ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
07 Nov. 2021
ਯੂ.ਪੀ.’ਚ ਪ੍ਰਿਯੰਕਾ ਗਾਂਧੀ ਦੀ ‘ਹਨੇਰੀ’ ਝੁੱਲਣ ਦਾ ਦਾਅਵਾ- ਇਕ ਖ਼ਬਰ
ਸੀਟੀ ਤੇ ਸੀਟੀ ਵੱਜੇ, ਜਦੋਂ ਮੈਂ ਗਿੱਧੇ ਵਿਚ ਆਈ।
ਮੁਲਾਜ਼ਮਾਂ ਤੇ ਪੈਨਸ਼ਨਰਾਂ ਨੇ ਸਰਕਾਰ ਦੇ ਲਾਰਿਆਂ ਦੀ ਪੰਡ ਫੂਕੀ- ਇਕ ਖ਼ਬਰ
ਤੇਰਾ ਲਾਰਾ ਵੇ ਸ਼ਰਾਬੀਆਂ ਦੀ ਗੱਪ ਵਰਗਾ।
ਪੰਜਾਬ ਵਿਚ ਸਿੱਖਾਂ ਦਾ ਕੋਈ ਧਰਮ ਪ੍ਰੀਵਰਤਨ ਨਹੀਂ ਹੋਇਆ- ਬੀਬੀ ਜਾਗੀਰ ਕੌਰ
ਬੀਬੀ ਜੀ ਆਪਣੀਆਂ ਅੱਖਾਂ ਕਿਸੇ ਚੰਗੇ ਜਿਹੇ ਡਾਕਟਰ ਨੂੰ ਦਿਖਾਉ।
ਡੀ.ਐੱਸ.ਪੀ. ਨੇ ਧਰਨਾਕਾਰੀ ਕਿਸਾਨਾਂ ਨੂੰ ਦੀਵਾਲੀ ‘ਤੇ ਮਠਿਆਈਆਂ ਵੰਡੀਆਂ-ਇਕ ਖ਼ਬਰ
ਡੀ.ਐਸ.ਪੀ. ਸਿਆਂ ਦੇਖੀਂ ਕਿਤੇ ਤੇਰੇ ‘ਤੇ ਦੇਸ਼-ਧ੍ਰੋਹ ਦਾ ਮੁਕੱਦਮਾ ਹੀ ਨਾ ਦਰਜ ਹੋ ਜਾਵੇ।
ਕੈਪਟਨ ਨੂੰ ਕਿਸਾਨਾਂ ਦੀਆਂ ਸ਼ਹੀਦੀਆਂ ਦਾ ਮੁੱਲ ਨਹੀਂ ਵੱਟਣ ਦਿਆਂਗੇ- ਚੜੂਨੀ
ਟੁੰਡੇ ਕਿਸੇ ਦੇ ਨਾਲ਼ ਕੀ ਯੁੱਧ ਕਰਨਾ, ਲੰਗੜੇ ਸਿਖਰ ਪਹਾੜ ਦੇ ਜਾਣ ਨਾਹੀਂ।
ਬਾਦਲ ਪਰਿਵਾਰ ਨੇ ਸ਼ਹੀਦ ਕਿਸਾਨਾਂ ਦੀ ਯਾਦ ਵਿਚ ਦੀਵੇ ਬਾਲ਼ੇ-ਇਕ ਖ਼ਬਰ
ਪਿੱਛੋਂ ਆਖਦੇ ਰੱਬਾ ਤੂੰ ਸੁਖ ਰੱਖੀਂ, ਲਾ ਕੇ ਰੂਈਂ ਦੇ ਨਾਲ਼ ਅੰਗਾਰਿਆਂ ਨੂੰ।
ਸਰਕਾਰ ਬਣਨ ‘ਤੇ ਦੰਗਾ ਪੀੜਤ ਡੀਵੈਲਪਮੈਂਟ ਬੋਰਡ ਬਣਾਉਣ ਦਾ ਵਾਅਦਾ- ਸੁਖਬੀਰ ਬਾਦਲ
ਹੁਣ ਅੱਕਾਂ ਤੋਂ ਭਾਲ਼ਦੀ ਡੇਲੇ ,ਜੱਟਾਂ ਨੇ ਕਰੀਰ ਪੁੱਟ ਲਏ।
ਨਵਜੋਤ ਸਿੱਧੂ ਦੇ ਮੁੱਦੇ ਤਾਂ ਠੀਕ ਪਰ ਸ਼ਬਦਾਵਲੀ ਗ਼ਲਤ- ਪਰਮਿੰਦਰ ਸਿੰਘ ਢੀਂਡਸਾ
