28 Aug. 2018

ਸਿੱਧੂ ਦੀ ਜਨਰਲ ਬਾਜਵਾ ਨੂੰ ਪਾਈ ਜੱਫੀ ਤੋਂ ਕੈਪਟਨ ਅਮਰਿੰਦਰ ਸਿੰਘ ਵੀ ਨਾਰਾਜ਼- ਇਕ ਖ਼ਬਰ
ਜੱਫੀ ਸ਼ਾਨ ਹੈ ਸਾਡੀ ਪੰਜਾਬੀਆਂ ਦੀ, ਕਿਉਂ ਬਾਤ ਦਾ ਬਤੰਬੜ ਬਣਾਂਵਦੇ ਹੋ।

ਲੋਕਾਂ ਦੀ ਉਮੀਦ ਟੁੱਟੀ,ਪੈਟਰੌਲ ਤੇ ਡੀਜ਼ਲ ਜੀ.ਐੱਸ.ਟੀ. ਦੇ ਘੇਰੇ 'ਚ ਨਹੀਂ ਆਉਣਗੇ-ਇਕ ਖ਼ਬਰ
ਭੈਣ ਬਖਤੌਰੇ ਦੀ, ਲੰਡੇ ਊਠ ਨੂੰ ਸ਼ਰਾਬ ਪਿਲ਼ਾਵੇ।

ਬਾਜਵਾ ਨਾਲ਼ ਜੱਫੀ ਦੇ ਮਾਮਲੇ 'ਤੇ ਸਿੱਧੂ ਨੇ ਆਲੋਚਕਾਂ ਨੂੰ ਠੋਕਵੇ ਜਵਾਬ ਦਿੱਤੇ-ਇਕ ਖ਼ਬਰ
ਜਿਊਣਾ ਮੌੜ ਵੱਢਿਆ ਨਾ ਜਾਵੇ, ਛਵ੍ਹੀਆਂ ਦੇ ਘੁੰਡ ਮੁੜ ਗਏ।

ਪੰਜਾਬ ਸਰਕਾਰ ਨਸ਼ਿਆਂ ਦਾ ਖ਼ਾਤਮਾ ਕਰਨ 'ਚ ਫੇਲ੍ਹ- ਵਿਧਾਇਕ ਡਾ.ਗਾਂਧੀ
ਜੱਗ ਭਾਵੇਂ ਨਿੰਦਿਆ ਕਰੇ, ਸੱਸ ਪਿੱਟਣੀ ਪੰਜੇਬਾਂ ਪਾ ਕੇ।

ਮਾੜੇ ਖ਼ਰੀਦ ਕਾਰਨਾਂ ਕਰ ਕੇ ਕਿਸਾਨਾਂ ਦਾ ਮੱਕੀ ਤੋਂ ਮੋਹ ਭੰਗ- ਇਕ ਖ਼ਬਰ
ਪੰਜਾਬ ਸਿਆਂ ਜੋ ਮਰਜ਼ੀ ਬੀਜ ਲੈ, ਧੋਤੀਆਂ ਵਾਲ਼ਿਆਂ ਤੇਰੀਆਂ ਘੀਸੀਆਂ ਕਰਾਉਣੀਆਂ।

ਛਾਪਿਆਂ ਤੋਂ ਬਾਅਦ ਦੋਧੀ ਕਾਰਾਂ ਅਤੇ ਯੂ.ਐੱਸ.ਵੀ.ਰਾਹੀਂ ਦੁੱਧ ਢੋਣ ਲੱਗੇ-ਇਕ ਖ਼ਬਰ
ਯਾਨੀ ਕਿ ਕੁੱਤੇ ਦੀ ਪੂਛ ਸਿੱਧੀ ਨਹੀਂ ਹੋਵੇਗੀ।

ਹਰਿਆਣਾ ਸਮੇਤ ਕਈ ਰਾਜਾਂ ਦੇ ਰਾਜਪਾਲ ਬਦਲੇ- ਇਕ ਖ਼ਬਰ
ਵਿਚਾਰੇ ਚੱਕਵੇਂ ਚੁੱਲ੍ਹੇ ਨੇ, ਮੀਂਹ ਪਏ 'ਤੇ ਅੰਦਰ ਨਹੀਂ ਤਾਂ ਬਾਹਰ।

