ਅਲਵਿਦਾ ਦਾਦਾ ਸ੍ਰੀ - ਬਿੱਟੂ ਅਰਪਿੰਦਰ ਸਿੰਘ  ਜਰਮਨ

ਰਾਣਾ ਰਾਉ ਨ ਕੋ ਰਹੈ ਰੰਗੁ ਨ ਤੁੰਗੁ ਫਕੀਰੁ॥
ਵਾਰੀ ਆਪੋ ਆਪਣੀ ਕੋਇ ਨ ਬੰਧੈ ਧੀਰ ॥ 
ਅਲਵਿਦਾ ਦਾਦਾ ਸ੍ਰੀ 
“ਹਾਢਾ ਜਵਾਨ ਪੜਕੇ ਡੀ ਸੀ ਲੱਗੂ “ ਇਹ ਬੋਲ ਸੀ ਬਾਪੂ ਜੀ ਸਰਪੰਚ ਸ. ਮੱਸਾ ਸਿੰਘ ਹੋਣਾ ਦੇ ਜਦੋਂ ਮੈਂ ਪਹਿਲੀ ਵਾਰ ਟਾਈ ਲਾ ਕੇ ਬੇਰਿੰਗ ਕਰਿਸਚੀਅਨ ਸਕੂਲ ਵਟਾਲੇ ਪੜਨ ਗਿਆ ਸੀ । ਜਦੋਂ ਬੜੇ ਵਰੇ ਪਹਿਲਾਂ ਮੈਂ ਜਰਮਨ ਤੋ ਪਹਿਲੀ ਵਾਰ ਪੰਜਾਬ ਗਿਆ ਤਾਂ ਬਾਪੂ ਆਂਹਦਾ ਕੀ ਕਾਰੋਬਾਰ ਕਰਦਾ ਹੁੰਨਾਂ ਬਾਹਰ ? ਮੈਂ ਗੱਲ ਪਲਟਣ ਦੇ ਬਹਾਨੇ ਕਿਹਾ ਬਾਪੂ ਤੁੰਹੀ ਕਹਿੰਦੇ ਹੀ ਵੱਡਾ ਹੋਕੇ ਡੀ ਸੀ ਲੱਗੂ ਓਹ ਤੇ ਲੱਗ ਨੀ ਹੋਇਆ ! ਬਾਪੂ ਕਹਿੰਦਾ ਭਲਾ ਹੋਇਆ ਨਹੀਂ ਲੱਗਾ ਜਿਹੜੇ ਲੱਗੇ ਉਹ ਵੀ ਤੇ ਵੱਢੀ ਲਈ ਜਾਂਦੇ ਨਿਕਰਮੇ ! 
ਦੁੱਧ ਚਿੱਟੀ ਆਤਮਾ ਵਾਲੇ ਬਾਪੂ ਦਾ ਲਿਬਾਸ ਵੀ ਸਾਰੀ ਉਮਰ ਚਿੱਟਾ ਹੀ ਰਿਹਾ । ਚਿੱਟਾ ਕੁੜਤਾ , ਚਿੱਟਾ ਚਾਦਰਾ ਤੇ ਚਿੱਟੀ ਦਸਤਾਰ ਵਿੱਚ ਮੈਂ ਬਾਪੂ ਨੂੰ ਹਮੇਸ਼ਾ ਵੇਖਿਆ । ਏਸੇ ਲਿਬਾਸ ਵਿੱਚ ਹੀ ਬਾਪੂ ਹੋਣਾ ਬੜੀ ਸ਼ਰਧਾ ਨਾਲ ਗੁਰਦੁਆਰਾ ਸ੍ਰੀ ਅੱਚਲ ਸਾਹਿਬ ਜੋੜਿਆਂ ਤੇ ਬਰਤਨਾਂ ਦੀ ਸੇਵਾ ਕਰਨੀ । ਕਾਰ ਸੇਵਾ ਵਾਲੇ ਮਹਾਂਪੁਰਖਾਂ ਨਾਲ ਵੀ ਬਾਪੂ ਜੀ ਦਾ ਡਾਹਢਾ ਪਿਆਰ ਰਿਹਾ । ਮੈਨੂੰ ਚੇਤਾ ਜਦੋਂ ਗੁਰਦੁਆਰਾ ਸ੍ਰੀ ਅਚੱਲ ਸਾਹਿਬ ਸਾਹਿਬ ਅਖੌਤੀ ਕਾਲੀਆਂ ਦੇ ਕਬਜ਼ੇ ਚੋਂ ਛੁਡਾ ਕੇ ਕਾਰ ਸੇਵਾ ਵਾਲੇ ਮਹਾਂਪੁਰਸ਼ਾਂ ਨੂੰ ਸੌਂਪਿਆ ਸੀ ਬਾਪੂ ਜੀ ਨਿੱਠ ਕਿ ਬਾਬਿਆਂ ਨਾਲ ਖੜੇ ਸੀ । ਏਸੇ ਤਰਾਂ ਹੀ ਛੇਵੀਂ ਪਾਤਸ਼ਾਹੀ ਜੀ ਦੇ ਗੁਰਦੁਆਰਾ ਸ੍ਰੀ ਗੁਰੂਆਣਾ ਸਾਹਿਬ ਦੀ ਸੇਵਾ ਵੇਲੇ ਅਖੌਤੀ ਮੋਹਤਬਰਾਂ ਨਾਲ ਟੱਕਰ ਲੈਕੇ ਗੁਰੂ ਘਰ ਦੀ ਸੇਵਾ ਮਹਾਂਪੁਰਸ਼ਾਂ ਨੂੰ ਸੌਂਪੀ ਸੀ । 
ਸੱਭ ਨੇ ਇੱਕ ਦਿਨ ਤੁਰ ਜਾਣਾ ਕਿਹੇ ਨੇ ਅੱਗੋਂ ਕਿਸੇ ਨੇ ਪਿੱਛੋਂ ਪਰ ਕੁਹ ਅਭੁੱਲ ਤੇ ਅਮਿੱਟ ਯਾਦਾਂ ਹੁੰਦੀਆਂ ਜੋ ਉਮਰ ਭਰ ਯਾਦ ਰਹਿੰਦੀਆਂ । ਜਦੋਂ ਬਾਪੂ ਸਰਪੰਚ ਨੇ ਗੁਰਦਾਸਪੁਰ ਜੇਲ੍ਹ ਚੋਂ ਵਟਾਲੇ ਤਰੀਕੇ ਆਉਣਾ ਤਾਂ ਸੱਤ ਫੁੱਟ ਦੇ ਬਾਪੂ ਸਰਪੰਚ ਨੂੰ ਹੱਥਕੜੀਆਂ ਲਈ ਪੁਲਿਸ ਆਲੇ ਬੌਣੇ ਜਹੇ ਲੱਗਣੇ ! ਵੱਡੇ ਬਾਗ਼ ਪਰਿਵਾਰ ਤੇ ਰਿਸ਼ਤੇਦਾਰਾਂ ਦਾ ਕਚਹਿਰੀਆਂ ਚ, ਮੇਲਾ ਲੱਗ ਜਾਣਾ ! ਸਾਰਿਆਂ ਸ਼ਕਰ ਘਿਓ, ਖ਼ੀਰ ਕੜਾਹ ਕੁਹ ਨਾ ਕੁਹ ਲੈ ਆਉਣਾ ਪੁਲਿਸ ਆਲ਼ਿਆਂ ਹੱਸਕੇ ਕਹਿਣਾ ਸਰਪੰਚਾ ਤਾਹਡੀ ਤਰੀਕ ਤੇ ਰੋਜ਼ ਪੈਣੀ ਚਹੀਦੀ ਨਾਲ ਸਾਡੇ ਵੀ ਲੇਹੜ ਹੋ ਜਾਂਦੇ । 
