'ਕੁਦਰਤ ਕਿਸੇ ਨਾਲ ਨਾ ਫ਼ਰਕ ਰਖੇ' - ਮੇਜਰ ਸਿੰਘ ਬੁਢਲਾਡਾ

ਕ‌ਈਆ ਦਾ 'ਜ਼ਾਤ' ਕਰਕੇ 'ਸਨਮਾਨ' ਹੁੰਦਾ।
ਕ‌ਈਆ ਦਾ 'ਜ਼ਾਤ' ਕਰਕੇ 'ਅਪਮਾਨ' ਹੁੰਦਾ।
ਜਦ ਪੈਦਾ ਹੋਣ ਦਾ ਸਭਦਾ ਢੰਗ ਇਕੋ,
ਫਿਰ ਨੀਚ-ਊਚ ਕਿਵੇਂ ਇਨਸਾਨ ਹੁੰਦਾ?
ਨੀਵੇਂ ਹੋਣ ਦਾ ਨਾ ਫਿਰ ਕੋਈ 'ਗਮ' ਰਹਿੰਦਾ
ਜੇ ਉੱਚਾ ਹੋਣ ਦਾ ਨਾ ਕਿਸੇ ਨੂੰ ਗੁਮਾਨ ਹੁੰਦਾ।
ਹਰ ਪਲ਼ ਮਾੜੀ ਸੋਚ ਰੱਖਣ ਵਾਲਾ,
ਹੋਵੇ ਕੋਈ ਵੀ ਵੱਡਾ ਬੇਈਮਾਨ ਹੁੰਦਾ ।
ਉਹ ਮਾੜੀ ਸੋਚ ਤੋਂ ਮੁੱਖ ਮੋੜ ਲੈਂਦਾ,
ਜਿਸ ਦੇ ਅੰਦਰ ਚੰਗਾ ਗਿਆਨ ਹੁੰਦਾ।
ਜੋ ਇਨਸਾਨ ਗਿਆਨਵਾਨ ਹੁੰਦਾ
ਉਸ ਲਈ ਇਨਸਾਨ ਬਸ ਇਨਸਾਨ ਹੁੰਦਾ।
ਕੁਦਰਤ ਕਿਸੇ ਨਾਲ ਨਾ ਫ਼ਰਕ ਰਖੇ,
ਸਮਝੇ ਸਾਰਿਆਂ ਨੂੰ ਇਕਸਾਰ ਯਾਰੋ।
'ਮੇਜਰ' ਫ਼ਰਕ ਇਥੇ ਉਹੀ ਰੱਖਦਾ,
ਜੋ ਲੱਖਾਂ ਜੂਨਾਂ ਦਾ ਸਰਦਾਰ ਯਾਰੋ।

ਮੇਜਰ ਸਿੰਘ ਬੁਢਲਾਡਾ
94176 42327

'ਰਾਵਣ' - ਮੇਜਰ ਸਿੰਘ ਬੁਢਲਾਡਾ
ਜੇ 'ਰਾਵਣ' ਵਾਲੇ ਕਿੱਸੇ ਦੀ ਗੱਲ ਕਰੀਏ,
ਕਹਿੰਦੇ ਨੇ "ਰਾਵਣ' ਸੀ ਬੜਾ ਮਹਾਨ ਯਾਰੋ।
ਇਹਨੇ ਸੀ 'ਕਾਲ਼' ਨੂੰ ਵੱਸ ਕੀਤਾ,
ਇਹ ਯੋਧਾ ਸੀ ਬੜਾ ਬਲਵਾਨ ਯਾਰੋ।
'ਸੋਨੇ' ਦੀ 'ਲੰਕਾ' 'ਚ ਸੁਖੀ ਸੀ ਲੋਕ ਸਾਰੇ,
ਬਹੁਤ ਵੱਡਾ ਸੀ ਇਹਨੂੰ ਗਿਆਨ ਯਾਰੋ।
ਚਾਹੇ ਲੈ ਗਿਆ 'ਸੀਤਾ' ਨੂੰ ਗ਼ੁੱਸੇ ਵਿੱਚ ਆਕੇ,
ਉਹਦਾ ਰੱਖਿਆ ਵਿਸ਼ੇਸ਼ ਧਿਆਨ ਯਾਰੋ।
ਮਾੜਾ ਵਰਤਾਓ ਨਾ 'ਸੀਤਾ' ਦੇ ਨਾਲ ਕੀਤਾ ,
ਕਾਇਮ ਰੱਖਿਆ ਮਾਨ-ਸਨਮਾਨ ਯਾਰੋ।
ਸਾਬਤ ਕੀਤਾ 'ਸੀਤਾ' ਨੇ ਪ੍ਰਿਖਿਆ ਪਾਸ ਕਰਕੇ,
ਜਦ ਲਿਆ ਗਿਆ ਇਮਤਿਹਾਨ ਯਾਰੋ।
ਵੇਖੋ ਸੋਚਕੇ ਜੇ 'ਰਾਵਣ' ਹੁੰਦਾ 'ਰਾਖਸ਼'?
'ਸੀਤਾ' ਦੇ ਸਵੰਬਰ ਵਿਚ ਕੋਈ ਬੁਲਾਂਵਦਾ ਨਾ।
'ਸੀਤਾ' ਨੂੰ ਸਤਿਕਾਰ ਨਾਲ ਨਾ ਕਦੇ ਰੱਖਦਾ,
ਇਸ ਤੇ ਤਰਸ ਭੋਰਾ ਵੀ ਖਾਂਵਦਾ ਨਾ।
'ਰਾਵਣ' ਦੇ ਆਖਰੀ ਸਮੇਂ ਗਿਆਨ ਦੇ ਲਈ ,
'ਰਾਮ', 'ਲਛਮਣ' ਨੂੰ ਪੈਰੀ ਖੜਾਂਵਦਾ ਨਾ।
'ਰਾਵਣ' ਨੂੰ ਕੋਈ ਨਹੀਂ ਸੀ ਮਾਰ ਸਕਦਾ,
'ਮੇਜਰ' ਜੇ ਭਾਈ ਦਗ਼ਾ ਕਮਾਵਦਾ ਨਾ।
ਮੇਜਰ ਸਿੰਘ ਬੁਢਲਾਡਾ
94176 42327