ਨਾਰਾਜ਼ ਵਿਧਾਇਕਾਂ ਦੇ ਗ਼ਿਲੇ-ਸ਼ਿਕਵੇ ਦੂਰ ਕਰਾਂਗਾ- ਕੇਜਰੀਵਾਲ
ਲੌਂਗ ਘੜਾ ਦਊਂਗਾ, ਗੁੱਸਾ ਛੱਡ ਮੁਟਿਆਰੇ।

ਨੋਟਬੰਦੀ ਤੇ ਜੀ.ਐੱਸ.ਟੀ. ਨਾਲ ਛੋਟੇ ਉਦਯੋਗਾਂ ਨੂੰ ਲੱਗੀ ਸੱਟ- ਆਰ.ਬੀ.ਆਈ.
ਬਹੁਤਿਆਂ ਭਰਾਵਾਂ ਵਾਲ਼ੀਏ, ਗੱਡਾ ਆ ਗਿਆ ਸੰਦੂਕੋਂ ਖ਼ਾਲੀ।

ਸਿਹਤ ਮੰਤਰੀ ਵਲੋਂ ਖਾਧ-ਪਦਾਰਥਾਂ 'ਚ ਮਿਲਾਵਟ ਕਰਨ ਵਾਲ਼ਿਆਂ ਨੂੰ ਤਾੜਨਾ- ਇਕ ਖ਼ਬਰ
ਰਿਸ਼ਵਤਾਂ ਲੈ ਕੇ ਸਭ ਕੁਝ ਪਾਸ ਕਰੀ ਜਾਣ ਵਾਲਿਆਂ ਬਾਰੇ ਕੀ ਖ਼ਿਆਲ ਐ ਮੰਤਰੀ ਜੀ?

ਬਾਬੇ ਨਾਨਕ ਦੇ ਅਵਤਾਰ ਦਿਹਾੜੇ ਸਾਰਾ ਖ਼ਾਲਸਾ ਪੰਥ ਇਕੱਠਾ ਹੋਵੇ- ਗਿਆਨੀ ਗੁਰਬਚਨ ਸਿੰਘ
ਗਿਆਨੀ ਜੀ, ਬਾਦਲਾਂ ਨੂੰ ਪੁੱਛ ਲਿਐ ਖ਼ਾਲਸਾ ਪੰਥ ਇਕੱਠਾ ਕਰਨ ਲਈ?

ਖ਼ਾਲਿਸਤਾਨ ਦਾ ਮੁੱਦਾ: ਯੂ.ਕੇ. ਨਾ ਹੱਕ 'ਚ ਨਾ ਵਿਰੋਧ'ਚ- ਇਕ ਖ਼ਬਰ
ਯਾਨੀ ਕਿ ਮੋਰ ਬੋਲਦਾ ਵੀ ਐ ਤੇ ਨਹੀਂ ਵੀ ਬੋਲਦਾ।

ਪੰਜਾਬ ਵਿਚ ਕਾਂਗਰਸ ਨਾਲ਼ ਗੱਠਜੋੜ ਨਹੀਂ ਕਰੇਗੀ 'ਆਪ'- ਕੇਜਰੀਵਾਲ
ਤੇਰੀ ਮੇਰੀ ਨਹੀਂ ਨਿਭਣੀ, ਤੂੰ ਤੇਲਣ ਮੈਂ ਸੁਨਿਆਰਾ।

ਪੰਜਾਬ 'ਚ ਫਾਡੀ ਰਹਿਣ ਵਾਲ਼ਾ ਸੁਖਬੀਰ ਹੁਣ ਹਰਿਆਣੇ 'ਚ ਗੱਪਾਂ ਮਾਰਨ ਲੱਗਾ- ਧਰਮਸੋਤ
25 ਪੰਜਾਬ ਵਾਲ਼ਾ ਤੇ 25 ਹਰਿਆਣੇ ਵਾਲ਼ਾ, 50 ਸਾਲ ਰਾਜ ਕਰੂ ਬਈ ਪੰਜਾਬ ਦਾ ਛ੍ਹੋਰਾ।

