ ਤੁੜ

ਲੀਹਾਂ ਕਿੱਥੇ! ਹੁਣ ਤਾਂ ਲੀਹਾਂ ਦੀ ਧੂੜ ਵੀ ਨਹੀਂ ਲੱਭਦੀ।

ਭਾਰਤੀ ਵਪਾਰੀ ਆਸਟਰੇਲੀਆ ਨਾਲ ਮੁਕਤ ਵਪਾਰ ਸਮਝੌਤੇ ਦਾ ਲਾਭ ਲੈਣ- ਜੀ.ਟੀ.ਆਰ.ਆਈ.

ਭਰ ਲਉ ਝੋਲ਼ੀਆਂ ਮਿੱਤਰੋ ਕਿ ਲੱਡੂਆਂ ਦਾ ਮੀਂਹ ਵਰ੍ਹਦਾ।

ਮਾਨ ਸਰਕਾਰ ਤੋਂ ਲੋਕਾਂ ਦਾ ਵਿਸ਼ਵਾਸ ਉਠ ਚੁੱਕਾ ਹੈ- ਸੁਖਬੀਰ ਬਾਦਲ

ਤੁਸੀਂ ਕਿਤੇ ਇਸ ਭੁਲੇਖੇ ‘ਚ ਨਾ ਰਹਿਉ ਕਿ ਹੁਣ ਲੋਕਾਂ ਨੂੰ ਤੁਹਾਡੇ ‘ਤੇ ਵਿਸ਼ਵਾਸ ਹੈ।

ਕੈਨੇਡਾ ‘ਚ ਨਸ਼ੀਲਾ ਪਦਾਰਥ ਜੇਲ੍ਹ ‘ਚ ਲਿਜਾਂਦਾ ਇਕ ਕਬੂਤਰ ਫੜਿਆ ਗਿਆ-ਇਕ ਖ਼ਬਰ

ਕੈਨੇਡਾ ਸਰਕਾਰ ਸੋਚ ਰਹੀ ਹੈ ਕਬੂਤਰ ਦਾ ਰਿਮਾਂਡ ਪੰਜਾਬ ਪੁਲੀਸ ਨੂੰ ਦੇ ਦਿਤਾ ਜਾਵੇ।

ਪੰਜਾਬੀ ਭਾਸ਼ਾ ਦੇ ਠੇਠ ਸ਼ਬਦਾਂ ਨੂੰ ਹੁਣ ਪੰਜਾਬ ਵਾਸੀ ਵੀ ਨਹੀਂ ਸਮਝਦੇ- ਇਕ ਸਰਵੇਅ

ਆਪੇ ਫਾਥੜੀਏ ਤੈਨੂੰ ਕੌਣ ਛੂਡਾਵੇ।

03 ਜਨਵਰੀ 2023

ਮੂਲ ਨਾਨਕਸ਼ਾਹੀ ਕੈਲੰਡਰ ਜਾਰੀ ਕਰਨ ਦੀ ਮੰਗ ਕੀਤੀ ਬੀਬੀ ਜਗੀਰ ਕੌਰ ਨੇ-ਇਕ ਖ਼ਬਰ
ਬੀਬੀ ਜੀ, ਤੁਹਾਡੀ ਮੰਗ ਦੇ ਸਬੰਧ ਵਿਚ ਸ਼੍ਰੋਮਣੀ ਕਮੇਟੀ ਵਾਲ਼ੇ ਕੁਰਾਲ਼ੀ ਵਾਲੇ ਪੰਡਤਾਂ ਤੋਂ ਪੁੱਛਣ ਗਏ ਐ।   

ਦੋ ਨਾਬਾਲਗ਼ ਗੈਂਗਸਟਰਾਂ ਦੀ ਸਿਰਸਾ ਤੋਂ ਹੋਈ ਗ੍ਰਿਫ਼ਤਾਰੀ- ਇਕ ਖ਼ਬਰ
ਲਗਦੈ ਹੁਣ ਭਾਰਤ ਵਿਚ ਗੈਂਗਸਟਰ ਹੀ ਜੰਮਿਆਂ ਕਰਨਗੇ।

ਦਸਵੇਂ ਪਾਤਸ਼ਾਹ ਦਾ ਪ੍ਰਕਾਸ਼ ਦਿਹਾੜਾ 23 ਪੋਹ ਦੀ ਬਜਾਇ 14 ਨੂੰ ਕਿਉਂ ਮਨਾ ਰਹੀ ਹੈ ਸ਼੍ਰੋਮਣੀ ਕਮੇਟੀ-ਸੈਕਰਾਮੈਂਟੋ
ਸਿਰਦਾਰ ਜੀ, ਇਹ ਦੋ ਮਹਾਨ ‘ਤਾਰਾ ਵਿਗਿਆਨੀਆਂ’ ਵਲੋਂ ‘ਸੋਧੇ’ ਹੋਏ ਕੈਲੰਡਰ ਅਨੁਸਾਰ ਹੈ ਜੀ।

ਜ਼ੇਲੈਂਸਕੀ ਨੇ ਅਮਨ ਲਈ ਭਾਰਤ ਤੋਂ ਮਦਦ ਮੰਗੀ- ਇਕ ਖ਼ਬਰ
ਤੁਸੀਂ ਕਰੋ ਅਸਾਡੀ ਕਾਰੀ ਜੀ, ਹੁਣ ਹੋ ਗਈ ਮੁਸ਼ਕਿਲ ਭਾਰੀ ਜੀ।

ਗੁਰੂ ਕੇ ਮਹਿਲ(ਸ੍ਰੀ ਅੰਮ੍ਰਿਤਸਰ) ਦਾ ਇਤਿਹਾਸਕ ਖੂਹ ਕਾਰਸੇਵਾ ਦੀ ਭੇਟ ਚੜ੍ਹਿਆ- ਇਕ ਖ਼ਬਰ
ਯਾਰ ਏਨਾ ਥੋੜ੍ਹੈ ਕਿ ਬਾਬੇ ਤੁਹਾਨੂੰ ਹੁਣ ਸੰਗਮਰਮਰੀ ਖੂਹ ਦਾ ਜਲ ਛਕਾਉਣਗੇ।

ਮੈਨੂੰ ਸਿਆਸੀ ਬਦਲਾਖੋਰੀ ਤਹਿਤ ਜੇਲ੍ਹ ਭੇਜਣ ਦੀ ਤਿਆਰੀ ‘ਚ ਸਰਕਾਰ- ਚੰਨੀ
ਚੰਨੀ ਸਾਬ ਇਹ ਜੁਮਲਾ ਪੁਰਾਣਾ ਹੋ ਗਿਐ, ਕੋਈ ਹੋਰ ਗੱਲ ਬਣਾਉ ਜੀ।

ਬਠਿੰਡੇ ‘ਚ ਰਾਜਾ ਵੜਿੰਗ ਅਤੇ ਮਨਪ੍ਰੀਤ ਬਾਦਲ ਧੜੇ ਦੀ ਸਿਆਸੀ ਸ਼ਰੀਕੇਬਾਜ਼ੀ ਸਿਖ਼ਰਾਂ ‘ਤੇ- ਇਕ ਖ਼ਬਰ
ਵਾਰਿਸਸ਼ਾਹ ਦੋ ਲੜਨ ਮਾਸ਼ੂਕ ਏਥੇ, ਮੇਰੀ ਸੰਗਲੀ ਸ਼ਗਨ ਵਿਚਾਰਦੀ ਏ।

ਚੀਨ ਸਬੰਧਾਂ ਦੀ ਮਜ਼ਬੂਤੀ ਲਈ ਭਾਰਤ ਨਾਲ਼ ਮਿਲਕੇ ਕੰਮ ਕਰਨ ਨੂੰ ਤਿਆਰ- ਵਾਂਗ ਯੀ
ਨੀਂ ਚਰਖ਼ਾ ਬੋਲ ਪਿਆ, ਹਰ ਗੱਲ ਨਾਲ਼ ਭਰਦਾ ਹੁੰਗਾਰੇ।

