ਪੱਗਾਂ ਚ, ਸਿਰ ਫਸਾਈ ਗੰਡੋਏ ! - ਬਿੱਟੂ ਅਰਪਿੰਦਰ ਸਿੰਘ ਜਰਮਨ

ਮੇਰੇ ਪਿੰਡ ਦੇ ਚੜਦੇ ਪਾਸੇ ਢਾਬਾਂ ਕੰਢੇ ਇੱਕ ਪਿੱਪਲ ਦਾ ਰੁੱਖ ਹੁੰਦਾ ਸੀ । ਮੈਹਰਿਆਂ ਦਾ ਵਿਚਕਾਰਲਾ ਮੁੰਡਾ ਸ਼ਿੰਦਾ ਤਿੱਖੜ ਦੁਪਹਿਰੇ ਛੱਪੜ ਵਿੱਚ ਕੁੰਡੀ ਸੁੱਟ ਕੇ ਘੰਟਿਆਂ ਬੱਧੀ ਪਿੱਪਲ ਦੀ ਛਾਂਵੇ ਬੈਇਠਾ ਰਹਿੰਦਾ ! ਅੰਹੀ ਨਿਆਣੇ ਹੁੰਦੇ ਸਾਂ ਤੇ ਟੈਮ ਪਾਸ ਕਰਨ ਲਈ ਲਈ ਚਾਚੇ ਸ਼ਿੰਦੇ ਕੋਲ ਜਾ ਬਹਿੰਦੇ !
ਸ਼ਿੰਦਾ ਇਕਹਿਰੇ ਜਹੇ ਸਰੀਰ ਵਾਲਾ ਹਸਮੁਖ ਸੁਭਾਅ ਦਾ ਮਾਲਕ ਸੀ । ਉਹ ਨੱਕ ਵਿੱਚ ਬੋਲਦਾ ਤੇ ਸਿਰ ਤੇ ਬੱਝੇ ਮੜਾਸੇ ਨੂੰ ਅਕਸਰ ਹਲਾਉਂਦਾ ਰਹਿੰਦਾ ਜਾਂ ਗਿੱਚੀ ਘੁਰਕਦਾ ਰਹਿੰਦਾ ! ਢਿੰਝਣ ਦੇ ਲੰਮੇ ਢਾੰਗੇ ਨਾਲ ਬੱਝੀ ਕੁੰਡੀ ਦਾ ਕਾਨਾ  ਜਦੋਂ ਛੱਪੜ ਚ, ਹਿੱਲਦਾ ਤੇ ਉਹ ਸੁਚੇਤ ਹੋ ਜਾਂਦਾ ਕਿ ਸ਼ਿਕਾਰ ਫਸ ਗਿਆ !
ਸਾਡੇ ਨਿਆਣਿਆਂ ਲਈ ਦਿਲਚਸਪ ਚੀਜ਼ ਉਹਦੇ ਲਾਗੇ ਪਈ ਅੱਧ ਵੱਡੀ ਪਲਾਸਟਿਕ ਦੀ ਬੋਤਲ ਹੁੰਦੀ ! ਜਿਹਦੇ ਚ, ਕੀੜੇ ਜਾਂ ਸੁੰਡੇ ਕੁਰਬਲ ਕੁਰਬਲ ਕਰ ਰਹੇ ਹੁੰਦੇ ! ਚਾਚਾ ਆਹ ਕਾਹਦੇ ਲਈ ਆ ? ਮੇਰਾ ਅਗਲਾ ਸਵਾਲ ਹੁੰਦਾ ! ਚਾਚਾ ਸ਼ਿੰਦਾ ਖੱਚਰਾ ਜਿਹਾ ਹੱਸਦਾ ਗਿੱਚੀ ਖੁਰਕਦਾ ਤੇ ਆਂਹਦਾ, “ਪੁੱਤ ਇਹ ਗੰਡੋਏ ਆ, ਮੱਛੀ ਫਸਾਉਣ ਦਾ ਕੰਮ ਇਹਨਾਂ ਦਾ ਵਾ ! ਏਨੇ ਨੂੰ ਕੋਈ ਵੱਡੀ ਨਿੱਕੀ ਮੱਛੀ ਕੁੰਡੀ ਚ, ਫਸ ਜਾਂਦੀ !