20Aug. 2018

ਆਪ ਪਾਰਟੀ ਦੇ ਮਾਝਾ ਜ਼ੋਨ ਵਲੋਂ ਖਹਿਰਾ ਧੜੇ ਨੂੰ 'ਘਰ ਵਾਪਸੀ ਦੀ ਅਪੀਲ'- ਇਕ ਖ਼ਬਰ
ਮੁੜ ਆ ਚੋਬਰਾ ਘਰ ਨੂੰ , ਰੋਸੇ ਛੱਡ ਦੇ ਵੇ।

ਬੀਬੀ ਜਗੀਰ ਕੌਰ ਵਲੋਂ ਪਿੱਪਲੀ ਰੈਲੀ 'ਚ ਪਹੁੰਚਣ ਦਾ ਸੱਦਾ- ਇਕ ਖ਼ਬਰ
ਪੈੜ ਜਗੀਰੋ ਦੀ ਪਿੱਪਲਾਂ ਹੇਠ ਦੀ ਜਾਵੇ।

ਪੰਚਾਇਤੀ ਚੋਣਾਂ ਵਿਚ ਧੱਕੇ ਨਾਲ਼ ਸਰਪੰਚ ਬਣਾਵਾਂਗੇ- ਕਾਂਗਰਸੀ ਵਿਧਾਇਕ ਸੰਤੋਖ ਸਿੰਘ
ਹੋਰ ਤੁਹਾਡੇ ਕੋਲੋਂ ਉਮੀਦ ਵੀ ਕੀ ਕੀਤੀ ਜਾ ਸਕਦੀ ਹੈ।

ਅਕਾਲੀ ਵਫ਼ਦ ਵਲੋਂ ਗ੍ਰਹਿ ਮੰਤਰੀ ਰਾਜਨਾਥ ਨਾਲ਼ ਮੁਲਾਕਾਤ- ਇਕ ਖ਼ਬਰ
ਗ੍ਰਹਿ ਮੰਤਰੀ ਜੀ ਸਾਡੇ ਗ੍ਰਹਿ ਵੀ ਟਾਲ਼ੋ, ਕੋਈ ਹਵਨ ਹੁਵਨ ਦੱਸੋ ਸਾਨੂੰ ਵੀ।

ਰਣਜੀਤ ਸਿੰਘ ਰਿਪੋਰਟ ਜਾਣ-ਬੁਝ ਕੇ 'ਲੀਕ' ਕੀਤੀ ਗਈ- ਇਕ ਖ਼ਬਰ
ਨੰਗਾ ਰੱਖਦੀ ਕਲਿੱਪ ਵਾਲ਼ਾ ਪਾਸਾ, ਛੜਿਆਂ ਦੀ ਹਿੱਕ ਲੂਹਣ ਨੂੰ।

ਹਾਕਮ ਧਿਰ ਵਲੋਂ ਅਕਾਲੀਆਂ 'ਤੇ ਤਿੱਖੇ ਹਮਲੇ ਦੀ ਤਿਆਰੀ- ਇਕ ਖ਼ਬਰ
ਚੁੱਕ ਲਉ ਡਾਂਗਾਂ ਤੇ ਖਿੱਚੋ ਤਿਆਰੀਆਂ ਜੀ, ਸੁੱਕਾ ਜਾਵੇ ਨਾ ਦੁਸ਼ਮਣ ਮੈਦਾਨ ਵਿਚੋਂ।

ਈਸੜੂ ਕਾਨਫਰੰਸ: ਸਿਆਸੀ ਪਾਰਟੀਆਂ ਨੇ ਇਕ ਦੂਜੇ ਖ਼ਿਲਾਫ਼ ਦਾਗ਼ੇ ਸ਼ਬਦੀ ਬਾਣ- ਇਕ ਖ਼ਬਰ
ਰੋਂਦੀਆਂ ਯਾਰਾਂ ਨੂੰ, ਨਾਂ ਲੈ ਲੈ ਕੇ ਭਰਾਵਾਂ ਦੇ।