ਕੋਰੋਨਾ ਦੇ ਰੋਜ਼ ਆਉਣ ਵਾਲੇ ਅੰਕੜੇ ਜਾਰੀ ਨਹੀਂ ਕਰੇਗਾ ਚੀਨ- ਸਿਹਤ ਕਮਿਸ਼ਨ ਚੀਨ
ਨ੍ਹਾਉਂਦੀ ਫਿਰੇਂ ਤੀਰਥਾਂ ‘ਤੇ, ਤੇਰੇ ਅੰਦਰੋਂ ਮੈਲ਼ ਨਾ ਜਾਵੇ।

ਕਿਸਾਨ ਅੰਦੋਲਨ ਟੁੱਟ-ਭੱਜ ਤੋਂ ਬਾਅਦ ਮੁੜ ਏਕਤਾ ਵਲ......!-ਇਕ ਖ਼ਬਰ
ਭੱਜੀਆਂ ਬਾਹੀਂ ਗਲ਼ ਆ ਲੱਗਣ, ਝਗੜੇ ਝੇੜੇ ਸਭ ਮੁੱਕ ਜਾਂਦੇ।

ਕਾਂਗਰਸ ਨੇ ਸਰਕਾਰ ਤੋਂ ਕਿਸਾਨਾਂ ਦੀ ਆਮਦਨ ‘ਤੇ ‘ਵ੍ਹਾਈਟ ਪੇਪਰ’ ਲਿਆਉਣ ਦੀ ਕੀਤੀ ਮੰਗ- ਇਕ ਖ਼ਬਰ
ਕਾਂਗਰਸ ਨੇ ਆਪਣੀਆਂ ਕਰਤੂਤਾਂ ਦੇ ਕਿੰਨੇ ਕੁ ਵ੍ਹਾਈਟ ਪੇਪਰ ਲਿਆਂਦੇ ਬਈ।

ਭਾਜਪਾ ਨੇ ਸਿੱਖਾਂ ਨੂੰ ਪਤਿਆਉਣ ਲਈ ਰਣਨੀਤੀ ਉਲੀਕੀ- ਇਕ ਖ਼ਬਰ
ਸੀਤਾ ਦੇ ਛਲਣੇ ਨੂੰ, ਸੋਨੇ ਦਾ ਮਿਰਗ ਬਣਾਇਆ।

ਮੁੰਬਈ ਮਹਾਂਰਾਸ਼ਟਰ ਦੀ ਹੈ, ਕਿਸੇ ਦੇ ਪਿਉ ਦੀ ਨਹੀਂ- ਫੜਨਵੀਸ
ਨੱਚ ਲੈ ਸ਼ਾਮ ਕੁਰੇ, ਹੁਣ ਭੌਰ ਬੋਲੀਆਂ ਪਾਵੇ।

ਆਈ.ਐਮ.ਐਫ਼. ਦਾ ਪ੍ਰੋਗਰਾਮ ਲਾਗੂ ਕਰਨ ਤੋਂ ਸਿਵਾ ਹੋਰ ਕੋਈ ਬਦਲ ਨਹੀਂ ਸੀ- ਸ਼ਾਹਬਾਜ਼ ਸ਼ਰੀਫ਼
ਕਿਹੜੇ ਯਾਰ ਦਾ ਗੁਤਾਵਾ ਕੀਤਾ, ਅੱਖ ਵਿਚ ਕੱਖ ਪੈ ਗਿਆ।

‘ਆਪ’ ਸਰਕਾਰ ਹਿਸਾਬ ਦੇਵੇ ਕਿ ਤੀਹ ਹਜ਼ਾਰ ਕਰੋੜ ਦਾ ਕਰਜ਼ਾ ਕਿੱਥੇ ਖਰਚਿਆ- ਬਾਜਵਾ
ਲਾਣੇਦਾਰਾ ਸੱਚ ਦੱਸ ਦੇ, ਮੇਰੇ ਗੋਖਰੂ ਕਿੰਨੇ ‘ਚ ਵੇਚ ਆਇਐਂ।

26 ਦਸੰਬਰ 2022

ਕੇਂਦਰ ਦੀ ਸਬਸਿਡੀ ਸਬਸਿਡੀ ਤੇ ਆਮ ਆਦਮੀ ਪਾਰਟੀ ਦੀ ਸਰਕਾਰ ਦੀਆਂ ਸਹੂਲਤਾਂ ‘ਮੁਫ਼ਤ ਰੇਵੜੀ’- ‘ਆਪ ਬੁਲਾਰਾ’

ਬਿਲਕੁਲ ਓਵੇਂ ਜੀ ਜਿਵੇਂ ਤੁਹਾਡਾ ਕੁੱਤਾ ਕੁੱਤਾ, ਸਾਡਾ ਕੁੱਤਾ ਟੌਮੀ।

ਚੰਨੀ ਨੇ ਵਿਦੇਸ਼ੋਂ ਪਰਤਦਿਆਂ ਹੀ ਖੜਗੇ ਤੇ ਪ੍ਰਿਅੰਕਾ ਨਾਲ ਕੀਤੀ ਮੁਲਾਕਾਤ- ਇਕ ਖ਼ਬਰ

ਸਾਨੂੰ ਪਾਰ ਲੰਘਾ ਦਿਉ ਜੀ, ਤੁਸੀਂ ਨਦੀਆਂ ਦੇ ਭੇਤੀ।

ਮਾਨਸਾ ‘ਚ ਵਾਪਰੀਆਂ ਸਾੜ-ਫੂਕ ਦੀਆਂ ਘਟਨਾਵਾਂ ‘ਚੋਂ 25 ਡੇਰਾ ਪ੍ਰੇਮੀ ਬਰੀ- ਇਕ ਖ਼ਬਰ

ਕੀ ਲਗਦੇ ਸੰਤੀਏ ਤੇਰੇ, ਜਿਨ੍ਹਾਂ ਨੂੰ ਰਾਤੀਂ ਖੰਡ ਪਾਈ ਸੀ।

ਸਮ੍ਰਿਤੀ ਈਰਾਨੀ ਅਮੇਠੀ ‘ਚ ‘ਲਟਕੇ ਝਟਕੇ’ ਦਿਖਾ ਕੇ ਚਲੀ ਜਾਂਦੀ ਹੈ- ਕਾਂਗਰਸੀ ਆਗੂ

ਝੁਮਕਾ ਗਿਰਾ ਰੇ ਅਮੇਠੀ ਕੇ ਬਾਜ਼ਾਰ ਮੇਂ।

ਪੰਜ ਸਾਲਾਂ ਵਿਚ 10.09 ਲੱਖ ਕਰੋੜ ਰੁਪਏ ਦਾ ਕਰਜ਼ਾ ਵੱਟੇ-ਖਾਤੇ ਪਾਇਆ- ਵਿਤ ਮੰਤਰੀ

ਅੰਨ੍ਹਾਂ ਵੰਡੇ ਸ਼ੀਰਨੀ, ਮੁੜ ਮੁੜ ਆਪਣਿਆਂ ਨੂੰ ਦੇਹ।

ਰਵਾਇਤੀ ਪਾਰਟੀਆਂ ‘ਤੇ ‘ਆਪ’ ਦੇ ਕੰਮਾਂ ਨੂੰ ਜਾਣ ਬੁਝ ਕੇ ਨਜ਼ਰ-ਅੰਦਾਜ਼ ਕਰਨ ਦੇ ਦੋਸ਼- ਮੁਲਾਜ਼ਮ ਆਗੂ

ਭੱਤਾ ਢੋਏ ਦੀ ਕਦਰ ਨਾ ਪਾਈ, ਡੰਡੀਆਂ ਤੋਂ ਮੁਕਰ ਗਇਓਂ।

ਬਿਹਾਰ ‘ਚ ਨਵਾਂ ਬਣਿਆ ਪੁਲ ਉਦਘਾਟਨ ਤੋਂ ਪਹਿਲਾਂ ਹੀ ਡਿਗ ਗਿਆ- ਇਕ ਖ਼ਬਰ

ਓ ਭਾਈ ਏਥੇ ਤਾਂ ਬਿਨਾਂ ਬਣਾਇਆਂ ਵੀ ਪੁਲ ਡਿਗ ਜਾਂਦੇ ਨੇ।

ਪੰਜਾਬ ਦਾ ਨਸ਼ਾ ਮਾਫ਼ੀਆ-ਸਿਆਸੀ ਗੱਠਜੋੜ ਪੂਰੇ ਦੇਸ਼ ਨੂੰ ਤਬਾਹ ਕਰਨ ਦੀ ਸਮਰੱਥਾ ਰੱਖਦੈ- ਹਰਸਿਮਰਤ