ਆਉਂਦੀ ਜਾਂਦੀ ਨੂੰ ਘੜਾ ਚੁਕਾਉਂਦਾ, ਮਗਰੋਂ ਮਾਰਦਾ ਗੋਡਾ।
ਕਾਂਗਰਸ ਵਲੋਂ ਪ੍ਰਸ਼ਾਂਤ ਕਿਸ਼ੋਰ ਦੀਆਂ ਲਈਆਂ ਜਾ ਸਕਦੀਆਂ ਹਨ ਸੇਵਾਵਾਂ-ਇਕ ਖ਼ਬਰ
ਤੁਸੀਂ ਕਰੋ ਅਸਾਡੀ ਕਾਰੀ ਜੀ, ਹੁਣ ਹੋ ਗਈ ਮੁਸ਼ਕਿਲ ਭਾਰੀ ਜੀ।
ਨਵਜੋਤ ਸਿੱਧੂ ਨੇ ਮੁੜ ਕੈਪਟਨ ਅਮਰਿੰਦਰ ਸਿੰਘ ‘ਤੇ ਸੇਧਿਆ ਨਿਸ਼ਾਨਾ- ਇਕ ਖ਼ਬਰ
ਜਾਮਨੂੰ ਦੀ ਗਿਟਕ ਜਿਹਾ, ਮੇਰੇ ਸਾਹਮਣੇ ਧੜਾ ਧੜ ਬੋਲੇ।
ਮੀਂਹ ਪੈਣ ‘ਤੇ ਸਮਾਰਟ ਸਕੂਲ ’ਚ ਗੋਡੇ ਗੋਡੇ ਪਾਣੀ ਫਿਰਦੈ- ਇਕ ਖ਼ਬਰ
ਸੁਖਬੀਰ ਦੀ ਪਾਣੀ ਵਾਲ਼ੀ ਬਸ ਲੈ ਲਉ ਬਈ, ਵਿਹਲੀ ਹੀ ਖੜ੍ਹੀ ਐ।
ਬਿਜਲੀ ਸਮਝੌਤੇ ਰੱਦ ਕਰਨੇ ਏਨੇ ਸੌਖੇ ਨਹੀਂ- ਸੁਖਬੀਰ ਬਾਦਲ
ਇੰਜ ਕਹੋ ਕੇ ਸਾਡੀਆਂ ਦਿੱਤੀਆਂ ਗੰਢਾਂ ਖੋਲ੍ਹਣੀਆਂ ਏਨੀਆਂ ਸੌਖੀਆਂ ਨਹੀਂ।
ਸਰਕਾਰ ਨੇ ਬਿਜਲੀ ਸਸਤੀ ਕਰਨ ਦੇ ਨਾਂ ‘ਤੇ ਪੰਜਾਬੀਆਂ ਨਾਲ਼ ਧੋਖਾ ਕੀਤਾ- ਅਮਨ ਅਰੋੜਾ
ਸੱਸ ਪਿੱਟਣੀ ਪੰਜੇਬਾਂ ਪਾ ਕੇ, ਜੱਗ ਭਾਵੇਂ ਕਰੇ ਨਿੰਦਿਆ।
ਚੰਨੀ ਨੇ ਅੱਧਾ ਪੰਜਾਬ ਬੀ.ਐੱਸ.ਐੱਫ. ਹਵਾਲੇ ਕੀਤਾ- ਹਰਸਿਮਰਤ ਬਾਦਲ
ਜਿਹਨੀਂ ਸਾਰਾ ਪੰਜਾਬ ਲੁੱਟਿਆ ਕੁਝ ਉਨ੍ਹਾਂ ਬਾਰੇ ਵੀ ਕਹੋ ਬੀਬੀ ਜੀ।
ਸੋਨੀਆ ਗਾਂਧੀ ਨੇ ਕੈਪਟਨ ਅਮਰਿੰਦਰ ਸਿੰਘ ਦਾ ਅਸਤੀਫ਼ਾ ਕੀਤਾ ਮੰਨਜ਼ੂਰ-ਇਕ ਖ਼ਬਰ
ਜੱਗ ਜੰਕਸ਼ਨ ਰੇਲਾਂ ਦਾ, ਗੱਡੀ ਇਕ ਆਵੇ ਇਕ ਜਾਵੇ।
ਅਖੀਰ ਕੈਪਟਨ ਨੇ ਆਪਣੀ ਵੱਖਰੀ ਪਾਰਟੀ ਬਣਾ ਹੀ ਲਈ- ਇਕ ਖ਼ਬਰ
ਬੁੱਢੀ ਘੋੜੀ, ਲਾਲ ਲਗਾਮ।