ਭਾਈ ਲੌਂਗੋਵਾਲ ਵਲੋਂ ਨਾਨਕਸਰ ਸੰਪਰਦਾ ਨਾਲ਼ ਮੀਟਿੰਗ- ਇਕ ਖ਼ਬਰ
ਬਾਬਿਓ, ਕੋਈ ਸੇਵਾ ਹੋਵੇ ਤਾਂ ਦੱਸਿਉ, ਵੋਟਾਂ ਬਾਦਲ ਅਕਾਲੀ ਦਲ ਨੂੰ ਹੀ ਪਾਇਉ ਜੀ।

ਲਾਲ ਕਿਲ੍ਹੇ ਤੋਂ ਮੋਦੀ ਨੇ ਗਿਣਵਾਈਆਂ ਸਰਕਾਰ ਦੀਆਂ ਪ੍ਰਾਪਤੀਆਂ- ਇਕ ਖ਼ਬਰ
ਢਾਬ ਤੇਰੀ ਦਾ ਗੰਧਲਾ ਪਾਣੀ, ਉੱਤੋਂ ਬੂਰ ਹਟਾਵਾਂ।

ਗੱਡੀ 'ਚ ਬਹਿ ਕੇ ਹੈਰੋਇਨ ਦਾ ਨਸ਼ਾ ਕਰਦਾ ਹਵਾਲਦਾਰ ਗ੍ਰਿਫ਼ਤਾਰ- ਇਕ ਖ਼ਬਰ
ਕਿਉਂ! ਲੱਗ ਗਿਐ ਨਾ ਪਤਾ ਪੰਜਾਬ 'ਚੋਂ ਨਸ਼ਾ ਕਿਉਂ ਖ਼ਤਮ ਨਹੀਂ ਹੁੰਦਾ।

ਕੈਪਟਨ ਸਰਕਾਰ ਪੰਜਾਬੀ ਨੂੰ ਵਿਸਾਰ ਕੇ ਅੰਗਰੇਜ਼ੀ ਨੂੰ ਤਰਜੀਹ ਦੇ ਰਹੀ ਹੈ-ਇਕ ਖ਼ਬਰ
ਇਹ ਮਾਂ ਨੂੰ ਧੱਕੇ ਮਾਰਦਾ, ਇਹਨੂੰ ਮਾਸੀ ਨਾਲ਼ ਪਿਆਰ।

ਭਾਜਪਾ ਦੇ ਦੋ ਯੁਵਾ ਨੇਤਾ 195 ਪੇਟੀਆਂ ਨਾਜਾਇਜ਼ ਸ਼ਰਾਬ ਸਮੇਤ ਗ੍ਰਿਫ਼ਤਾਰ- ਇਕ ਖ਼ਬਰ
ਕੋਇਲਾਂ ਕੂਕਦੀਆਂ, ਖਾਹ ਬਾਗ਼ਾਂ ਦੇ ਮੇਵੇ।

13 Aug. 2018

ਭਾਜਪਾ ਨੇ ਰਾਜ ਸਭਾ ਦੇ ਡਿਪਟੀ ਚੇਅਰਮੈਨ ਲਈ ਅਕਾਲੀ ਦਲ ਦਾ ਦਾਅਵਾ ਰੱਦ ਕੀਤਾ - ਇਕ ਖ਼ਬਰ
ਗੋਰੇ ਰੰਗ 'ਤੇ ਝਰੀਟਾਂ ਵੱਜੀਆਂ, ਬੇਰੀਆਂ ਦੇ ਬੇਰ ਖਾਣੀਏਂ।

ਬਰਗਾੜੀ ਇਨਸਾਫ਼ ਮੋਰਚੇ 'ਚ ਤਰੇੜਾਂ ਪਈਆਂ- ਇਕ ਖ਼ਬਰ
ਕੂੰਡੇ ਭੱਜ ਗਏ ਘੋਟਣੇ ਟੁੱਟ ਗਏ, ਤਕੀਏ ਮਲੰਗ ਲੜ ਪਏ।