ਬੀਬੀ ਜੀ, ਇਸ ਗੱਠਜੋੜ ਦੀਆਂ ਨੀਹਾਂ ਰੱਖਣ ਵਾਲਿਆਂ ਬਾਰੇ ਵੀ ਜ਼ਰਾ ਚਾਨਣਾ ਪਾ ਦਿੰਦੇ।

ਅਕਾਲੀ ਦਲ ਦੀਆਂ ਕਮੀਆਂ ਦੂਰ ਕਰਨ ਲਈ ਪੰਥਕ ਏਕੇ ਦੀ ਲੋੜ-ਚੰਦੂਮਾਜਰਾ

ਹੁਣ ਅੱਕਾਂ ਤੋਂ ਭਾਲ਼ਦੀ ਡੇਲੇ, ਜੱਟਾਂ ਨੇ ਕਰੀਰ ਪੁੱਟ ਲਏ।

ਰਾਜਾ ਵੜਿੰਗ ਦੇ ਸਮਾਗਮ ‘ਚੋਂ ਗ਼ੈਰਹਾਜ਼ਰ ਰਹੇ ਸਥਾਨਕ ਆਗੂ- ਇਕ ਖ਼ਬਰ

ਮੋਤੀ ਖਿਲਰ ਗਏ, ਚੁਗ ਲੈ ਕਬੂਤਰ ਬਣ ਕੇ।

ਜੇਲ੍ਹ ‘ਚੋਂ ਨਵਜੋਤ ਸਿੱਧੂ ਦੀ ਸੰਭਾਵੀ ਰਿਹਾਈ ਤੋਂ ਸਿਆਸੀ ਹਲਚਲ- ਇਕ ਖ਼ਬਰ

ਛੜੇ ਬੈਠ ਕੇ ਸਲਾਹਾਂ ਕਰਦੇ, ਰੱਬਾ ਹੁਣ ਕੀ ਕਰੀਏ।

ਪਾਰਟੀ ਅਨੁਸ਼ਾਸਨ ਭੰਗ ਕਰਨ ਵਾਲ਼ਿਆਂ ਨੂੰ ਦਿਖਾਵਾਂਗਾ ਬਾਹਰ ਦਾ ਰਸਤਾ- ਰਾਜਾ ਵੜਿੰਗ

ਰੱਬ ਚਾੜ੍ਹ ਪਹਾੜ ਤੋਂ ਡੇਗ ਦਿੰਦਾ, ਗ਼ਰਬ ਕਰੀਏ ਨਾ ਵੱਡੇ ਇਕਬਾਲ ਦਾ ਜੀ।

ਬਾਇਡੇਨ ਨਾਲ਼ ਮੁਲਾਕਾਤ ਕਰਨਗੇ ਜ਼ੇਲੈਂਸਕੀ- ਇਕ ਖ਼ਬਰ

ਉੱਥੇ ਲੈ ਚਲ ਚਰਖ਼ਾ ਮੇਰਾ, ਜਿੱਥੇ ਤੇਰੇ ਹਲ਼ ਵਗਦੇ।

ਸ਼ਰਾਬ ਫ਼ੈਕਟਰੀ: ‘ਏਕਤਾ ਤੇ ਸਾਂਝੀਵਾਲਤਾ’ ਦਾ ਪ੍ਰਤੀਕ ਬਣਿਆ ਸੰਘਰਸ਼- ਇਕ ਖ਼ਬਰ

ਕਾਦਰਯਾਰ ਕੀ ਸਿੱਧਾਂ ਦੀ ਸਿਫ਼ਤ ਕਰੀਏ, ਜੁੜ ਬੈਠੇ ਨੇ ਕਈ ਜਮਾਇਤਾਂ ਦੇ।

ਕੋਈ ਵੀ ਮੁਆਵਜ਼ਾ ਗੰਭੀਰ ਹਾਦਸੇ ਦੇ ਪੀੜਿਤ ਦੇ ਦਰਦ ਨੂੰ ਦੂਰ ਨਹੀਂ ਕਰ ਸਕਦਾ- ਸੁਪਰੀਮ ਕੋਰਟ

ਵੇ ਮੁੰਦਰੀ ਸੋਨੇ ਦੀ, ਮੇਰਾ ਟੁੱਟਿਆ ਦਿਲ ਨਾ ਜੋੜੇ।

19 ਦਸੰਬਰ 2022

ਭਵਿੱਖ ‘ਚ ਅਕਾਲੀ ਦਲ ਨਾਲ ਭਾਜਪਾ ਦੇ ਗੱਠਜੋੜ ਦਾ ਸਵਾਲ ਹੀ ਨਹੀਂ-ਵਿਜੈ ਰੂਪਾਨੀ

ਤੇਰੀ ਮੇਰੀ, ਤੇਰੀ ਮੇਰੀ ਨਹੀਂ ਨਿਭਣੀ, ਮੈਂ ਪਤਲੀ ਤੂੰ ਭਾਰਾ।

ਭਰੇ ਬਾਜ਼ਾਰ ‘ਚ ਸ਼ਰੇਆਮ ਲੁਟੇਰਿਆਂ ਨੇ ਮੰਗਤੇ ਤੋਂ 300 ਰੁਪਏ ਲੁੱਟ ਲਏ- ਇਕ ਖ਼ਬਰ

ਭੁੱਖ ਨੰਗ ਦੀ ਏਥੇ ਪ੍ਰਵਾਹ ਨਾਹੀਂ, ਹੁਕਮ ਹੋਵੇ ਤਾਂ ਦੇਗ਼ਾਂ ਨੂੰ ਚੱਟੀਏ ਜੀ।

ਘਟੀਆ ਸੜਕ ਮਾਮਲਾ: ਨਾ ਠੇਕਾ ਰੱਦ ਹੋਇਆ ਤੇ ਨਾ ਕਿਸੇ ਅਧਿਕਾਰੀ ਖ਼ਿਲਾਫ਼ ਕਾਰਵਾਈ ਹੋਈ- ਇਕ ਖ਼ਬਰ

ਨਾ ਝੰਗ ਛੁੱਟਿਆ ਨਾ ਕੰਨ ਪਾਟੇ, ਝੁੰਡ ਲੰਘ ਗਿਆ ਇੰਜ ਹੀਰਾਂ ਦਾ।

ਆਪਸੀ ਫੁੱਟ ਨੇ ਕਾਂਗਰਸ ਨੂੰ 80 ਤੋਂ 18 ‘ਤੇ ਪਹੁੰਚਾਇਆ- ਰਾਜਾ ਵੜਿੰਗ

ਇਸ ਘਰ ਕੋ ਆਗ ਲੱਗ ਗਈ ਘਰ ਕੇ ਚਿਰਾਗ਼ ਸੇ।

ਮੁੱਖ ਮੰਤਰੀ ਤੇ ਰਾਜਪਾਲ ਦੀ ਆਪਸੀ ਖਹਿਬਾਜ਼ੀ ਦਾ ਨੁਕਸਾਨ ਪੰਜਾਬ ਭੁਗਤ ਰਿਹੈ- ਰਾਜਾ ਵੜਿੰਗ

ਦੋ ਹਾਥੀ ਲੜਨ ਤਾਂ ਵਿਚਾਰਾ ਘਾਹ ਹੀ ਮਿੱਧਿਆ ਜਾਂਦੈ।

ਪੰਜਾਬ ਭਰ ‘ਚ ਦੌਰੇ ਕਰਨਗੇ ਸੁਖਬੀਰ ਸਿੰਘ ਬਾਦਲ- ਇਕ ਖ਼ਬਰ

ਜਿਨ੍ਹਾਂ ਰਾਹਾਂ ਦੀ ਮੈਂ ਸਾਰ ਨਾ ਜਾਣਾ, ਉਨ੍ਹੀਂ ਰਾਹੀਂ ਵੇ ਮੈਨੂੰ ਤੁਰਨਾ ਪਿਆ।

ਅਰਥ ਵਿਵਸਥਾ ਨੂੰ ਵਧਦਾ ਦੇਖ ਕੇ ਕੁਝ ਲੋਕ ਸੜ ਰਹੇ ਹਨ- ਵਿੱਤ ਮੰਤਰੀ

ਪੀੜ੍ਹੀ ਉੱਤੇ ਬਹਿ ਜਾ ਵੀਰਨਾ, ਸੱਸ ਚੰਦਰੀ ਦੇ ਰੁਦਨ ਸੁਣਾਵਾਂ।