ਹੁਣ ਬੜਿਆਂ ਵਰਿਆਂ ਮਗਰੋਂ ਮੈਂ ਜਦੋਂ ਪੱਗਾਂ ਚ, ਸਿਰ ਫਸਾਈ ਪੰਥ ਵਿਚਲੇ ਗੰਡੋਇਆਂ ਵੱਲ ਵੇਹਨਾਂ ਵਾਂ ਤੇ ਮੇਰਾ ਧਿਆਨ ਚਾਚੇ ਸ਼ਿੰਦੇ ਦੇ ਗੰਡੋਇਆਂ ਵੱਲ ਚਲਾ ਜਾਂਦਾ ਹੈ !ਇਹ ਪੰਥ ਚ, ਵਿਚਰ ਰਹੇ ਦਾਨੇ ਸਾਨੇ ਗੰਡੋਏ ਕੌਮ ਵਿਚਲੇ ਟੈਲੈਂਟਿਡ, ਭਾਵਕ, ਬੇਬਾਕ, ਹੋਣਹਾਰ ਤੇ ਦਲੇਰ ਨੌਜਵਾਨਾਂ ਦੀ ਸ਼ਨਾਖ਼ਤ ਕਰਕੇ ਦੁਸ਼ਮਣ ਦਾ ਅਹਾਰ (ਖੁਰਾਕ) ਬਣਾਂਉਂਦੇ ਹਨ । ਇਹਨਾਂ ਗੰਡੋਇਆਂ ਦਾ ਕੰਮ ਤੱਤੇ ਨਾਹਰੇ, ਗਰਮ ਤਕਰੀਰਾਂ ਤੇ ਇਮੋਸ਼ਨਲ ਸਪੀਚ , ਇਹ ਵੇਖਣ ਨੂੰ ਕੱਟੜ ਖਾਲਿਸਤਾਨੀ ਲਗਦੇ ਨੇ ਪਰ ਤਾਰਾਂ ਕਿਤੇ ਹੋਰ ਜੁੜਦੀਆਂ ਹਨ !
ਹੁਕਮਰਾਨਾਂ ਨੂੰ ਪਤਾ ਹੁੰਦਾ ਕਿਹੜਾ , ਭਾਈ ਜੋਗਾ ਸਿੰਘ ਖਾਲਿਸਤਾਨੀ, ਵੀਰ ਦੀਪ ਸਿੱਧੂ, ਸ਼ੁੱਭਦੀਪ ਮੂਸੇਵਾਲੇ ਜਾਂ ਬੀਤੇ ਸਮੇਂ ਤਰਨਤਾਰਨ ਇਲਾਕੇ ਨਾਲ ਸਬੰਧਿਤ ਇਕ ਨੋਜਵਾਨ ਪੱਤਰਕਾਰ ( ਨਾਮ ਵਿਸਰ ਗਿਆ ) ਵਾਂਗ ਹਕੂਮਤ ਲਈ ਮਸਲਾ ਖੜ੍ਹਾ ਕਰ ਸਕਦੇ ਹਨ ਨੂੰ ਬਿਲੇ ਲਾ ਦਿੱਤਾ ਜਾਂਦਾ ! ਡਿਬਰੂਗੜ ਜੇਲ੍ਹ ਜਾਂ ਹੋਰਨਾਂ ਜੇਲ੍ਹਾਂ ਚ, ਬੈਠੇ ਸ਼ਹੀਦ ਸਿੰਘਾ ਦੇ ਵਾਰਸ ਵੀ ਇਸੇ ਕੜੀ ਦਾ ਹਿੱਸਾ ਹਨ ਕਿ ਉਹ ਕਿਸੇ ਦੀ ਕਾਣ ਨਹੀਂ ਮੰਨਦੇ ! ਵਰਨਾ ਝੰਡਿਆਂ ਚ, ਡੰਡੇ ਫਸਾ ਕਿ ਜ਼ਿੰਦਾਬਾਦ ਮੁਰਦਾਬਾਦ ਆਲ਼ੇ ਗੰਡੋਏ ਤੇ ਦੇਸ਼ ਅਤੇ ਵਿਦੇਸ਼ ਬੜੇ ਤੁਰੇ ਫਿਰਦੇ ਹਨ ।