ਖਹਿਰਾ ਧੜੇ ਵਲੋਂ ਭਗਵੰਤ ਮਾਨ ਦੀ ਦੋ ਸਾਲ ਪੁਰਾਣੀ ਆਡੀਓ ਜਾਰੀ- ਇਕ ਖ਼ਬਰ
ਤੇਰੇ ਛੱਲੇ ਨੇ ਪੁਆੜੇ ਪਾਏ, ਲਿਆ ਭਾਬੀ ਨੇ ਪਛਾਣ ਮਿੱਤਰਾ।

ਲੋਕਾਂ ਕੋਲ਼ ਪਾਉਣ ਨੂੰ ਕੱਪੜੇ ਨਹੀਂ ਤੇ ਸਰਕਾਰ ਵਾਸ਼ਿੰਗ ਮਸ਼ੀਨਾਂ ਵੰਡ ਰਹੀ ਹੈ- ਸੁਪਰੀਮ ਕੋਰਟ
ਢਿੱਡੋਂ ਭੁੱਖੀ ਤੇ ਘੀਸੀ 'ਤੇ ਜ਼ੋਰ।

ਬਾਦਲੀਆਂ ਨੇ ਭਾਜਪਾ ਨਾਲ਼ ਨਾਰਾਜ਼ਗੀ ਸਹੇੜਨ ਦਾ ਇਰਾਦਾ ਟਾਲ਼ਿਆ- ਇਕ ਖ਼ਬਰ
ਹੁਣ ਅੱਕਾਂ ਤੋਂ ਭਾਲ਼ਦੇ ਡੇਲੇ, ਜੱਟਾਂ ਨੇ ਕਰੀਰ ਪੁੱਟ ਲਏ।

ਮਾਨ ਨੇ ਅਸਤੀਫ਼ੇ ਦਾ ਕੀਤਾ ਸੀ ਸਿਰਫ਼ ਡਰਾਮਾ- ਸੁਖਪਾਲ ਖਹਿਰਾ
ਮੂੰਹ ਦਾ ਮਿੱਠੜਾ ਮੁੰਡਾ, ਦਿਲ 'ਚ ਰੱਖੇ ਬੇਈਮਾਨੀ।

ਪਾਰਟੀ ਦੇ ਏਕੇ ਲਈ ਅਹੁੱਦਾ ਛੱਡਣ ਲਈ ਤਿਆਰ ਹਾਂ- ਹਰਪਾਲ ਚੀਮਾ
ਡੋਰ ਵੱਟ ਕੇ ਗਲ਼ੇ ਦੇ ਵਿਚ ਪਾਵਾਂ, ਮਿੱਤਰਾ ਤਵੀਤ ਬਣ ਜਾ।

ਬਰਗਾੜੀ ਦੀ ਦੁਖਦਾਈ ਘਟਨਾ 'ਤੇ ਸਰਕਾਰ ਨੇ ਧਾਰੀ ਚੁੱਪ- ਇਕ ਖ਼ਬਰ
ਕੁਝ ਬੋਲ ਵੇ ਦਿਲਾਂ ਦੀ ਘੁੰਡੀ ਖੋਲ੍ਹ ਵੇ, ਕਿ ਅੱਧੀ ਰਾਤੋਂ ਰਾਤ ਟੱਪ ਗਈ।

ਸਿਆਸਤਦਾਨ ਅਤੇ ਪੁਲਿਸ ਵਿਭਾਗ ਨਸ਼ੇ ਖ਼ਤਮ ਕਰਨ ਪ੍ਰਤੀ ਸੁਹਿਰਦ ਨਹੀਂ- ਡਾ. ਸੋਹਲ
ਕੋਈ ਊਠਾਂ ਵਾਲ਼ੇ ਨੀਂ, ਲੁੱਟ ਕੇ ਸੇਜ ਸੱਸੀ ਦੀ ਲੈ ਗਏ।