ਦਾਦੂਵਾਲ ਵਲੋਂ ਸੁਖਬੀਰ ਸਿੰਘ ਬਾਦਲ ਨੂੰ ਖੁੱਲ੍ਹੀ ਬਹਿਸ ਦੀ ਚੁਣੌਤੀ- ਇਕ ਖ਼ਬਰ

ਜੇ ਤੂੰ ਚੁੰਘੀਆਂ ਬੂਰੀਆਂ ਤਾਂ ਵਿਚ ਮੈਦਾਨੇ ਆ।

ਕੈਪਟਨ ਅਮਰਿੰਦਰ ਸਿੰਘ ਨੇ ਪ੍ਰਧਾਨ ਮੰਤਰੀ ਮੋਦੀ ਨਾਲ ਕੀਤੀ ਮੁਲਾਕਾਤ- ਇਕ ਖ਼ਬਰ

ਕੁਰਸੀ ਮੇਰੇ ਵੀਰ ਦੀ, ਠਾਣੇਦਾਰ ਦੇ ਬਰਾਬਰ ਡਹਿੰਦੀ।

ਮੌਜੂਦਾ ਸਿੱਖ ਮਸਲਿਆਂ ਸਬੰਧੀ ਸੇਧ ਦੇਣ ਜਥੇਦਾਰ- ਧਾਮੀ

ਵਾਇਆ ਬਠਿੰਡਾ ਨਾ ਜਾਉ ਧਾਮੀ ਸਾਹਿਬ, ਸਿੱਧੀ ‘ਮਾਲਕਾਂ’ ਤੋਂ ਹੀ ਸੇਧ ਮੰਗ ਲਵੋ।

ਬੇਅਦਬੀ ਮਾਮਲਿਆਂ ਪ੍ਰਤੀ ਗੰਭੀਰ ਹੈ ‘ਆਪ’ ਸਰਕਾਰ- ਮਾਲਵਿੰਦਰ ਸਿੰਘ ਕੰਗ

ਬਦਲ ਗਈਆਂ ਸ਼ਕਲਾਂ ਰਾਗ ਪੁਰਾਣੇ ਨੇ, ਸੱਦੇ ਸਿਰਫ਼ ਨਵੇਂ ਨੇ ਕਾਗ ਪੁਰਾਣੇ ਨੇ- (ਬਾਬਾ ਨਜਮੀ)

ਭਗਵੰਤ ਮਾਨ ਨੇ ‘ਆਪ’ ਦੀ ਮਸ਼ਹੂਰੀ ਲਈ ਪੰਜਾਬ ਦਾ ਪੈਸਾ ਗੁਜਰਾਤ ‘ਚ ਲੁਟਾਇਆ- ਭੁੱਲੇਵਾਲ ਰਾਠਾਂ

ਚੋਰਾਂ ਦੇ ਕੱਪੜੇ, ਡਾਂਗਾਂ ਦੇ ਗਜ਼।

ਚੀਨ ਹਮਲੇ ਵਧਾ ਰਿਹਾ ਹੈ ਤੇ ਸਰਕਾਰ ਦਰਾਮਦ- ਕੇਜਰੀਵਾਲ

ਵੇ ਮੈਂ ਚੋਰੀ ਚੋਰੀ ਲਾ ਲਈਆਂ, ਤੇਰੇ ਨਾਲ਼ ਅੱਖੀਆਂ।

ਸੂਬੇ ਦਾ ਮਾਹੌਲ ਖ਼ਰਾਬ ਕਰਨਾ ਚਾਹੁੰਦੀਆਂ ਹਨ ਪੰਜਾਬ ਵਿਰੋਧੀ ਤਾਕਤਾਂ- ਰਾਜਾ ਵੜਿੰਗ

ਛੜੇ ਜੇਠ ਦੀ ਮੈਂ ਅੱਖ ਵਿਚ ਰੜਕਾਂ, ਕੰਧ ਉੱਤੋਂ ਰਹੇ ਝਾਕਦਾ।

ਦਿੱਲੀ ਤੇ ਪੰਜਾਬ ‘ਚ ਕੀਤੇ ਕੰਮ ਲੈ ਕੇ ਜਾਵਾਂਗੇ ਦੇਸ਼ ਭਰ ਵਿਚ- ਭਗਵੰਤ ਮਾਨ

ਨੱਚਾਂ ਮੈਂ ਪਟਿਆਲੇ ਮੇਰੀ ਧਮਕ ਜਲੰਧਰ ਪੈਂਦੀ।

12 ਦਸੰਬਰ 2022

ਭਾਜਪਾ ਦੀਆਂ ਨਵਿਆਂ ਨੂੰ ਅਹੁਦੇਦਾਰੀਆਂ, ਪੁਰਾਣਿਆਂ ਨੂੰ ਦਿਖਾ ਰਹੀਆਂ ਬੂਹੇ ਬਾਰੀਆਂ- ਇਕ ਖ਼ਬਰ

ਨਵਿਆਂ ਦੇ ਸੰਗ ਲੱਗ ਕੇ, ਭੁੱਲ ਗਈ ਯਾਰ ਪੁਰਾਣੇ।

 

ਯਮੁਨਾ ਦਾ ਪਾਣੀ: ਪੰਜਾਬ ਨੂੰ ਦੇਣ ਤੋਂ ਕੇਂਦਰ ਦੀ ਕੋਰੀ ਨਾਂਹ-ਇਕ ਖ਼ਬਰ

ਉਹ ਫਿਰੇ ਨੱਥ ਘੜਾਉਣ ਨੂੰ, ਉਹ ਫਿਰੇ ਨੱਕ ਵਢਾਉਣ ਨੂੰ।

 

ਮੁੱਖ ਮੰਤਰੀ ਦਾ ਹਰਾ ਪੈੱਨ ਅਜੇ ਤੱਕ ਗ਼ਰੀਬਾਂ ਦੇ ਹੱਕ’ਚ ਨਹੀਂ ਚੱਲਿਆ- ਵੜੈਚ

ਅਜੇ ਦਿੱਲੀਉਂ ਹਰੀ ਸਿਆਹੀ ਨਹੀਂ ਆਈ ਬਈ।

ਗੁਜਰਾਤ ਵਿਚ ‘ਆਪ’ ਨੇ ਕਾਂਗਰਸ ਦੀ ਖੇਡ ਵਿਗਾੜੀ- ਚਿਦੰਬਰਮ

ਟੁੱਟ ਪੈਣੇ ਦਰਜੀ ਨੇ ਮੇਰੀ ਰੱਖ ਲਈ ਸੁੱਥਣ ‘ਚੋਂ ਟਾਕੀ।

ਪੰਜ ਪੰਜ ਮਰਲੇ ਦੇ ਸਰਕਾਰੀ ਪਲਾਟਾਂ ਦੀ ਉਮੀਦ ‘ਚ ਲੰਘ ਚੱਲੀ ਜ਼ਿੰਦਗੀ-ਇਕ ਖ਼ਬਰ

ਸਰਟੀਫ਼ੀਕੇਟ ਚੈੱਕ ਕਰ ਲਉ ਬਈ ਕਿਤੇ ਚੰਨ ਉੱਤੇ ਤਾਂ ਨਹੀਂ ਪਲਾਟ ਕੱਟੇ ਹੋਏ।

ਲੋਕਾਂ ਦੇ ਹੱਕਾਂ ਦੇ ਘਾਣ ਖ਼ਿਲਾਫ਼ ਹਮੇਸ਼ਾਂ ਲੜਦੀ ਰਹਾਂਗੀ- ਮਮਤਾ ਬੈਨਰਜੀ

ਉਹ ਘਰ ਰਤਨੀ ਦਾ, ਜਿੱਥੇ ਚੱਲਣ ਪੁਰਾਣੇ ਚਰਖ਼ੇ।

‘ਆਪ’ ਦੇ ਰਾਜ ‘ਚ ਪੰਜਾਬ ਦੇ ਲੋਕਾਂ ਦੀ ਲੁੱਟ- ਪ੍ਰਨੀਤ ਕੌਰ

ਬੀਬੀ ਜੀ ਜਿਹੜੇ ਸੁਰੱਖਿਅਤ ਘੁਰਨਿਆਂ ਵਲ ਨੂੰ ਭੱਜ ਰਹੇ ਐ, ਉਹ ਕੌਣ ਨੇ?