ਸਾਡੇ ਖੁੱਲੇ ਡੁੱਲੇ ਦਾਦਕੇ ਪਰਿਵਾਰ ਤੇ ਗੁਰੂ ਪਾਤਸ਼ਾਹ ਜੀਆਂ ਦੀ ਸਦਾ ਅਪਾਰ ਬਖਸ਼ਿਸ਼ ਰਹੀ ! ਧੰਨ ਗੁਰੂ ਗ੍ਰੰਥ ਸਾਹਿਬ ਜੀ ਸਦਾ ਅੰਗ ਸੰਗ ਹਨ ! ਡੇਰੇ ਤੇ ਬਣਿਆ ਅਲੀਸ਼ਾਨ ਗੁਰਦੁਆਰਾ ਸਾਹਿਬ ਵਟਾਲੇ ਤੋਂ ਜਲੰਧਰ ਨੂੰ ਜਾਂਦਿਆਂ ਸੱਜੇ ਹੱਥ ਹਾਈਵੇ ਤੋਂ ਦਿੱਖ ਜਾਂਦਾ ਹੈ । ਜੋ ਅਕਾਲ ਪੁਰਖ ਵਾਹਿਗੁਰੂ ਨੇ ਆਪ ਕਿਰਪਾ ਕਰਕੇ ਬਣਵਾਇਆ ਹੈ ।  ਗੁਰੂ ਦੀ ਰਹਿਮਤ ਤੇ ਬਖਸ਼ੀ ਵਡਿਆਈ ਵੀ ਏਨੀ ਮਿਲੀ ਕਿ ਪਹਿਲਾਂ ਬਾਪੂ ਜੀ ਸਰਪੰਚ ਰਹੇ ਤੇ ਫੇਰ ਮੇਰੇ ਪਿਤਾ ਜੀ ਸਰਪੰਚ ! ਲੰਬੜਦਾਰੀ ਵੀ ਪਰਿਵਾਰ ਕੋਲ ਹੈ ! ਭਾਵ ਚਾਚਾ ਜੀ ਲੰਬੜਦਾਰ ਹਨ ! ਕੁੱਲ ਰਹਿਮਤਾਂ ਅਕਾਲ ਪੁਰਖ ਵਾਹਿਗੁਰੂ ਜੀ ਦੀਆਂ ! 
ਸੋ ਜਿੰਦਗੀ ਦੇ ਕਈ ਹਾੜ ਸਿਆਲ ਵੇਖ ਨੱਬੇ ਪਚਾਨਵੇਂ ਸਾਲ ਦੀ ਉਮਰ ਭੋਗ ਬਾਪੂ ਜੀ ਪਿੱਛਲੇ ਦਿਨੀ ਆਖ਼ਰੀ ਫ਼ਤਿਹ ਬੁੱਲਾ ਗਏ ! ਸੰਖੇਪ ਬਿਮਾਰੀ ਬਾਅਦ ਆਰਮੀ ਹਸਪਤਾਲ ਤੋਂ ਛੁੱਟੀ ਮਿਲਣ ਉਪਰੰਤ ਬਾਪੂ ਜੀ ਪਰਿਵਾਰ ਨੂੰ ਵਿਛੋੜਾ ਦੇ ਅਕਾਲ ਪੁਰਖ ਦੇ ਚਰਨਾਂ ਵਿਚ ਜਾ ਬਿਰਾਜੇ ! ਬਾਪੂ ਸਿਰਦਾਰ ਮੱਸਾ ਸਿੰਘ ਜੀ ਸਾਬਕਾ ਸਰਪੰਚ ਸੇਖਵਾਂ ਹੋਣਾ ਦੀ ਆਤਮਿਕ ਸ਼ਾਂਤੀ ਲਈ ਰੱਖੇ ਸ੍ਰੀ ਅਖੰਡ ਪਾਠ ਸਾਹਿਬ ਜੀ ਦੇ ਭੋਗ 21 ਜੁਲਾਈ 2025 ਦਿਨ ਸੋਮਵਾਰ ਨੂੰ ਪਿੰਡ ਸੇਖਵਾਂ ਡੇਰਾ ਬਾਬਾ ਦਮਦਮਾ ਸਾਹਿਬ ਵਿਖੇ ਪੈਣਗੇ ! ਅੰਤਿਮ ਅਰਦਾਸ ਵਿੱਚ ਸ਼ਾਮਲ ਹੋਣ ਦੀ ਬੇਨਤੀ ਹੈ ਜੀ ! 
ਹੋਈਆਂ ਭੁੱਲਾਂ ਚੁੱਕਾਂ ਦੀ ਖਿਮਾਂ ਜੀ ! 
ਅਕਾਲ ਸਹਾਇ ! 
ਬਿੱਟੂ ਅਰਪਿੰਦਰ ਸਿੰਘ  ਜਰਮਨ