ਪੰਜਾਬ 'ਚ ਫ਼ਿਕਰਮੰਦੀ ਅਤੇ ਫ਼ਰਜ਼ ਦੀ ਰਾਜਨੀਤੀ ਨਹੀਂ, ਖਰਮਸਤੀਆਂ ਦੀ ਰਾਜਨੀਤੀ ਹੋ ਰਹੀ ਹੈ-ਰਾਮੂਵਾਲੀਆ
ਜ਼ਖ਼ਮ ਮਿਲਾਉਣਾ ਔਖਾ ਤੇ ਤਲਵਾਰ ਚਲਾਉਣੀ ਸੌਖੀ ਆ।

ਸਾਖਰਤਾ ਕਮੇਟੀ ਦੇ ਸਟੋਰ 'ਚ ਰੱਦੀ ਦਾ ਢੇਰ ਬਣੀਆਂ ਹਜ਼ਾਰਾਂ ਕਿਤਾਬਾਂ- ਇਕ ਖ਼ਬਰ
ਬੋਤਲਾਂ ਹੁੰਦੀਆਂ ਤਾਂ ਸਾਂਭਦੇ ਲੱਖ ਵਾਰੀ, ਕੀ ਕਰੀਏ ਕਾਲ਼ੇ ਕਾਗ਼ਜ਼ਾਂ ਨੂੰ।

'ਆਪ' ਦੀਆਂ ਦੋਵੇਂ ਧਿਰਾਂ 'ਚ ਟਕਰਾਅ ਵਧਣ ਦੇ ਆਸਾਰ- ਇਕ ਖ਼ਬਰ
ਹੁਕਮ ਹੋਵੇ ਤਾਂ ਤੇਗ਼ਾਂ ਨੂੰ ਖਿੱਚ ਲਈਏ,ਵਿਚ ਲੜਨ ਦੇ ਨਾਹੀਂ ਕੁਝ ਦੇਰ ਮੀਆਂ।

ਸੁਖਪਾਲ ਖਹਿਰਾ ਤੋਂ ਅਹੁੱਦਾ ਸੰਭਾਲਿਆ ਨਹੀਂ ਗਿਆ- ਭਗਵੰਤ ਮਾਨ
ਲਓ ਕਰ ਲਉ ਗੱਲ ਬਈ! ਕੀਤੀ ਨਾ ਝੰਡੇ ਅਮਲੀ ਵਾਲ਼ੀ ਗੱਲ।

ਮੋਰਚੇ ਨਾਲ ਨਿਬੇੜਾ ਹੋ ਜਾਵੇਗਾ ਕਿ ਅਸਲੀ ਸਿੱਖ ਕੌਣ ਹੈ ਤੇ ਸੌਦਾ ਸਾਧ ਦਾ ਚੇਲਾ ਕੌਣ ਹੈ- ਦਾਦੂਵਾਲ
ਵਾਰਸਸ਼ਾਹ ਇਸ ਕੂੜ ਦੀ ਜ਼ਿੰਦਗੀ ਤੋਂ, ਕਿਉਂ ਵੇਚੀਏ ਮੁਫ਼ਤ ਈਮਾਨ ਮੀਆਂ।

ਵਿਧਾਨ ਸਭਾ 'ਚ ਕਾਂਗਰਸੀਆਂ ਵਲੋਂ ਬੋਲਿਆ ਕੂੜ ਇਤਿਹਾਸ 'ਚ ਕਾਲੇ ਅੱਖਰਾਂ ਨਾਲ ਲਿਖਿਆ ਜਾਵੇਗਾ-ਢੀਂਡਸਾ
'ਕਾਰਨਾਮੇ' ਤੁਹਾਡੇ ਵੀ ਅਕਾਲੀਓ ਸੁਨਹਿਰੀ ਅੱਖਰਾਂ 'ਚ ਨਹੀਂ ਲਿਖੇ ਜਾਣੇ।