ਸ਼੍ਰੋਮਣੀ ਕਮੇਟੀ ਨੂੰ ਬਾਦਲਾਂ ਦੇ ਚੁੰਗਲ ‘ਚੋਂ ਛੁਡਵਾਉਣ ਲਈ ਯਤਨ ਜਾਰੀ- ਭਾਈ ਚੰਗਾਲ

ਸੱਸ ਮਰੀ ‘ਤੇ ਚੁਬਾਰਾ ਪਾਉਣਾ, ਔਖੀ ਸੌਖੀ ਦਿਨ ਕੱਟਦੀ।

ਬੀਬੀ ਜਾਗੀਰ ਕੌਰ ਅਤੇ ਜਗਮੀਤ ਸਿੰਘ ਬਰਾੜ ਦੀ ਬਾਦਲ ਦਲ ਤੇ ਬਾਦਲਾਂ ਨੂੰ ਸਿੱਧੀ ਚੁਣੌਤੀ-ਇਕ ਖ਼ਬਰ

ਜੱਟ ਸ਼ਾਹਾਂ ਨੂੰ ਖੰਘੂਰੇ ਮਾਰੇ, ਕਣਕਾਂ ਨਿਸਰ ਪਈਆਂ।

ਜੰਮੂ-ਕਸ਼ਮੀਰ ‘ਚ ਬੇਰੁਜ਼ਗਾਰੀ ‘ਚ ਰਿਕਾਰਡ ਤੋੜ ਵਾਧਾ- ਇਕ ਖ਼ਬਰ

ਬਹੁਤ ਸ਼ੋਰ ਸੁਨਤੇ ਥੇ ਪਹਿਲੂ ਮੇਂ ਦਿਲ ਕਾ, ਜੋ ਚੀਰਾ ਤੋ ਕਤਰਾ ਏ ਖੂੰ ਨਿਕਲਾ। (ਗ਼ਾਲਿਬ)

ਗੁਜਰਾਤ ਨੇ ਖੋਖਲੇ ਵਾਅਦੇ, ਰਿਉੜੀ ਅਤੇ ਮਾੜੀ ਸਿਆਸਤ ਨੂੰ ਨਕਾਰ ਦਿਤਾ- ਸ਼ਾਹ

ਸ਼ਾਹ ਜੀ ਕੀ ਇਹੀ ਫਾਰਮੂਲਾ ਹਿਮਾਚਲ ਪ੍ਰਦੇਸ਼ ‘ਤੇ ਲਾਗੂ ਨਹੀਂ ਹੁੰਦਾ?

ਭਾਜਪਾ ਖਿਲਾਫ਼ ਇਕਜੁੱਟ ਹੋਵੇ ਵਿਰੋਧੀ ਧਿਰ- ਨਿਤੀਸ਼

ਕਿਹੜੀ ਵਿਰੋਧੀ ਧਿਰ ਨਿਤੀਸ਼ ਸਾਹਿਬ?

ਸ਼੍ਰੋਮਣੀ ਅਕਾਲੀ ਦਲ ਨੇ ਜਗਮੀਤ ਬਰਾੜ ਨੂੰ ਪਾਰਟੀ ਦੀ ਮੁਢਲੀ ਮੈਂਬਰਸ਼ਿੱਪ ਤੋਂ ਕੱਢਿਆ- ਇਕ ਖ਼ਬਰ

ਕਿਉਂ ਕੀਤੀ ਅਸਾਂ ਨਾਲ ਬਸ ਵੇ, ਕੋਈ ਦੋਸ਼ ਅਸਾਡਾ ਦੱਸ ਵੇ।

ਭਾਜਪਾ ਨੇ ਕੈਪਟਨ ਨੂੰ ਵਫ਼ਾਦਾਰੀ ਦਾ ਤੋਹਫ਼ਾ ਦਿਤਾ- ‘ਆਪ’

ਸ਼ਾਹ ਮੁਹੰਮਦਾ ਆਖਦੇ ਲੋਕ ਸਿੰਘ ਜੀ, ਤੁਸੀਂ ਚੰਗੀਆਂ ਪੂਰੀਆਂ ਪਾ ਆਏ।

ਪ੍ਰਿਅੰਕਾ ਗਾਂਧੀ ਦੀ ਰਣਨੀਤੀ ਨਾਲ ਹਿਮਾਚਲ ‘ਚ ਹੋਈ ਕਾਂਗਰਸ ਦੀ ਜਿੱਤ- ਕਾਂਗਰਸ ਬੁਲਾਰਾ

ਤੀਲੀ ਵਾਲ਼ੀ ਖਾਲ ਟੱਪ ਗਈ, ਲੌਂਗ ਵਾਲ਼ੀ ਨੇ ਭਨਾ ਲਏ ਗੋਡੇ।

ਭਾਜਪਾ ਕੋਰ ਕਮੇਟੀ ਨੂੰ ਵੀ ਦਲ ਬਦਲੂਆਂ ਦਾ ਰੰਗ ਚੜ੍ਹਿਆ- ਇਕ ਖ਼ਬਰ

ਖ਼ਰਬੂਜ਼ੇ ਨੂੰ ਦੇਖ ਖ਼ਰਬੂਜਾ ਰੰਗ ਫੜਦੈ ਬਈ।

ਗੁਜਰਾਤ ਚੋਣਾਂ ਲਈ ਬਣਾਈ ਨੀਤੀ ਸਾਡੇ ਕੰਮ ਨਹੀਂ ਆਈ- ਕਾਂਗਰਸ

ਨੀ ਐਡਾ ਤੇਰਾ ਕਿਹੜਾ ਦਰਦੀ, ਸੁੱਤੀ ਪਈ ਨੂੰ ਪੱਖੀ ਦੀ ਝੱਲ ਮਾਰੇ।

28 ਨਵੰਬਰ 2022

ਮੋਦੀ ਸਰਕਾਰ ਨੇ ਕਿਸਾਨਾਂ ਨਾਲ ਕੀਤੇ ਵਾਅਦੇ ਪੂਰੇ ਨਹੀਂ ਕੀਤੇ- ਖੜਗੇ

ਤੇਰਾ ਲਾਰਾ ਵੇ ਸ਼ਰਾਬੀਆਂ ਦੀ ਗੱਪ ਵਰਗਾ।

ਨਹਿਰੂ ਤੇ ਇੰਦਰਾ ਗਾਂਧੀ ਦੀ ਆਲੋਚਨਾ ਤੋਂ ਦੁਖੀ ਹਾਂ- ਫਾਰੂਕ ਅਬਦੁੱਲਾ

ਮੇਰੇ ਯਾਰ ਨੂੰ ਮੰਦਾ ਨਾ ਬੋਲੀਂ, ਮੇਰੀ ਭਾਵੇਂ ਜਿੰਦ ਕੱਢ ਲੈ।

ਗੁਜਰਾਤ ਚੋਣਾਂ: ਭਾਜਪਾ ਵਲੋਂ ਵਾਅਦਿਆਂ ਦੀ ਝੜੀ- ਇਕ ਖ਼ਬਰ

ਯਾਨੀ ਕਿ ਭਾਜਪਾ ਨੇ ਰਿਉੜੀਆਂ ਵਾਲ਼ਾ ਲਿਫ਼ਾਫ਼ਾ ਢੇਰੀ ਕਰ ਦਿਤਾ।

ਬਾਈਡੇਨ ਨੇ ਹਥਿਆਰਾਂ ‘ਤੇ ਪਾਬੰਦੀ ਲਗਾਉਣ ਦਾ ਫ਼ੈਸਲਾ ਮੁੜ ਦੁਹਰਾਇਆ- ਇਕ ਖ਼ਬਰ

ਹਾਥੀ ਕੇ ਦਾਂਤ ਖਾਨੇ ਕੇ ਔਰ, ਦਿਖਾਨੇ ਕੇ ਔਰ।

ਸੰਯੁਕਤ ਰਾਸ਼ਟਰ ‘ਚ ਇਰਾਨ ਵਿਰੁੱਧ ਮਤੇ ਦੌਰਾਨ ਭਾਰਤ ਰਿਹਾ ਗ਼ੈਰਹਾਜ਼ਰ- ਇਕ ਖ਼ਬਰ

ਅੱਧੀ ਤੇਰੀ ਆਂ ਮੁਲਾਹਜ਼ੇਦਾਰਾ, ਅੱਧੀ ਆਂ ਗ਼ਰੀਬ ਜੱਟ ਦੀ।

ਹਰਿਆਣਾ ਦੇ ਗ੍ਰਹਿ ਮੰਤਰੀ ਨੇ ਜ਼ੀਰਕ ਪੁਰ ਸੜਕ ਚਾਰ ਮਾਰਗੀ ਕਰਨ ਲਈ ਭਗਵੰਤ ਮਾਨ ਨੂੰ ਚਿੱਠੀ ਲਿਖੀ- ਇਕ ਖ਼ਬਰ