ਹੱਥਲੀ ਲਿਖਤ ਲਿਖਣ ਦਾ ਕਾਰਨ ਵੀ ਨੌਜਵਾਨੀ ਨੂੰ ਸੁਚੇਤ ਕਰਨਾ ਹੈ ਕਿ ਗੰਡੋਇਆਂ ਤੋਂ ਸੰਭਲ਼ ਕੇ ! ਇਹ ਨਹੀਂ ਕਿ ਆਪਾਂ ਖ਼ਾਲਸਾ ਰਾਜ ਦੀ ਗੱਲ ਨਹੀਂ ਕਰਨੀ ਜਾਂ ਆਪਣੇ ਸ਼ਹੀਦ ਸਿੰਘਾਂ ਜਾਂ ਲੋੜਵੰਦ ਪਰਿਵਾਰਾਂ ਦੀ ਬਾਂਹ ਨਹੀਂ ਫੜਨੀ, ਜਰੂਰ ਫੜਨੀ ਹੈ, ਪਰ ਸੁਚੇਤ ਹੋ ਕੇ ! ਵਿਦੇਸ਼ਾਂ ਚ, ਵੱਸਦੇ ਵੀਰ ਬੜੀ ਸ਼ੁੱਭ ਭਾਵਨਾ ਨਾਲ ਪੰਜਾਬ ਵਸਦੇ ਆਪਣੇ ਗੁਰ ਭਾਈਆਂ ਦੀ ਮਦਦ ਕਰਦੇ ਹਨ ਜਾਂ ਕਰਨੀ ਚਹੁੰਦੇ ਹਨ ਉਹਨਾਂ ਨੂੰ ਬੇਨਤੀ ਹੈ ਕਿ ਗੰਡੋਇਆਂ ਤੋ ਬਾਈਪਾਸ ਹੋ ਕੇ !
ਬਾਕੀ ਜਿਸ ਕੋਲੋਂ ਵੀ ਦੋ ਜਹਾਨ ਦੇ ਵਾਲੀ ਸਾਹਿਬ ਸ੍ਰੀ ਗੁਰੂ ਗੋਬਿੰਦ ਸਿੰਘ ਜੀ ਨੇ ਸੇਵਾ ਲੈਣੀ ਹੈ ਲੈ ਹੀ ਲੈਣੀ ਆ ! ਪਰ ਆਪਣੇ ਆਪ ਨੂੰ ਵੱਡੇ ਖਾਲਿਸਤਾਨੀ ਦੱਸਣ ਵਾਲੇ ਗੰਡੋਇਆਂ ਤੋ ਸਾਵਧਾਨ ਹੋਕੇ ! ਇਹ ਪਰਖ ਲੈਣਾ ਕਿ ਬੰਦਾ ਦੋਗਲਾ ਤੇ ਨਹੀਂ ਜੋ ਸਾਰੇ ਘਰ ਰੱਖ ਰਿਹਾ ਹੈ ! ਕਿੱਸੇ ਸਿਆਣੇ ਨੇ ਕਿਹਾ ਯੁੱਧ ਜਾਂ ਤੇ ਲੜਿਆ ਜਾਂਦਾ ਜਾਂ ਨਹੀਂ ਲੜਿਆ ਜਾਂਦਾ, ਪਰ ਜੇ ਲੜਿਆ ਜਾਂਦਾ ਤਾਂ ਲਕੀਰ ਖਿੱਚ ਤੇ ਅੱਧ ਵਿਚਾਲੇ ਨਹੀਂ ਕਿ ਦੋਵੇ ਪਾਸੇ ਰੱਖੀ ਜਾਓ ! ਸੋ ਸਾਵਧਾਨ ਗੰਡੋਇਆਂ ਤੋਂ !
ਹੋਈਆਂ ਭੁੱਲਾਂ ਚੁੱਕਾਂ ਦੀ ਖਿਮਾਂ !
ਬਿੱਟੂ ਅਰਪਿੰਦਰ ਸਿੰਘ  
ਜਰਮਨ