ਭਾਰਤ 'ਚ ਸੱਚ ਬੋਲਣ ਵਾਲ਼ਿਆਂ ਲਈ ਖ਼ਤਰਨਾਕ ਸਮਾਂ- ਅਮਨੈਸਟੀ ਇੰਟਰਨੈਸ਼ਨਲ
ਘਰ ਬਾਰ ਲੈ ਗਈ ਲੁੱਟ ਕੇ, ਯਾਰੀ ਲਾਈ ਸੀ ਗੁਆਂਢਣ ਕਰ ਕੇ।

ਦੋ ਹਫ਼ਤਿਆਂ ਮਗਰੋਂ ਸੰਗਤ 'ਚ ਦਿਖ਼ਾਈ ਦਿੱਤੇ ਅਕਾਲ ਤਖ਼ਤ ਦੇ ਜਥੇਦਾਰ- ਇਕ ਖ਼ਬਰ
ਜੇਠ ਕੋਲ਼ੋਂ ਸੰਗ ਲਗਦੀ, ਨੀਂ ਮੈਂ ਕਿਵੇਂ ਗਿੱਧੇ ਵਿਚ ਆਵਾਂ।

ਗਿਆਨੀ ਗੁਰਮੁਖ ਸਿੰਘ ਗੁਰੂ ਕੀ ਗੋਲਕ 'ਤੇ ਬੋਝ ਸਾਬਤ ਹੋ ਰਹੇ ਹਨ- ਇਕ ਖ਼ਬਰ
ਬੱਚੀਆਂ ਪਾਉਂਦਾ ਰਹਿੰਦਾ ਨੀਂ, ਮੁੰਡਾ ਮੁਟਿਆਰ ਦੀਆਂ।

'ਆਪ' ਵਲੋਂ ਪੰਜਾਬ 'ਚ ਕਾਂਗਰਸ ਨਾਲ਼ ਗੱਠਜੋੜ ਦੇ ਆਸਾਰ ਬਹੁਤ ਮੱਧਮ- ਇਕ ਖ਼ਬਰ
ਤੇਰੀ ਮੇਰੀ ਨਹੀਂ ਨਿਭਣੀ, ਤੂੰ ਤੇਲਣ ਮੈਂ ਸੁਨਿਆਰਾ।

ਪੰਥ ਦੇ ਨਾਂ 'ਤੇ ਰਾਜਨੀਤੀ ਕਰਨ ਵਾਲ਼ਾ ਬਾਦਲ ਪਰਵਾਰ ਸੰਕਟ ਵਿਚ- ਇਕ ਖ਼ਬਰ
ਅੱਗੇ ਤਾਂ ਟੱਪਦਾ ਸੀ ਨੌਂ ਨੌਂ ਕੋਠੇ, ਹੁਣ ਨਹੀਂ ਟਪੀਂਦੀਆਂ ਖਾਈਆਂ।

ਸਿੱਧੂ ਨੇ ਵੀਡੀਓ ਜਾਰੀ ਕਰ ਕੇ ਕੋਟ ਕਪੂਰਾ ਗੋਲ਼ੀ ਕਾਂਡ ਦੇ ਦੱਬੇ ਵਰਕੇ ਫ਼ਰੋਲੇ- ਇਕ ਖ਼ਬਰ
ਲੱਡੂ ਖਾ ਕੇ ਚੁਬਾਰੇ ਵਿਚੋਂ ਨਿੱਕਲੀ, ਮੱਖੀਆਂ ਨੇ ਪੈੜ ਨੱਪ ਲਈ।

ਸ਼੍ਰੋਮਣੀ ਕਮੇਟੀ ਅਤੇ ਅਕਾਲੀ ਦਲ ਦੇ ਮੁੱਖ ਨੁਮਾਇੰਦਿਆਂ ਨੇ ਆਪਣੀ ਜ਼ਿੰਮੇਵਾਰੀ ਨਹੀਂ ਨਿਭਾਈ- ਪੰਜੌਲੀ
ਨਾਮ ਜਪਿਆ ਨਾ ਭਗਤੀ ਕੀਤੀ, ਕਿੱਥੋਂ ਭਾਲ਼ੇਂ ਰਾਜਗੱਦੀਆਂ