ਧਰਤੀ ਨੂੰ ਕਲੀ ਕਰਾ ਦੇ ਵੇ, ਨੱਚੂੰਗੀ ਸਾਰੀ ਰਾਤ।

ਸਨਅਤੀ ਪਲਾਟ ਅਲਾਟਮੈਂਟ ਘੁਟਾਲੇ ਦੀ ਜਾਂਚ ਵਾਲ਼ੀ ਫ਼ਾਈਲ ਗੁਆਚੀ-ਇਕ ਖ਼ਬਰ

ਸਾਰੇ ਡੈਸਕ ਫੋਲਦਾ ਆਈਂ ਵੇ, ਸਾਡੀ ਫ਼ਾਈਲ ਗੁਆਚੀ।

ਕਾਂਗਰਸ ਨੂੰ ਗੁਜਰਾਤ ‘ਚ ਵੋਟਾਂ ਮੰਗਣ ਦਾ ਕੋਈ ਹੱਕ ਨਹੀਂ- ਮੋਦੀ

ਗਲੀਆ ਹੋ ਜਾਣ ਸੁੰਞੀਆਂ, ਵਿਚ ਮਿਰਜ਼ਾ ਯਾਰ ਫਿਰੇ।

ਭਾਜਪਾ ਤੋਂ ਅਸੰਤੁਸ਼ਟ ਹੋਣ ਕਾਰਨ ਕਾਂਗਰਸ ਵਲ ਲੋਕਾਂ ਦਾ ਸਮਰਥਨ ਵਧਿਆ- ਸ਼ਮਸ਼ੇਰ ਗੋਗੀ

ਵੈਰੀਆਂ ਦਾ ਖੂਹ ਵਗਦਾ, ਮੈਨੂੰ ਤੇਰੀ ਵੇ ਜਾਨ ਦਾ ਧੋਖਾ।

ਹਰਿਆਣਾ ਵਿਧਾਨ ਸਭਾ ਲਈ ਚੰਡੀਗੜ੍ਹ ‘ਚ ਥਾਂ ਮੰਗਣੀ ਤਰਕਹੀਣ ਤੇ ਬੇਬੁਨਿਆਦ- ਜਾਖੜ

ਚੰਦ ਕੌਰ ਚੱਕਵਾਂ ਚੁੱਲ੍ਹਾ, ਕਿਤੇ ਯਾਰਾਂ ਨੂਂ ਭਿੜਾ ਕੇ ਮਾਰੂ।

ਸੱਤਾ ਤੋਂ ਲਾਂਭੇ ਹੋਏ ਲੋਕ ਯਾਤਰਾਵਾਂ ਕੱਢ ਰਹੇ ਹਨ- ਮੋਦੀ

ਰੱਥ ਯਾਤਰਾ ਕੀਹਨੇ ਸੀ ਸ਼ੁਰੂ ਕੀਤੀ, ਪਹਿਲਾਂ ਪੀੜ੍ਹੀ ਆਪਣੀ ਹੇਠ ਸੋਟਾ ਫੇਰਿਉ ਜੀ।

ਸ਼੍ਰੋਮਣੀ ਕਮੇਟੀ ਵਲੋਂ ਯੂਟਿਊਬ ਚੈਨਲ ਸ਼ੁਰੂ ਕਰਨ ਦਾ ਫ਼ੈਸਲਾ- ਧਾਮੀ

ਚੰਨ ਚੰਨਾਂ ਦੇ ਮਾਮਲੇ, ਚੜ੍ਹਨ ਕੇ ਨਾ ਹੀ ਚੜ੍ਹਨ।

ਕੇਂਦਰ ਨੇ ਚੋਣ ਕਮਿਸ਼ਨ ਨੂੰ ਕੀਤਾ ਕਮਜ਼ੋਰ- ਵਿਰੋਧੀ ਪਾਰਟੀਆਂ

ਰੰਗ ਪੀਲਾ ਕਿਉਂ ਪੈ ਗਿਆ, ਭਾਬੋ ਮੈਨੂੰ ਰੋਜ਼ ਪੁੱਛਦੀ।

ਮੁੱਖ ਮੰਤਰੀ ਦਫ਼ਤਰ ਅੱਗੇ ਪੱਕੇ ਮੋਰਚੇ ਦੀਆਂ ਤਿਆਰੀਆਂ ਜ਼ੋਰ ਨਾਲ਼ ਸ਼ੁਰੂ- ਇਕ ਖ਼ਬਰ

ਤੇਰੇ ਬੂਹੇ ਅੱਗੇ ਡਾਂਗ ਖੜਕਾਉਣੀ, ਦਾਰੂ ਪੀ ਕੇ ਮਿੱਤਰਾਂ ਨੇ।

ਸ਼੍ਰੋਮਣੀ ਅਕਾਲੀ ਦਲ ਚੰਡੀਗੜ੍ਹ ਦਾ ਇਕ ਇੰਚ ਵੀ ਹਰਿਆਣੇ ਨੂੰ ਨਹੀਂ ਦੇਣ ਦੇਵੇਗਾ- ਇਕ ਖ਼ਬਰ

ਪੀ ਸ਼ਰਾਬਾਂ ਤਖ਼ਤੋਂ ਲੱਥੇ ਰਾਜੇ ਰਾਜ ਗਵਾ ਕੇ, ਤਾਜ ਲੁਹਾ ਕੇ।

20 ਨਵੰਬਰ 2022

ਸੰਯੁਕਤ ਕਿਸਾਨ ਮੋਰਚੇ ਦੇ ਪ੍ਰਮੁੱਖ ਆਗੂ ਮੁੜ ਸਿਰ ਜੋੜ ਕੇ ਬੈਠੇ- ਇਕ ਖ਼ਬਰ

ਸਉਣ ਵੀਰ ਕਰੇ ‘ਕੱਠੀਆਂ, ਭਾਦੋਂ ਚੰਦਰੀ ਵਿਛੋੜੇ ਪਾਵੇ।

ਸ਼੍ਰੋਮਣੀ ਅਕਾਲੀ ਦਲ ਥੱਕ ਹਾਰ ਕੇ ਬੀ.ਜੇ.ਪੀ. ਨਾਲ ਗੱਠਜੋੜ ਲਈ ਉਤਾਵਲਾ- ਇਕ ਖ਼ਬਰ

ਹੁਣ ਅੱਕਾਂ ਤੋਂ ਭਾਲ਼ਦੀ ਡੇਲੇ, ਜੱਟਾਂ ਨੇ ਕਰੀਰ ਪੁੱਟ ਲਏ।

ਬਾਈਡੇਨ ਨੇ ਜੀ-20 ਸੰਮੇਲਨ ਤੋਂ ਬਾਅਦ ਚੀਨੀ ਹਮਰੁਤਬਾ ਨਾਲ ਕੀਤੀ ਵੱਖ ਮੁਲਾਕਾਤ-ਇਕ ਖ਼ਬਰ

ਇਕ ਤੈਨੂੰ ਗੱਲ ਪੁੱਛਣੀ, ਪਰ ਪੁੱਛਣੀ ਮੈਂ ਓਹਲੇ ਹੋ ਕੇ।

ਦਾਦੂਵਾਲ ਨੂੰ ਹਰਿਆਣਾ ਕਮੇਟੀ ਦੀ ਪ੍ਰਧਾਨਗੀ ਤੋਂ ਹਟਾਉਣ ਦੀ ਮੰਗ-ਇਕ ਖ਼ਬਰ

ਕਾਲ਼ੇ ਕੋਲ ਮੰਜਾ ਨਹੀਂ ਡਾਹੁਣਾ, ਲਿਸ਼ਕੇ ਤਾਂ ਪੈ ਜੂ ਬਿਜਲੀ।

ਭਾਜਪਾ ਨਾਲ ਸਮਝੌਤੇ ਬਿਨਾਂ ਸਾਡੀਆਂ ਬਾਹਵਾਂ ਨਹੀਂ ਆਕੜੀਆਂ- ਮਲੂਕਾ