ਖਾਧ-ਪਦਾਰਥਾਂ 'ਚ ਮਿਲਾਵਟ ਕਰਨ ਵਾਲ਼ਿਆਂ ਨੂੰ ਬਖ਼ਸ਼ਿਆ ਨਹੀਂ ਜਾਵੇਗਾ- ਬ੍ਰਹਮ ਮਹਿੰਦਰਾ
ਚਾਰ ਦਿਨ ਦੇ ਫੋਕੇ ਦਮਗ਼ਜ਼ੇ ਜੀ, ਖੋਤੀ ਬੋਹੜ ਹੇਠਾਂ ਮੁੜ ਆਵਣੀ ਏਂ।

ਖਹਿਰਾ ਦੀ ਰੈਲੀ 'ਚ ਸ਼ਾਮਲ ਹੋਣਗੇ ਡਾ.ਧਰਮਵੀਰ ਗਾਂਧੀ- ਇਕ ਖ਼ਬਰ
ਮਿੱਠੇ ਬੇਰ ਸੁਰਗਾਂ ਦਾ ਮੇਵਾ, ਕੋਲ਼ ਬਹਿ ਕੇ ਚੁਗ ਮਿੱਤਰਾ।

ਲੋਕ ਸਭਾ ਚੋਣਾਂ 'ਚ ਸਾਨੂੰ ਕੋਈ ਚੁਣੌਤੀ ਨਹੀਂ ਦਿਸਦੀ- ਮੋਦੀ
ਪਰ ਅੰਦਰੋਂ ਡਰ ਲਗਦਾ, ਬੁਰਛਾ ਦਿਓਰ ਕੁਆਰਾ।

ਰਾਮ ਮੰਦਰ ਬਣ ਕੇ ਰਹੇਗਾ ਕਿਉਂਕਿ ਸੁਪਰੀਮ ਕੋਰਟ ਵੀ ਸਾਡੀ ਹੈ- ਭਾਜਪਾ ਵਿਧਾਇਕ
ਮੈਂ ਡਿਪਟੀ ਦੀ ਸਾਲ਼ੀ, ਕੈਦ ਕਰਾ ਦਊਂਗੀ।

ਆਰ.ਬੀ.ਆਈ ਨੂੰ ਕਿਉਂ ਨਹੀਂ ਦਿਸਦੀ ਕਾਰਪੋਰੇਟ ਸੈਕਟਰ ਦੀ ਕਰਜ਼ਾ ਮੁਆਫ਼ੀ- ਇਕ ਸਵਾਲ
ਸਿਰ ਫੌਜ ਦੇ ਰਿਹਾ ਨਾ ਕੋਈ ਕੁੰਡਾ, ਹੋਵੇ ਸ਼ੁਤਰ ਜਿਉਂ ਬਾਝ ਮੁਹਾਰ ਮੀਆਂ।

ਗੁਰੂ ਗ੍ਰੰਥ ਸਾਹਿਬ ਦੀ ਸ਼ਾਨ ਲਈ ਸਭ ਕੁਰਬਾਨ- ਬਾਦਲ
ਇਹ ਤਾਂ ਚਿੱਟੇ ਦਿਨ ਵਾਂਗ ਸਾਫ਼ ਹੋ ਗਿਆ ਬਾਦਲ ਸਾਹਿਬ ਜੀ।

ਸਰਕਾਰ ਦੀਆਂ ਗ਼ਲਤ ਅਤੇ ਕਾਰਪੋਰੇਟ ਪੱਖੀ ਨੀਤੀਆਂ ਕਾਰਨ ਦੇਸ਼ 'ਚ ਆਰਥਿਕ ਸੰਕਟ 'ਚ-ਡਾ.ਦਿਆਲ
ਕੁਝ ਲੁੱਟ ਲਈ ਮੈਂ ਪਿੰਡ ਦਿਆਂ ਪੰਚਾਂ, ਕੁਝ ਲੁੱਟ ਲਈ ਸਰਕਾਰਾਂ।