ਘੜਾ ਚੁੱਕ ਲਊਂ ਪੱਟਾਂ ’ਤੇ ਹੱਥ ਧਰ ਕੇ, ਖਸਮਾਂ ਨੂੰ ਖਾਣ ਕੁੜੀਆਂ।

ਸਿੱਖ ਧਰਮ ਦੇ ਪ੍ਰਚਾਰ ਲਈ ਸ਼੍ਰੋਮਣੀ ਕਮੇਟੀ ਮੁਲਾਜ਼ਮ ਹਿੱਸਾ ਪਾਉਣ- ਧਾਮੀ

ਦਾਲ਼ ਮੰਗੇਂ ਛੜਿਆਂ ਤੋਂ, ਨਾ ਸ਼ਰਮ ਗੁਆਂਢਣੇ ਆਵੇ।

ਪੰਜਾਬ ‘ਚ ਬੀ.ਜੇ.ਪੀ. ਤੇ ਅਕਾਲੀ ਦਲ ਦੇ ਗੱਠਜੋੜ ਦੀ ਕੋਈ ਸੰਭਾਵਨਾ ਨਹੀਂ- ਅਸ਼ਵਨੀ ਸ਼ਰਮਾ

ਕਿਤੇ ‘ਕੱਲੀ ਬਹਿ ਕੇ ਸੋਚੀਂ ਨੀਂ, ਅਸੀਂ ਕੀ ਨਹੀਂ ਕੀਤਾ ਤੇਰੇ ਲਈ।

ਬੰਗਾਲ ਤੇ ਟੀ.ਐਮ.ਸੀ. ਖ਼ਿਲਾਫ਼ ਘੜੀ ਜਾ ਰਹੀ ਹੈ ਸਾਜ਼ਿਸ਼- ਮਮਤਾ ਬੈਨਰਜੀ

ਪੂਣੀਆਂ ਮੈਂ ਤਿੰਨ ਕੱਤੀਆਂ, ਟੁੱਟ ਪੈਣੇ ਦਾ ਤੇਰ੍ਹਵਾਂ ਗੇੜਾ।

ਡੋਨਾਲਡ ਟਰੰਪ ਵਲੋਂ ਰਾਸ਼ਟਰਪਤੀ ਚੋਣਾਂ ਲੜਨ ਦਾ ਐਲਾਨ- ਇਕ ਖ਼ਬਰ

ਮੂੰਹ ਉਗਲਾਂ ਘੱਤ ਕੇ ਕਹਿਣ ਸਭੇ, ਕਾਰੇ ਕਰਨ ਥੀਂ ਇਹ ਨਾ ਸੰਗਦਾ ਏ।

ਕੇਂਦਰ ਦੀਆਂ ਨੀਤੀਆਂ ਨੇ ਅਰਥਿਕਤਾ ਤਬਾਹ ਕੀਤੀ, ਕਿਸਾਨੀ ਦਾ ਲੱਕ ਤੋੜਿਆ- ਰਾਹੁਲ ਗਾਂਧੀ

ਬਾਣੀਆ ਨੇ ਅੱਤ ਚੁੱਕ ਲਈ, ਸਾਰੇ ਜੱਟ ਕਰਜ਼ਾਈ ਕੀਤੇ।

ਜੇ ਕੇਂਦਰ ਰਾਜਾਂ ਦੇ ਬਕਾਏ ਨਹੀਂ ਦਿੰਦਾ ਤਾਂ ਅਸੀਂ ਵੀ ਜੀ.ਐਸ.ਟੀ. ਰੋਕ ਸਕਦੇ ਹਾਂ-ਮਮਤਾ

ਕੁਰਸੀ ‘ਤੇ ਬੈਠਦੀ ਲਗਾ ਕੇ ਮੇਜ਼ ਜੀ, ਬੀਬੀ ਦਾ ਸਰੂਪ ਬਿਜਲੀ ਤੋਂ ਤੇਜ਼ ਜੀ।

ਵੀਹ ਵੀਹ ਲੱਖ ‘ਚ ਵਿਕੀਆਂ ਨਾਇਬ ਤਹਿਸੀਲਦਾਰੀਆਂ- ਇਕ ਖ਼ਬਰ

ਟੁੱਟ ਪੈਣੇ ਦਰਜ਼ੀ ਨੇ, ਮੇਰੀ ਰੱਖ ਲਈ ਸੁੱਥਣ ‘ਚੋਂ ਟਾਕੀ।

ਏ.ਟੀ.ਐਮ. ਤੋੜਨ ਵਾਲਾ ਨਿਕਲਿਆ ਭਾਜਪਾ ਨੇਤਾ ਦਾ ਪੁੱਤਰ- ਇਕ ਖ਼ਬਰ

ਤੇਲੀ ਕਰ ਕੇ ਰੁੱਖਾ ਖਾਈਏ, ਇਹ ਨਹੀਂ ਸਾਥੋਂ ਹੋਣਾ।

ਬੀਮੇ ਦੇ ਦਸ ਲੱਖ ਰੁਪਏ ਲੈਣ ਲਈ ਪੁੱਤਰ ਨੇ ਸੁਪਾਰੀ ਦੇ ਕੇ ਮਰਵਾਇਆ ਪਿਉ- ਇਕ ਖ਼ਬਰ

ਚਿੱਟਾ ਹੋ ਗਿਆ ਲਹੂ ਭਰਾਵੋ ਚਿੱਟਾ ਹੋ ਗਿਆ ਲਹੂ।

ਭਾਜਪਾ ਨਾਲ ਗੱਠਜੋੜ ਹੋਣ ‘ਤੇ ਅਕਾਲੀ ਦਲ ਹੋਵੇਗਾ ਵੱਡਾ ਭਰਾ- ਮਲੂਕਾ

ਉਹ ਕਹੇ ਦੇਹ ਚੋਪੜੀਆਂ, ਉਹ ਕਹੇ ਹੋ ਬੂਹਿਓਂ ਬਾਹਰ।

ਪੰਜਾਬ ਦਾ ਖ਼ਜ਼ਾਨਾ ਲੁਟਾ ਰਹੀ ਹੈ ‘ਆਪ’ ਸਰਕਾਰ- ਪ੍ਰਨੀਤ ਕੌਰ

ਹਾਂ ਜੀ ਬੀਬੀ ਜੀ ਠੀਕ ਫੁਰਮਾਇਆ ਤੁਸੀਂ, ਕੁਝ ਲੁੱਟਦੇ ਐ ਤੇ ਕੁਝ ਲੁਟਾਉਂਦੇ ਐ।

ਆਰ.ਐਸ.ਐਸ. ਤੇ ਭਾਜਪਾ ਸਿੱਖ ਮਾਮਲਿਆਂ ਵਿਚ ਦਖ਼ਲ ਨਾ ਦੇਣ- ਸ਼੍ਰੋਮਣੀ ਕਮੇਟੀ

ਓ ਭਾਈ ਇਸ ਤਰ੍ਹਾਂ ਦੇ ਬਿਆਨ ਦੇਣ ਤੋਂ ਪਹਿਲਾਂ ‘ਮਾਲਕਾਂ’ ਨਾਲ ਤਾਂ ਸਲਾਹ ਕਰ ਲਿਆ ਕਰੋ।

ਸੰਯੁਕਤ ਕਿਸਾਨ ਮੋਰਚੇ ਵਲੋਂ ਸਰਕਾਰ ਖ਼ਿਲਾਫ਼ ਪੱਕੇ ਮੋਰਚੇ ਸ਼ੁਰੂ- ਇਕ ਖ਼ਬਰ

ਹਾਜੀ ਲੋਕ ਮੱਕੇ ਵਲ ਜਾਂਦੇ, ਅਸਾਂ ਜਾਣਾ ਤਖ਼ਤ ਹਜ਼ਾਰੇ।

14 ਨਵੰਬਰ 2022

ਦਿੱਲੀ ‘ਚ ਪ੍ਰਦੂਸ਼ਣ ਲਈ ਪੰਜਾਬ ਜ਼ਿੰਮੇਵਾਰ- ਕੇਂਦਰ ਸਰਕਾਰ

ਜੇਠ ਦੀ ਨਜ਼ਰ ਬੁਰੀ, ਟੁੱਟ ਗਿਆ ਮੇਰਾ ਗਿੱਟਾ।

ਬਰਤਾਨਵੀ ਹਾਈ ਕੋਰਟ ਨੇ ਨੀਰਵ ਮੋਦੀ ਨੂੰ ਭਾਰਤ ਹਵਾਲੇ ਕਰਨ ਦੇ ਦਿਤੇ ਹੁਕਮ- ਇਕ ਖ਼ਬਰ

ਬੜੀ ਮੌਜ ਉਡਾ ਲਈ ਬਈ ਹੁਣ ਚਲੋ ਆਪਣੇ ਡੇਰੇ।

ਗੁਜਰਾਤ ਦੇ ਲੋਕਾਂ ਨੂੰ ‘ਡਬਲ ਇੰਜਣ’ ਦੇ ਧੋਖੇ ਤੋਂ ਬਚਾਵਾਂਗੇ- ਰਾਹੁਲ

ਓਭਾ ਜੀ, ਪਹਿਲਾਂ ਆਪਣਾ ਆਪ ਤਾਂ ਬਚਾ ਲਉ।

ਮੈਨੂੰ ਲੋਕਾਂ ਤੋਂ ਮਿਲਦੇ ਪਿਆਰ ਕਾਰਨ ਭਾਜਪਾ ਪ੍ਰੇਸ਼ਾਨ- ਕੇਜਰੀਵਾਲ

ਲੌਂਗ ਘੜਾ ਦਊਂਗਾ, ਗੁੱਸਾ ਛੱਡ ਮੁਟਿਆਰੇ।

ਭਾਰਤ ਤੇ ਰੂਸ ਦੇ ਰਿਸ਼ਤੇ ਡੂੰਘੇ ਤੇ ਪਰਖ਼ੇ ਹੋਏ- ਜੈਸ਼ੰਕਰ

ਮਿੱਠੇ ਯਾਰ ਦੇ ਬਰੋਬਰ ਬਹਿ ਕੇ, ਮਿੱਠੇ ਮਿੱਠੇ ਬੇਰ ਚੁਗੀਏ।

ਅਕਾਲੀ ਦਲ ‘ਚੋਂ ਮੈਨੂੰ ਕੋਈ ਨਹੀਂ ਕੱਢ ਸਕਦਾ- ਬੀਬੀ ਜਗੀਰ ਕੌਰ

ਸੀਟੀ ਤੇ ਸੀਟੀ ਵੱਜੇ, ਜਦੋਂ ਮੈਂ ਗਿੱਧੇ ਵਿਚ ਆਈ।

ਪ੍ਰਧਾਨ ਮੰਤਰੀ ਨੇ ਅਜੇ ਤੱਕ ਨੋਟਬੰਦੀ ਦੀ ਆਪਣੀ ਅਸਫ਼ਲਤਾ ਨੂੰ ਸਵੀਕਾਰ ਨਹੀਂ ਕੀਤਾ- ਖੜਗੇ

ਤੇਰੇ ਛੱਲੇ ਨੇ ਪੁਆੜੇ ਪਾਏ, ਲਿਆ ਭਾਬੀ ਨੇ ਪਛਾਣ ਮਿੱਤਰਾ।

ਹੁਣ ਲੋਕਾਂ ਨੂੰ ‘ਜੀ ਆਇਆਂ ਨੂੰ’ ਕਹਿ ਕੇ ਸੰਬੋਧਨ ਕਰਨਗੇ ਪੁਲਿਸ ਕਰਮਚਾਰੀ- ਇਕ ਖ਼ਬਰ

ਘੋਟਾ ਫੇਰਨ ਵੇਲੇ ਕਿਹਾ ਕਰਨਗੇ ‘ ਹਮ ਘਰ ਸਾਜਨ ਆਏ’।

ਸਿੱਖਾਂ ਵਿਰੁੱਧ ਪ੍ਰਚਾਰ ਬਾਰੇ ਅਕਾਲ ਤਖ਼ਤ ਦੇ ਜਥੇਦਾਰ ਨੇ ਚਿੰਤਾ ਪ੍ਰਗਟਾਈ- ਇਕ ਖ਼ਬਰ

ਬਸ ਅਸੀਂ ਸਮੇਂ ਸਮੇਂ ‘ਤੇ ਚਿੰਤਾ ਪ੍ਰਗਟਾਅ ਕੇ ਸੁਰਖੁਰੂ ਹੋ ਜਾਂਦੇ ਹਾਂ।

ਭਾਜਪਾ ਤੇ ਆਮ ਆਦਮੀ ਪਾਰਟੀ ਇਕ ਹੀ ਟੀਮ- ਕਨ੍ਹੱਈਆ ਕੁਮਾਰ

ਨੱਥਾ ਸਿੰਘ ਪ੍ਰੇਮ ਸਿੰਘ, ਵੰਨ ਐਂਡ ਦੀ ਸੇਮ ਥਿੰਗ।

ਮੀਡੀਆ ਨੂੰ ਸਰਕਾਰ ਦੀਆਂ ਖ਼ਾਮੀਆਂ ਉਜਾਗਰ ਕਰਨ ਦੀ ਲੋੜ- ਮਨਮੋਹਨ ਸਿੰਘ

ਰਾਂਝਾ ਜੋੜ ਕੇ ਪਰ੍ਹੇ ਫਰਿਆਦ ਕਰਦਾ, ਵੇਖੋ ਖੁੱਸਦੇ ਸਾਕ ਬੇਦੋਸ਼ਿਆਂ ਦੇ।

ਹਿਮਾਚਲ ਦੀਆਂ ਸਾਰੀਆਂ 68 ਸੀਟਾਂ ‘ਤੇ ‘ਆਪ’ ਦੀ ਜ਼ਮਾਨਤ ਜ਼ਬਤ ਹੋਵੇਗੀ- ਨੱਢਾ

ਚੜ੍ਹੀ ਰੰਗਪੁਰੋਂ ਜੰਞ ਖੇੜਿਆਂ ਦੀ, ਢੁੱਕੀ ਸ਼ਹਿਰ ਸਿਆਲਾਂ ਨੂੰ ਆ ਮੀਆਂ।

‘ਸੱਤਾ ਦੀ ਦੁਰਵਰਤੋਂ’ ਖ਼ਿਲਾਫ਼ ਇਮਰਾਨ ਵਲੋਂ ਰਾਸ਼ਟਰਪਤੀ ਨੂੰ ਪੱਤਰ- ਇਕ ਖ਼ਬਰ

ਚਿੱਠੀਆਂ ਸਾਹਿਬਾਂ ਜੱਟੀ ਨੇ, ਲਿਖ ਮਿਰਜ਼ੇ ਵਲ ਪਾਈਆਂ।

ਟਰੱਕ ‘ਤੇ ਭੁੱਕੀ ਵੇਚਦਾ ਪੁਲਿਸ ਵਲੋਂ ਕਾਬੂ- ਇਕ ਖ਼ਬਰ

ਇਹੀ ਤਾਂ ਵਿਕਾਸ ਐ! ਰੇਹੜੀ ਤੋਂ ਟਰੱਕ ਹੋ ਗਿਆ।

ਬੀਬੀ ਜਗੀਰ ਕੌਰ ਨੂੰ ਪਾਰਟੀ ‘ਚੋਂ ਕੱਢਣਾ ਸੁਖਬੀਰ ਬਾਦਲ ਦੀ ਨੈਤਿਕ ਹਾਰ- ਸੁਰਜੀਤ ਸਿੰਘ ਕੋਹਲੀ

ਜੇਠ ਦੇ ਬੁਰੇ ਦਿਨ ਆਏ, ਕਿੱਕਰਾਂ ਨੂੰ ਪਾਵੇ ਜੱਫੀਆਂ।